¹ Ii yyo mbooko ya nrumi ya Yesu Kristo, mwana wa Iruva. ² Sheeli yatisirwa mmwauya fisuku ulya Isaya, ''Lla, nrumaa nrumi wakwa mbele yafo, umwi asongosie shia yafo. ³ Unungu lwa nndu akee ivaanga nng'alon,''Songosien shia ya Nndumi sereesen shia tamwi''. ⁴ Yohana ashe, eebatisaa nng'alon na ikwaanisa ubatiso lwa iishika kwa ililia lya mareko. ⁵ Uruka loose lwa Yudea na vandu woose va yerusalemu vakaenda kwamwi. veekee ibatiswa yye kulya muren wa yordani, veerambuaa awo. ⁶ Yohana eeree nseto wa mafili a ngamia na kitati kya shoni kisin kyamwi , ana eekee ila nrie na uki lwa usaken. ⁷ Kakwaanisa na inumbua, ''Eefo umwi ashaa numa yakwa awore finya kita nin, ana nta kisenye ikwiinika sina yoromua ngyurumu ta faaru famwi ndi. ⁸ Nni namubatisa kwa mura, kake ye amubatisaa kwa mumuyo nsongori.'' ⁹ Kyave kya mikono ilya sheeli Yesu ashe kuuka Nazareti ya Galilaya , na kabatiswa ni Yohana kulya muren wa Yordani. ¹⁰ Neeli Yesu akwiimbo kuuka muren kalolia Iruwa liruka ruu kalolia mumuyo eolokaa si ringewu yamwi sha mbuku. ¹¹ Na unungu lukauka iruvewu, ''Iwe ni iwe mwanakwa nkunde nansenywa nnu ni iwe.'' ¹² Na lieeni mumuyo kankabiria yenda baten. ¹³ Kakaa baten mikonu makumi aani, eeleliyoo nsatana. eeke andu emwi na mafisi a usakyeni, na malaika vakandundia ¹⁴ Alii ili Yohana andemaa iwarwa, Yesu kasha Galilaya eekwanisaa nrumi ya Iruva. ¹⁵ Eenumbuaa, mikonu yamfike na Umangi lwa Iruva lwansha ilashiken na kusuren karika nrumi.'' ¹⁶ Ili eeiraa mbaai ya nruva ya Galilaya , kalolia simoni na Andrea mwanamae wa simoni veeoloota mireyo yawo karika nruva, amu veekee vareya. ¹⁷ Yesu kavaia , ''Oreshon, shisoren, mmuaraa muve vareyava vandu.'' ¹⁸ Na lieni vakatiawo na insora ¹⁹ Ili Yesu andeenda kwashaa kinya kalolia Yakobo mwana wa Zebedayo na Yohana mwanamae wamwi veekee ngalaven veesongosiaa mireyo. ²⁰ Llaeni kavavaanga nawo vakatia nde yawo Zebedayo karika ngalava na varundi veetaia , vakansora. ²¹ Ili vandefika kaperinaumu , nkonu wa sabato, Yesu kaaka ifo numba ya iteveria na ilosha. ²² Variikiswa mmiloshie yamwi, amu eekee ivalosha sha muni witoro nta nsha vaaria va mitisirie ndi. ²³ Kwa feeri fo feni eeifo nndu umwi ifo numba yawo ya iterevia eewarwaa mmumuyo nkasha na kakaba kirorongyo, ²⁴ Eenumbuaa ''Nkiki toore kya itana na iwe, Yesu wa nazareti? kwansha itimamisiaa ? Nkwiishi ni iwe i Ni iwe nsongori ngitani wa Iruva!'' ²⁵ Yesu kanaiya mumuyo nkasha na inumbusia do na somuka kari kamwi. ²⁶ Na mumuyo nkasha ukantuulya si na ukasomuka kwamwi ili eiyaa kwa unungu lwa ringeewu. ²⁷ Na vandu woose vakariika, na vakaurana kilya umwi, Nkyo ki iki? mmiloshie miiya uwore wiitoro? kumande avavasa mumuyo nkasha nato umwiindie!'' ²⁸ Na mboni kiimba kyamwi ye liaeni tikakwaana kilya andu karika uruka loose lwa Galilaya. ²⁹ Na liaeni nsomuka numba ya iterevia, vakaaka numba kwa simoni na Adrea vakee na Yakobo na Yohana. ³⁰ Alli ngaatani ya simoni eelelee aroywa ni iseng'u na liaeni vakaia Yesu mboni tamwi. ³¹ Nae kasha, kawwara kwa uko, na kamwimboo ringewu iseng'u likasomuka kwamwi na kabooka ivarundia. ³² Ukwamun luwa na saa imaa yaakia, vakamwendee kwamwi woose valya valole ana vawarwa mmumuyo ³³ Muri woose wakusandiya andu emwi alya mwaangon. ³⁴ Karika vengi valya veelolee na saka ta mikae miingi na yuuta mimuyo miingi, eema mumuyo wireraa fulya imwiishi. ³⁵ Kakwimboo ngama kio, ili llema wifo; kakwimboo na yend andu a kyaanya na katereva alya. ³⁶ Simoni na woose veekee andu emwi nae vakanniya. ³⁷ Vakankooya na vakamwia, ''kilya umwi akee ikuruya'' ³⁸ Kavaia, ''Ndefon andu engi, wooro karika muri ilengetie, Amu mmakii ikwaanisa ifo nafo. kyo kindeshinnde yya. ³⁹ Kaenda kaira Galilaya yoose eekewanisaa karika numba ta iterevia tao na yumbuta mimuyo mikasha. ⁴⁰ Awarwa ni ivave umwi kasha kwamwi. ekee nterevaa kamfiria nri na kamwia, ''kwa kooya kuuri, kumakii ishirundia vve nsha.'' ⁴¹ Eekunwaa ni ililia, Yesu kasereesa uko lwamwi kambaana eemwiaa, Nuuri kuve nsha.'' ⁴² Lianeni ivave likamuuka , na kaarulwa iva nsha. ⁴³ Yesu kamwikimba nnu na kamwia yende lia eni. ⁴⁴ Kamwia, Manya kutasende kirero kwa woose , kake enda, kundekworusa kwa nkohani, kuniingie na kindo kya iniingia Iruva kiimba kya ishia lyafo, kasa musa avavasa, sha urambuo kwawo. ⁴⁵ Kake kaenda na ibooka yongoya kilya umwi na ikwaanisa kirero nnu kumande Yesu andekimakii lingi yaaka murin na baa ndi. kyasia kakaa andu a kyaanya na vandu vakasha kwamwi kuuka kilya andu.