¹ Vinge vekadaha ueka kwa ijaa ntambui ne yufenja nkani ne ya trendekie mkhate itu, ² mwino wikakufa sese, ufuma mwandio ne amanyi wa umiho na atrumami wa ukhani. ³ Uvii nanee naja uvihenga kwa ijaa mwandio wa mantu ayai onge ufuma mwandio nkaoni ne kujaa kune nene ukandekea kwa ughondaneyi wakwe muku ino Theofilo. ⁴ Uvii mudehe umanya trute amantu ne mwaseyiwe. ⁵ Ufuma kikhondo rama Herode, mtremi wa u Yudea, are kwina mukuu ungeja are ukoetanwa Zekaria, wa ufafo wama Abiya. Mukhema wakwe akafuma kune muncha wama Haruni, na rina rakwe are ukuetanwa Elizabeti. ⁶ Wonge are veuja anya tute usonge a Mungu; wekaenenda ijaa are watrikwetre uhondeo mukhate amaseyo na maragheyo a Mukuu. ⁷ Egwenso are watrikwete mwana, kusoko Elizabethi are mtaha, na kwa ikhondo ra sio wonge ivavere are anyampaa ino. ⁸ Are ikakigeo vii Zakaria are umukhate aaukuu wa Mungu, akafeya na utumami wa ukuu kwa udaho wa mwemo wake. ⁹ Ukikhoya na nkhani yau huani ne mukuu wafeinewinje uhanya ukhani, are akahwaniwa kwa kura yohefea uhekalu rama mukuu na oyii akatrunkeya musalaka. ¹⁰ Idare ronge ra antu are reuromba unjii nare veuntrunkeya musalaka. ¹¹ Fanoi malaika uja Mukuu akamudreya akaemeka ufande wa kilelo wa madhabahu au trunkeya. ¹² Zakaria akaoghofa ne wajomwona; wova ukamugwera. ¹³ Egweso malaika akamkhania, ''Utaoghofe Zakaria, soko marombi ako atregheyeka. Mukhema wako Elizabethi ujafafa mwana. Rina rakwe ujoetranwa Yohana. ¹⁴ Ujonanga ijaa na vinge wajoyanja ufafwa kwakwe. ¹⁵ Soko ujotrendeka Mukuu usonge a miho a Mukuu. Atrijunyua divai au kenywaji ne kekhare na mba ne kilulu. Ujutrendeka wijuuywe mwahu ne mwero ufuma unda ama nyinya wakwe. ¹⁶ Na antu ne vinge va kisiraeli vajofeurwa kune Mukuu Mungu wawe. ¹⁷ Winje usonge au sio wa Mukuu kwa mwahu na udaho wama Elia. Ujotrenda vii adahe usocha nkhoo ya watata kwa vana, gusoko awo ne watrutregeya, wajutrunguya mukhate aihaa ra munya trute. Ukutrenda vii ueka na uwaghondaneya kune Mukuu antu ne waghondaneywe soko akwe.'' ¹⁸ Zakaria akamukhanea malaika, ''Neudaha ure uremanya erei? Gusoko nene ne munyampaa na mukhema wane meakha akwe atrendeka minye ino.'' ¹⁹ Malaika akasocha na umwera, ''Nene ne Gabrieli, ne ukuemeka usonge a Mungu. ²⁰ Natrumwa nejo kukhanea, ukuretrea ukhani uroi ne uja. Narava, utrioreghetria, ukutrendeka ukire, utriodaha ureghetia kone itriko iroo mantu ayaii ajokighea. Eyii ne kwa soko ukaremwa uhuvea khani yane neyejiotrendeka kwa ikhondo ra trute.'' ²¹ Fanoi antu are wamurindie Zakaria. Weka takaa soko are uko trinyaa na nguu u hekalu. ²² Gwenso nare wafuma unji, atrinadaha ureghetria vinawe. Wekamanya mwino wahanga uona nare uku hekalu. Akafweya uraghea kenta na akasagha ukire. ²³ Ikakighea vii itriku ra mwemo wakwe nerajohia akahegha usoka ukhaya ukhakwe. ²⁴ Niare Zakaria wasoka ukhaya ufuma u mwemo wakwe uhekalu, mkhema wakwe akatrendeka murito. Mwenso