¹ Kuya malaika wa tano takatowa imbeta yake. Tzaniyona inondo kulawa kulanga tzaigwile mne isi. Nondo tzain'gigwa ufunguo wa disimo digenda kune disimo dilihela gumwisho. ² Tzakapfvugula disimo dilihela chikomo, na diyosi tzadikwila uchanya kwa safu kulawa mghati ya disimo kama diyosi kulawa mne ditanuri dikulu. Ditzua na lilanga tzapfvibadilika pfvuya chisi kwa sababu ya diyosi dilawile kwisimo. ³ Mne diyosi tzige tzawala kutza mchanya ya isi, nao tzawan'gigwa ingufvu kama wala watandu mchanya ya isi. ⁴ Tzawalongeligwa wasinange imibali mne isi au gummea goghose kwa ichijani au gumbiki, isipokuwa tu iwanu wakalile bila ya gumuhuri gwa Mlungu mne ipfvihanga pfvao. ⁵ Hawen'gigwe ruhusa ya kuwakoma awo iwanu, bali kuwaganza tu kwa imietzi mitano. Usungu wao tzaukala kama aula wa kulumigwa na tandu homluma imunu. ⁶ Mne gamatzua ago iwanu wotzobama ifwa, lekeni hawotzochipata. Wotzatamani kudanganika, lekei ifwa itzowakimbila ⁷ Watandu tzawegela na farasi waandaligwe kwa ipfvita. Mne gamatwi gao tzakukala na ichinuu kama taji ya tzahabu na pfvihanga pfvao pfvikala kama pfa iwanadamu. ⁸ Tzawakala na tzipfvili kama tza wapinga na gamatzino gao kama ga simba. ⁹ Tzawakala na tzimambaga kama chuma na isauti ya gamabawa gao tzagakala kama sauti ya imituka mingi ya pfvita na wafarasi wokimbila kugenda kune ipfvita. ¹⁰ Tzawakala na mikila iluma kama tandu; mne imikila yao tzawakala na ingupfvu ya kunaga iwanu kwa mietzi mitano. ¹¹ Tzawakala naye kama Mndewa mchanya yao malaia wa disimo dilihela gumwisho. Ditwaga jake mne chiebrania ni Abanoni, na mne chiyunani ni Apolioni. ¹² Ole ya mwande iluta. Lola! Baada ya adino tzakukala na maafa meli gakutza. ¹³ Malaika wa sita tzakatowa imbeta yake, na tzanihulika isauti yolawa mne dihembe ja tzahabu ambayo tzaikala hambele ya Mlungu. ¹⁴ Sauti tzaimolongela malaika wa sita tzayakalile na imbeta, "Walekelele malaika wanne ambao tzawohigwe mne gumto gumkulu Efrata." ¹⁵ Malaika awala wanne tzawakalile waandaligwa kwa gumuda ago maalumu, ditzua ajo, gumwetzi ago, na gumwaka ago, tzawalekeligwa wawakome selusi ya iwanadamu. ¹⁶ Idadi ya wamaaskari zawakalile mchanya ya farasi tzaikala 200,000,000. Tzanihulika idadi yao. ¹⁷ Afvi ndiyo pfvambone farasi mne gamaono gangu na awala wakwilile mchanya yao; tzimambaga tzaol tzatzikala ndun'gu kama gumoto, buluu ipfvile na njano haipfvile. Matwi ga iwafarasi tzipfvikala kama pfva simba na mne imidomo yao tzagulawa gumoto, yosi na saifa. ¹⁸ Selusi ya iwanadamu tzawafile na agano gamapigo madatu: gumoto, yosi, na saifa tzaikala mne imidomo yao na mne imikila yao, ¹⁹ Kwa apfvila imikila yao tzaikala kama nzoka, na tzakuka la na gamatwi kama ambago tzawagatumila kuwagela gamajeraha iwanadamu. ²⁰ Iwanu tzawasigale awala ambao tzahawakomigwe na gamapigo agano, waleka kutubu ghamatendo gao tzagawatendile, wala haalekila kuwatamanila pfvinyamkela na imilungu ya tzahabu, sendi, shaba, gamabwe na imibiki, ipfvinu ambapfvo hapfvidaha kulola, kuhuilka, wala kugenda. ²¹ Wala hawakutubu utzilo wao, uhawi wao, uesharati wao au nzila tzao tza uhitzi.