¹ Kwa malaika wa dikanisa ja Efeso yandika: Agano ni gamalonga ga ayua yakwamilitza atzila nondo saba mne gumoko gwake gwa kuchimale. Yeye yogenda kati ya pfvinara pfva tzahabu pfva taa saba kolonga apfvino," ² "Nipfvimanya ambapfvo kutenda ibidii yako ya isan'gano na upfvumilipfvu wako thabiti, na kwamba hudaha kuhusiana nao wakalile waopfvu, na kuwaghetza wose wekema mitume na kuya siyo, na woneka kuya waongo. ³ Nipfvimanya kuwa una isubira na upfvumilipfvu, na kulutila mengi kwa sababu ya twaga jangu, na huna wipfve bado. ⁴ Lekeni adino ndiyo tzaninajo tzidi yako, kuuleka upendo wako wa mwande. ⁵ Kwa apfvo ukumbuke tzahugwile, ukatubu na kutenda ghamatendo gutendile tangu mwande. Hama hutubu, nitzakautza kuna gweghe na kuchusa ichinara chakokulawa ihanu ahala. ⁶ Lekeni gwege una adino, kochukia agala ambago Wanikolai wagatenda, ambago hata nene nogehila. ⁷ Kama kuna digutwi tegeletza agala ambago Muhe Mwenzeluka kogalongela gamakanisa. Na kwa yeye yoshinda nitzomwin'ga chibali cha kuja kulawa mne gumbiki gwa ughima ukallile mne paradiso kwa Mlungu," ⁸ "Kwa dikanisa ja Smina yandike: 'Agano ni gamalonga ga ayua ambaye ni mwande na mwisho amaye tzakadanganika na kukala mghima keli: ⁹ "Nigamanya gamaganzo gako na umasikini wako (lekeni gweghe kwa tajiri), na dighutzu ja awala wekema ni Wayahudi(lekeni siyo, wao ni sinagogi ja Yehile). ¹⁰ Usipfvuke gamaganzo gotzokupata. Lola! Yehile kobama kuwasa baatzi yenu mne digeretza ili mpate kughetzigwa, na mtzoganzika kwa imiaka kumi. Kalani waaminipfvu hadi kudanganika, na nitzowen'ga ditaji ja ughima. ¹¹ Kama kuna gutwi, hulika muhe pfvogalongela gamakanisa. Yeye yotzoshinda hotzopata gamatzala ga mauti ga keli." ¹² "Kwa gamakanisa ga Pergamo yandika: 'Agano ndiyo golonga yeye yakalile najo dipanga dikali, gakalile na gamakali pande mbili. ¹³ "Nihamanya ihanu hanikala, mahali hane ichigoda cha shetani. Hata apvo gweghe tzakwama n;gani ditwaga jangu, hata gamatzua agala ga Antipasi shahidi wangu, mwaminipfvu wangu, tzayakomigwe mna mwemwe, aho ndiyi Shetani kokala mghima. ¹⁴ Lekeni nina gamambo chidogo tzidi yako: kukala na iwanu ako wakwama gamafundisho ga Balaamu, yeye yamfundishe Balaki kwika ipfvikwatzo hambele ya wana Israeli, ili waje ipfvijo pfvilafvigwe inambiko na kwa milungu na kutzini. ¹⁵ Mne hali iyo, hata gweghe kunao baatzi yao iwakwama gamafundisho ga Wanikolai. ¹⁶ Basi utubu! Na kama hundile apfvo, nakutza hima, na nitzotenda pfvita tzidi yao kwa dipanga ulawa mne ichinywa changu. ¹⁷ Kama kuna digutwi tegheletza Gumuhe chowalongela gamakanisa. Yeye yotzoshinda, nitzomwin'ga baatzi ya aila imana ipfvisigwe, pfvipfvila nitzomwin'ga idibwe ditzelu jandikigwe twaga jasambi mchanya ya idibwe, twaga ambajo kuduhu yadimanyile bali yeye yodibokela. ¹⁸ "Kwa malaika wa dikanisa ja Thiatira, yandika: "Agano ndiyo gamalonga ga Mwana wa Mlungu, yeye yakalile na tzinenge tzake kama gumwali gwa moto, na gamatzayo kama shaba gasuigwe n'gani: ¹⁹ "Nichimanya ambacho kuchitenda, upendo wako na imani na ihuduma na upfvumilpfvu wako sabiti, na kuwa achila chautendile apfvino karibuni ni tzaidi ya achila chuutendile mwande. ²⁰ Lekeni nikala na adino tzidi yako: kompfvumulia pinga Yezebeli yekema imwenyego nabii ipinga. Kwa gamafundisho gake, kowapotosha watwana wangu kutzini na kuja ichijo chilapfvigwe inambiko kwa isanamu. ²¹ Tzanimwiga gumuda gwa kutubu, lekeni kalema kuutubia uopfvu wake. ²² Lola! Nitzomwasa mne idisatzi ja ipfvitamu, na awala iwotenda uesharati naye mne gamaganzo makali, la sipfvo watubu kwa achila chatendile. ²³ Nitzowatowa iwanage wadanganike na gamakanisa ghose gotzomanya kwamba nene ndiyo nogachungutza gamawatzo na tzitamaa. Nitzomwin'ga chila yumwe wenu kadiri ya ghamatendo gake. ²⁴ Lekeni kwa baatzi yenu, yamsigale mne Thiatira, kwa awala wose yahamkwama difundisho adino, na yahammanyile ambacho baatzi wokema gamafundisho ga Shetani, nolonga kuna mwemwe, 'sitzakwika mchanya yenu negulo yoyosi'. ²⁵ Kwa dijambo jojosi, latzima mkale imarampaka hanitzakutza. ²⁶ Yoyosi yotzoshinda na kutenda achila tzachanitendile hadi mwisho, kuna yeye nitzomwin'ga gamamlaka juu ya gamataifa. ²⁷ Kotzowatawala kwa ifimbo ya chuma, kama gamaakuli ga udongo, kotzowabena pfvipande pfvipande. ²⁸ Kama pfvanibokele kulawa kwa tata yangu, nitzomwin'ga pfvipfvila inondo ya nemitondo. ²⁹ Kama una gutwi, tegheletza achila ambacho Gumuhe kogalongela gamakanisa'.