¹ Enyeso sikunkuu amukate ne itritrendaue changa are ahwera, neare yuitranwa Pasaka. ² Na akumbeki ne akuu na aandeki vekakiseya njia omuuragha Yesu, kusoko vekavatrija antu. ³ Hafo setani akahefea kune Yuda Iskariote, umwe wa avoo aseywi ikumi na vavee. ⁴ Yuda akaenda usanya na akuu va akumbeki mwino ujomureka Yesu kune venso. ⁵ Vekayanja, na ufatrana umufa hela. ⁶ Mwenso akayanja na akafenja fursa omufa Yesu kure na mwirundo wa antu. ⁷ Itriku ra mikatre neitritrendewe changa ikaghea neare nkhoo afasaka inoneye aheyeywe. ⁸ Yesu akavatruma Petro na Yohana, akahanya, "Andi mwendo kutrendeya malewa olya Ufasaka." ⁹ Nekamuwiya, "Kufei ukufenja kutrende mantu asaya?" ¹⁰ Akavasucha, "Tregheyi nemwatrendeka mwa hefea umuji mughosya ne wuchie ng'ufa amaje ujotrana na nyee musambeyi unyumba ne ukuhefea. ¹¹ Na mukhanei mughonjo wa nyumba, "Museyi ukukukhania kekufeyi chumba ka aghenyi kune nejolya pasaka na asweyi vane?'' ¹² Ukumuraghea humba eka ghorofa neare kerefo kidahikie hendi maghondaniyi kuko." ¹³ Kanke vekaenda na vekahanga muintu mwino akavakhania kanki akaghondaneya malewa afasaka. ¹⁴ Muda neare wafika akaikhaa na atrumami vakwe. ¹⁵ Kanke akavakhania, "Nina lombe nkuu olya fasaka itrambe remwe kunanyu nekentina khasywa nene. ¹⁶ Kusoko nkumukhania, ntiulya kanke faka kune yudahwa ukutremi wa Mungu." ¹⁷ Kanke Yesu akahoa kikombe na neare akaromba akahanya, "Hori ireyi na muaghane nyenye vayo. ¹⁸ Kusoko nkumukhania ntunywa kanke ufafo wa musabibu faka utremi wa Mungu newaja." ¹⁹ Kanke akahora mukate neare waromba akavegha na uvafa, akahanya, "Urui ne mwere wane neare wafunyiwe kusoko anyu. Hendi uyi kwonkumbuka nene." ²⁰ Akahoa kikombe viyuyi neare valya utriku akahanya kikombe ikiyi ne iraghano neifya unsaghami ane neare ahunuka kusoko ane. ²¹ Enyenso ravi. Wasuu ne wansaliti we itrambi remwedo na nee umeza. ²² Kusoko mwana wama Adamu kwa trutre akaenda mwino ave veka amwiyura. Enyenso hehe umuntu uyoo neukukera umwana wama Adamu akhasywe!" ²³ Na vekaandya kiweya veenso kwa veenso, anyu mukhate ao neukutenda ntendo yasii. ²⁴ Kanke ikadweya winyomi mukhate awe ne anyu ne ukukhemwa mwese mukuu ukeea wong'e. ²⁵ Na mwenso akawakhanea, "Atemi wa antu wa ndughu wina wibali unto awe, na ao ne vina nguu unto awe weutwa ahesimiwa atawala. ²⁶ Ekwenso etriufenjwa kamwe utendeka vii kune nyenye. Mwese aja ne mukuu mukhate anyu unoneye atendeke mwino munyui na munya utongea atendeke mwino munya utumika. ²⁷ Kusoko wafe ne mukuu, uyuo ne ukikhaa umeza namba uyuo ne ukutumeka? Tiuyuo ne wikhee umesa na? Na nene ne mukhate anyu nemwe munya utrumika. ²⁸ Ekwenso nyenye katre ne mwafweye utendeka kwinanyu u maegheyo ane. ²⁹ Neumufa nyenye utremi, mwino Tata newampie nene utremi, ³⁰ Evii muhange ulya na unywa umeza ane muutremi, wane. Na ukikhaa kitrumbe ra utremi na uvramua mbeyu ikumi na iveere ya Israel. ³¹ Simoni, Simoni, manyi vii, Setani ukuromba awahange mwenso adahe uwafenent kinya ngano. ³² Enyeso nakuombea, vii uhuvei wako utaremwe, naare vii wasuka kanke, wakhamie aruna wako." ³³ Petro akamukhanea, mukuu nene nekighondaneye kwenda kinako umageresa nambese ukuya." ³⁴ Yesu akamusucha, "Nene kukukhanea vee, Petro, utriku wareeo, njololo etiurea ne vee ukee winankana mehenjo etatu mwino utinjije nene." ³⁵ Mwenso Yesu akawakhanea nenajomutroa nyenye mutrikwete mefuko, na nkafo ya malewa, mba maaratru, mukakefewa na ntuni?" Wekasucha, "Kutrire." ³⁶ Kanke akawakhanea, "Kwenso fanoi, mumunya mufuko, ne ahoe itambe remwe na nkafo amalewa. Uyuo ne atrikwete upanga inoneye arinje nkanjo akwe aghuue imwedu. ³⁷ Kusoko neumukhanea, ong'e nee aandekie