1 Yesu kalika taari yo na kaenda karika uruka lwa uyahudi na taari ya mbele ya iriko lya Yorodani, Isyamu ikansora liingi. kavalosha lingi, sheeli eeshivie itana. 2 Na mafarisayo vakasha imwelelia na vakamwura, ''Nkisumani kwa nndu wa ndumi ilakana na nka wamwi?'' 3 Yesu kavaarua, Musa amuvavasa ki?'' 4 Vakanumbua ''Musa aniingia muumu wa itisira barua ya llakanu na numa kumbute nka.'' 5 Nkiimba kyuumu lwa mirima yanu nkyo kiimba kamutisiria ivavaso lyo.'' Yesu avaia. 6 Kake kuuka mbooka ya yuumba, ' Iruva avatana vakee nndumi na nka.' 7 Kiimba kyo, nndumi atiaa nde na mae wamwi na alungane na nka wamwi, 8 na iwo vavili vavaa vvili umwi, amu vvavili lingi ndi kake ni vvili umwi. 9 Na ikyo kilya kyalunganiswa ni Iruva nndu atalakanise.'' 10 Nka nae katia wo mmi wamwi na kandeorwa ni mmi ungi, ito amaaika. 11 Kavaia, woose alakanaa na nka wamwi andeora nka ungi, ito amaaika muni. 12 Na ili veekee ifo numba, vanalosho vamwi vakamwura lingi kiimba kyo. 13 Nawo vakamwendee vana vao vannya amu avabaane kake vanalosho vaka vakavanaya. 14 Kake Yesu ili amanya ikyo, kyansenya kutu ndi kavaia, Otoren vana vannya vashe kwakwa, manya mutaveemi, amu vakee sha iva umangi lwa Iruva llwawo. 15 Udede namuia, woose atawariaa umangi lwa Iruva sha mwana munnya kya dede amakii yaka karika umangi lwa Iruva ndi. 16 Kyasia kakurika vana maakon amwi na kavaniinga mbora kavaekeria maako ringewu yawo. 17 Na ili abooka kyaaro kyamwi nndu umwi karirishia kafwiria nri mbele yamwi, kamwura, Llosha nnuru, natana ki amu nrwaa ding'u ya muu utakisiaa?'' 18 Na Yesu kanumbua, Nkiki ili kwashivaanga nnuru? Eefo nnuru, kita Iruva muni da. 19 Kwishi mavavaso: kutawaa, kutaaike, kutaive, kutafingie nndu ungi kindo atatanie, kutalembe, kwindie ndeo na maa.' '' 20 Nndu kamwia, ''Llosha ifi foose na fiwara kuuka utin lwa kwa.'' 21 Yesu kamulla na kamfara. kavaia kwaanguyo nkindo kimwi, kyawara kundekumba foose kuore na kuniinge vakiva, llo kwiraa masaa iruvewu. llo kushe kushisore.'' 22 Kake kafikwa nndewu kiimba kya firero filya. kaenda awore unaari, amu eeworee masaa meengi. 23 Yesu kalla taari toose na kaia vanalosho vamwi, nkasa are ikee kyuumu kwa isimba yaka karika umangi lwa Iruva! 24 Vanalosho vakarikiswa kwa firero fo. kake Yesu kavaia lingi, vana, nkasa are kikee kyuumu yaka karika umangi lwa Iruva! 25 Nkyaangu ngoye iitwa mbuen ya sindano kita nndu isimba yaka karika umangi lwa Iruva.'' 26 Vakarikiswa nnu na vakarerana, ''kuro ni i akiaa.'' 27 Yesu kavalla na kanumbua, kwa nndu kivaa ndi, kake nkwa Iruva ndi.Amu kwa Iruva foose fivaa.'' 28 ''Petro kabooka irera nae, Lla te tantia wo foose na tikakusora.'' 