atrinafuma ukhakwe akakikhaa mieri itrano. Akahanya, ²⁵ ''Ereyi ne Mukuu waretrenda kune nene newajondava kwa unyanja adahe ungheyeya minyaa usonge a antu.'' ²⁶ Mweri wa mutrandatu wa ndaa ama Elizabethi, Mungu akamukhanea malaika Gabrieli ende unge u Galilaya neukuetwa Nazareti, ²⁷ Kune muncha neare utureywe ikhomwa na mughosia nare ukoetranwa rina rakwe Yusufu. Mwenso are wa kinyamwango kama Daudi, na rina ra muncha uso ukoetranwa Mariamu. ²⁸ Akaja kune mwenso akamwera, ''Iramucho wewe ne wahanga mboto ne nkuu! Mukuu wayajiswa nave.'' ²⁹ Egwenso khani ya malaika ikamuhangenkania na atinamanya asike malaika wa hanya iramucho iyii ighenyi kune mwenso. ³⁰ Malaika akamukhanea, ''Utaoghofe, Mariamu, gusoko wahanga mboto ufuma kune Mungu. ³¹ Nakihenga ukuucha urito ukhateandaa ako ujofafa mwana. Nave ujomwetrana rina rakwe Yesu.' ³² Ujotrendeka Mukuu kuno ujoetwa mwana wa uyuo ne we nkunto ino. Mukuu Mungu ujomwafa itrumbe ra utremi rama Daudi tata wakwe. ³³ Ujotrawala unto ukinyamwango kama Yakobo khare na khare na utremi wakwe utriotrendeka wina mpeo. ³⁴ Mariamu akamwera malaika erei rejokighea kwa ure, soko nkee ntina oghowa na mughosia na umwe? ³⁵ Malaika akasocha akamukhanea, ''Mwahu ne mwero ukukusimia, kunto ako udaho wa uyoo newinkonto ino ujie unto ako. Soko mwero ne ujofafwa ujoetanwa Mwana wa Mungu. ³⁶ Na rava, munyandughu wako Elizabethi weuritro wa mwana kwa irika rakwe ra unyampaa. Uroyi ne mweri wa mutrandatu kune mwenso nare ukuetanwa mughumba. ³⁷ Gusoko kutrire ne reure ne kuurema kune Mungu.'' ³⁸ Mariamu akahanya, ''Kihengi nene ne mutrumwa wa kikhema wa Mukuu. Reki etrendeke ujii kune nene kuja na ukhani wako.'' Na malaika akatrunguya. ³⁹ Mungea matiku asaa, Mariamu akatrunguya rue akaenda unge aaitranto, unge ne unge a Yudea. ⁴⁰ Akaenda unyumba ama Zakaria akamuramucha Elizabethi. ⁴¹ Fanoi, ekandwaya kune Elizabeti ne wajotegheya iramocho rama Mariamu mwana akarima ufuma undaa ama Elizabethi na Elizabethi akakijua Mwahu ne Mweru. ⁴² Akareghetria kwa ruri ne ukuu, ''Akahanya ubarikewe wewe ino ufuma kwa akhema, na mwana ne uko ndaa ako ubarikewe. ⁴³ Na kusoko kee kune nene yiu wa Mukuu wane enoneye aje kune nene? ⁴⁴ Gusoko ravi nenatregheya umatrwe ane ruri wa iramucho kune veve, mwana undaa ane warima kwa lombwe . ⁴⁵ Na ubarikewe mukhema uyuu newahuvee ne mwenso ukighea trutre a mantu ayoo nare waharijie ufuma kune Mukuu.'' ⁴⁶ Mariamu akahanya, nkhoo ane emukurya Mukuu, ⁴⁷ na nkhoo ane ayanjaa kune Mungu Mutyoi wane. ⁴⁸ Gusoko waihenga mutrumwa wakwe wakekhema ne winyumpiye. Rava kwandia fanoi ufafo wownge ujo mwetana muforiwa. ⁴⁹ Gusoko mwenso me munyanguu watendie mantu makuu kune nene, na rina rakwe ne rieryeru. ⁵⁰ Na kehe kakwe kekikhaa ufuma ufafo na ufafo kwa awoya ne wamutregheye mwenso. ⁵¹ Waraghee nguu kwa mukhono wakwe; akavafaghatwa akuu nare wekinghonja unto ama