kusoko ane inoneye aficheywe, 'Na akahowa kinya muntu ne waunangie torati.' Kusoko eroyo neraandekiwe kusoko ane kakhondeka.'' ³⁸ Kanke wekahanya, "Mukuu, Rava! hafai irefo mpanga ivere." Na akawakhanea, "Yakhondaa." ³⁹ Naare malewa autiku, Yesu akahegha mwino are ukutrenda matiku kwa matiku, akaenda uketanto ka mizeituni, na aseywi wakwe wekamusambeya. ⁴⁰ Naare, wag'hea akawakhanea, "Rombi mutraje mujohefea umaegheyo." ⁴¹ N akawareka akaenda kanyanya kaughumo wa igwe, akatrungama akaromba, ⁴² akahanya, "Tata, mwese useghetre, ng'heyeya kekombe ekeyi. Ekwenso nti nese neyanjetre nene, ekwenso mafenji ako atrendeke." ⁴³ Na malaika ufuma kirunde akamudweya, akamukhamia nkhoo. ⁴⁴ Naare mwenso ukumakhaseko akaromba kwa nguu ino na nsufi yakwe ikatendeka kinya matronye ne makuu a saghami ekajulula fang'e. ⁴⁵ Naare waoka kune ukuromba marombi akwe akaja uwahanga aseywi wakwe na akawahanga varee kusoko auvayi wawe, ⁴⁶ na akawaweya, "Asike ne muree? Uki murombo, mutraje mujohefea umaegheyo." ⁴⁷ Naare akee ureghetriye wihenga iburi rikuu ra antu rekadweya, na Yuda, umwedu wa atrumami ikumi na wawere uratrongea. Akamuhumbea Yesu adahe umutromia, ⁴⁸ Ekwenso Yesu akamukhanea, "Yuda, je ukumotronea mwana wa Adamu kwa umutromia?" ⁴⁹ Na vasaa nare wefife na Yesu newajoona asaya neajie udweya, wekahanya, "Mukuu kuwakhwe kwa mpanga na?" ⁵⁰ Na umwedu wawe akamukhwa mutrumami waa kuhani ne mukuu, nkamutema ketwe kakwe kakelelo. ⁵¹ Yesu akahanya, "Erei nerekhonde. Na mwenso akamutrenya kitrwe kakwe akamuforya. ⁵² Yesu akahanya kune kuhani ne mukuu, na kwa kuu wa hekalu, na kwa anyampaa nare waja umukwata, mwaja mwino kinya mwaja umukwatra mwivi cho mwina mafene na mafanga? ⁵³ Matiku ong'ee naare kwinanyu uhekalu mwinadaha unghumbwera mikhono nene. Ekwenso erei ne ikhondo ranyu ra udaho wa kiitri." ⁵⁴ Veenso wekamukwata, wekamuhoa, wekamureta unyumba ama kuhani mkuu. Ekwenso Petro are uwahongete unyuma kurenge. ⁵⁵ Neare vaacha motro ukiynja ramung'ee na vekaikhaa fang'e itambe remwdo, Petro akaikhaa mukhate awe. ⁵⁶ Mutumami umwedo wakikhema akamwona Petro neare wikhe uweru ne ufumie na moto akaurava na umukhanea, "Muntu uyui are wiitrambe remwe na nyee." ⁵⁷ Enyenso Petro akakhana, akahanya, "Mukhema nene ntimumanyie." ⁵⁸ Neare ikhondo rekufeyii muntu muya akamwona akahanya "Veve no we umwedu wawena." Enyenso Petro akasucha, "Mughosya, nene ntimwenso." ⁵⁹ Neare isaa remwedu rakea mughosya umwedu akahanya kwa nguu, "Trute kamwe muntu uyui are we itrambe remwedo nayo kusoko ne Mugalilaya." ⁶⁰ Enyenso Petro akahanya, "Mughosya, ntune." Neukurehanya na neare ukureghetya njololo ikarea. ⁶¹ Akakikengeya, Mukuu akamurava Petro. Na Petro akakumbukwa ukhani wa Mukuu hafoneakamukhania, "Nekenjololo itrina rea reo, ukukhana nene miinjo itatu." ⁶² Akaenda unje, Petro akarea kwa uvayi ne ukuu. ⁶³ Na antu vasaa neare vumudema Yesu, veka mutruka na umukhwa. ⁶⁴ Neare wamuukunekea miho, vekamuwiya, "Vakanya! Rghwa ne anyu ne wakukhwaa vee?" ⁶⁵ Vekareghetya mantu mainge ne inyuma ama Yesu na umutruka. ⁶⁶ Neare wacha diu, anyampaa vantu vekakihangweya itramberemwe akuu va makuhani na aandeki vekamutroa ukibarasa. ⁶⁷ Vekaahanya, "Mwese veve we Kristo, kukhanie." Enyeso mwenso akavakhanea mwese nena mukhanea mutru nyanja, ⁶⁸ na mwese nenamuwiya mutrunsucha." ⁶⁹ Enyenso kwandya fanoi na utrongea, Mwana wama Adamu ukutrendeka wikhe umukhono wa kulilo wa nguu a Mungu." ⁷⁰ Vong'e vekahanya, "Enyenso ve we mwana wa Mungu?" Na Yesu akavakhanea, "Nyenye mwahanya nene ne mwenso." ⁷¹ Vekahanya, "Nentune ke kufenja kanke ushahidi? Kusoko sese vayo kwatregheya ufuma umomo wakwe mwenso.''