29 Yesu kanumbua ''Udede namuia ini, Eefo antia numba ana mwanamae, ana mfwamae ana mae, ana ndee ana vana ana nrema kwa kyiimba kyakwa na kiimba kya nrumi shisha, 30 Ulya atawariaa kaiyana kita alli ia isangen: numba, mwanamae, mfwamae, mae, vana, nrema, kwa ukiva na isangen lyo lishaa, muu utakisiaa. 31 Kake veengi vakee va mbele va vaa va numa na va numa vavaa va mbele.'' 32 Ili vakee shien, yenda Yerusalemu, Yesu eevairiee mbele yawo. vanalosho vakariika, na valya veekee vasora numa vakaerea. Llo Yesu avasauya mbaai lingi valya ikumi na vavili na kabooka ivaongoya filya fivvia ka kufui: 33 Llan, tikee yenda kumande Yerusalemu na mwana wa nndu afitwaa kwa vakohani vanini na vaaria va mitisirie. vamwumisiaa awalwa na vanrambikia kwa vandu vayavarumu. 34 Vanteendaa, vammishia manyiiri, vankabaa na mbiiri, na vawwaa. kake numa ya mikonu iraru arukaa.'' 35 Yakobo na Yohana, vana va Zebedayo, vakasha kwamwi na inumbua, ''Llosha, tikuuri kutitanie kyoose tikuterevaa.'' 36 Kavaia, ''muuri mmutanie ki?'' Vakanumbua, 37 ''Tiniinge muumu wa ikaa nawe karika unini lwafo, umwi uko usha na ungi uko umuso na 38 Kake Yesu kavaarua, ''mwishi kilya mukee itereva ndi. mumakii inwa umbata lu nin nnwaa ana ibatiswaa ubatiso lu nin mbatiswaa?'' 39 Vakamwia, '' Timakii'' Yesu kavaia, ''Umbeta nnwaa, munwaa. na ubatiso lu nabatiswa, musisiriaa. 40 Kake ulya akaa uko lwakwa usha ana uko lwakwa umuso nta nnin wa yuuta ndi, kake nkwa valya kwao veekee vaderie.'' 41 Vanalosho valya vengi ikumi ili vandeita ifi, vakabooka iturukia Yakobo na Yohana. 42 Yesu kavavaanga kwamwi na kanumbua, ''mwishi sheeli valya valolikie vvashilia vandu va masanga vashiliaa, na vandu vawo vanini ivaorusa wiitoro ringewu yawo.'' 43 Kake kisumani iva kuri kari kanu ndi, woose avaa nnini kari kanu kyawara amurundie. 44 Na woose avaa wa mbele kari kanu kyawara ave iketi lya woose. 45 Amu mwana wa nndu ashe asherundiyo ndi ni ishe runda, na ishereka muu wamwi iva mutaua kwa veengi. 46 Vakasha veriko. Ili eeukaa Yeriko na vanalosho vamwi na syamu nini, mwana wa Timayo, Batimayo, ndon aterevaa, kakaa mbaai ya shia. 47 Ili andeita sheeli ni Yesu wa Nasareti, kabooka ikaba kirorongyo na inumbua, '' Yesu mwana wa Daudi shililia!'' 48 Veengi vakakangaya ndoni ulya, veemwiaa asie do. kake kaia kwa ununga nnu, ''mwana wa Daudi shililia!'' 49 Yesu kasalala kavavasa avaangwa. vakavaanga ndon ulya veenumbua, uma ngoo! kwimboo! Yesu akee ikuvaanga.'' 50 Kakumba ikoti lyamwi mbaai, karisha nnu, kasha kwa Yesu. 51 Yesu kamwaruwa na kamuia, ''kuuri nkutanie ki?'' Ndumi ulya ndon kaarua, Llosha, mfurie ilolia.'' 52 Yesu kamwia ''Enda, ukusura lyafu lyankukira.'' io io miso amwi akalolia; na kasora Yesu shien.