haa unkhoo yawe. ⁵² Avawasimia fange ana wa atremi ufuma umatumbe awe autremi na uwahumbua untu awoyo nare wefange. ⁵³ Akawaikutia anya njaa kwa mantu ne naja, mwenso akawanjuncha aghware wekaenda mikhono metufu. ⁵⁴ Akamwereya mutumwa wake Israeli akumbukwe uraghea kehe ⁵⁵ (mwino wareghetiye kune va tata witu) kune Ibrahimu na ufafo wakwe khare na khae.'' ⁵⁶ Mariamu akakikhaa vina Elizabeti mwino meeri etatu vii mwenso akasuka ukhaakwe. ⁵⁷ Ikhondo nare rafika rama Elizabethi ukitrungua mwana wakwe mwenso akakitungua mwana wa keghosya. ⁵⁸ Anyafife wakwe na anyandughu wakwe wekatregheya mwino Mukuu wamekuria kehe kune mwenso, na veka yanja itamberemwe remwedo vinawe. ⁵⁹ Na itriku na munana venso wekaja umotoa mwana ihungu inoneye umwetrana rina rakwe, ''Zekaria, ''Kwa ukhwekeya rina rama tata wakwe, ⁶⁰ 'Egwenso nyinya wakwe akasocha na uhanya, ''Ntiuyi; mwenso ujio utaanwa Yohana.'' ⁶¹ Wikamukhanea, kutie mba umwendo udhughu yako neukue tanwa kwa rina rasee.'' ⁶² Veenso wekatrenda ndolyo tata wakwe ukufenja, mwenso are mwana aetanwe anyu. ⁶³ Tata wakwe akafenja kebao kuandekea na akaandeka, ''Rina rakwe ni Yohana.'' Wonge wekatraka kwa irei. ⁶⁴ Kinya hafo momo wake ukarughwerwa na ureme wakwe ukareghetria. Akareghetria na umukuria Mungu. ⁶⁵ Wova ukawahanga wonge ne wekikhaa, fife vinawe. Sayu iyei ekakitranantwa ungee onge na itrando ya Yudea. ⁶⁶ Na voonge ne wekategheya wekayaeka unkhoo yawe wekahanya, ''Mwana uyuii ujeutendeka we ure?'' Kusoko mokhono wa Mukuu are witrwmbere mwedo nayo. ⁶⁷ Tata wakwe Zekaria akakijuywa nguu ya Mwahu ne Mweru akafunya unghanga akareghetria, ⁶⁸ ''Akurwe Mukuu, Mungu wa Israeli, kusoko waareya na ulwa ukhomoi kwa antu wakwe. ⁶⁹ Wakuhumbweya ufembe wa ukhomoi mukhatre unyumba amutumami wako Daudi, ufuma itrambe re mwedo kuu ufafo wa mutumami wake Daudi, ⁷⁰ Mwino wareghetriye kwa Mwahu wa aghanga wakwe narewareyo mukhate aikhondo ra khare. ⁷¹ Ukukukhomoa ufuma kune arughu vintu na ufuma umekhomoa woghe newakuhwetre. ⁷² Ukutrenda vii uraghia kehe kune wa tata witu, na kukumbokwa iraghano lakwe ne rieru, ⁷³ irafiyo neakarehanya kune Ibrahimu tata witu. ⁷⁴ Akakirafea kwaumanya mwino inoneye umotumekea mwenso bila wova, mwino kw akhomowe ufuma u mikhono aarughu vitru. ⁷⁵ Munge uweru na trute usonge akwe matriku ituoonge. ⁷⁶ Na veve mwana, uju etanwa mughanga wa usuu ne ukunto ino, kusoko ujoenenda usonge a usui wa Mukuu adahe umoghonda neya njea, uwaghondaneya antu kusoko aisuka rakwe, ⁷⁷ uwafa umanyi wa antu wakwe vii, wajokhomowa kwa njia airekewa ra mahutie awe. ⁷⁸ Erei reudweya kusoko au vayii wa Mungu witu, soko ne yua rudweya unto rejoja, ⁷⁹ ueria kwa aivuu ne vikikhaa uktrii na mukhate amwere wa kuya. Ujotrenda vii mutrongeri wa meghuu itu unjea amajeghana.'' ⁸⁰ Na mwana usuu akakua akatrendeka munya nguu unkhoo na akakikhaa umbugha kune itriko rojokighea kwa Israeli.