¹ Paulo nari waja Derbe na Lystra; na rava, haphoo nari khwina mwanafunzi niukhuithwa Timoteo, ni muhumba niufhafhiwe na yiu wa Kiyahudi uyo ni mukhisu na thatha wakhwe ni Mgiriki. ² Antu vo Listra na Ikonia vikhamukhania ija. ³ Paulo akhamfenja ili vende vinakhwe, khwenso akhamuhoa na umukhurya khusokho a Wayahudi nari vikhukho sokho vong'e vikhamumanya thatha wawe ni Mgiriki. ⁴ Nari vinji vakhakhia u ng'ii na ufhunya nkhani u makanisa ili uyatii maragh'iyo asaya akhaandikhwa na athumami na anyampaa vo Yerusalemu. ⁵ Khwenso makanisa ikhaning'aniywa kwa imani na avoyo ni vaamini vakhakhiongeya kwa idadi mwithikhu. ⁶ Paulo na muyakhwe vikhaenda Firigia na Galatia, khusokho nkhoo a Mungu ikhavagh'iya uhanya ukhani khukho u jimbo la Asia. ⁷ Narivahumbia Misia, vakhasoya vendaBithinia, khwenso nkhoo ama Yesu ikhavagh'iya. ⁸ Khwenso vakhakhia Misia vaja fhakha ung'ii a Troa. ⁹ Ndothi ikhamudwiye Paulo uthikhu, ari khwina muntu wa Makedonia uimithie, akhamwithana na uhanya, "Njii mujukhuariya khunui Makedonia". ¹⁰ Paulo nari waona ndothi, hafho khukhakhiandaa uenda Makedonia, akhamanya khwenso Mungu wakhuithana kwendo a hubiri injili. ¹¹ Khwenso khukhahegh'a ufhuma u Troa, khukhaenda ithambi rimwe Samothrake, na ithikhu ninsambiye khukhagh'ea ung'ii a Neapoli. ¹² Ufhuma hafho khukhaenda Filipi khusokho ni imwendua ng'ii a Makedonia, ng'ii muhimu u wilaya na uthawala wa Khirumi na khukhakhi khaa mathikhu makheyi. ¹³ Ithikhu ra Sabato, khukhaenda unji a ruri kwa njia ya mto, ieneo neari khukhagh'emaniya khujuthendekha khwina ieneo rothendea marombi. Khukhakhikhaa fhang'i na urighitya na akhema nari vikhaja ithambi rimwedu. ¹⁴ Mukhema umwedu ukhuithanwa Lidia, munyorinji zambarau, ufhuma u ng'ii ama Tiatira, ni ukhumuromba Mungu, akhakhuthegh'eya, Thatha akhaminegh'ua nkhoo akhwe na uyikha ija nkhani nikhahanywa na Paulo. ¹⁵ Baada a ubatizwa, mwenso na nyumba akhwe ong'e, akhakhusiya akhahanya, "Mwese mwanyona nene ni mwaminifu khene Thatha, khwenso nuvasiya muhefee na ukhikhaa khene nene". Akhakhusiya ino. ¹⁶ Ikhathendekha khwenso nari khwinji ukhieneo kwa marombi, muncha umwedu nari wina pepo ro khumanya akhathana nasee. Akhamurethea thatha wakhwe dahwa nyingi kwa ukhisia. ¹⁷ Mukhema uyuyi akhamusambiya Paulo ithambi rimwe na sese ni ukhukhwa mukhindo na uhanya "Avai agh'osia ni athumami va Mungu ni mukhuu nivuvakhania nyenye nkhani ya wokovu". ¹⁸ Akhathenda uyi kwa mathikhu mingi, khwenso Paulo nari wahurisywa na ntendo iyii, akhakhikhengeya unyuma na umwira pepo, "Nukhuamuru khwa rina rama Yesu umuhegh'ee mung'ii akhwe na mwenso akhahegh'a na umurekha ithambi rimwe. ¹⁹ Mabwana vawe nivajoona ya kuwa tumaini ra faida awe rahegh'aa, vakhavakhwatha Paulo na Sila na uva uthutha usokhoni unsonge a anya mamlaka. ²⁰ Narivavagh'eya umahakimu, vakhahanya, "Avai agh'osya ni a Wayahudi na vusababisha ghasia nkhuru ufhuma ung'ii ithu. ²¹ Vusomisya nkhani ni nti ya sheria sese uifhokhea uisambiya khinya Warumi." ²² Umati ukhavaukhia kinyume Paulo na Sila, mahakimu vakhahafhua masaa awe na uvaywiya na uamuru vakhuwe makhotya. ²³ Baada okhuwa makhotya mingi, vakhavaghumia ugereza na uvaamuru askari vo gereza uvalinda ija. ²⁴ Khwenso ne vafhokhea iragh'iyo risiyi, askari wa gereza akhavajugh'utha uchumba kha mung'ii a igereza na uvathunga mighuu awe u ieneo nariuvaikhie. ²⁵ Muda wa uthikhu wa manane, Paulo na Sila ari vuromba na uimba nyimbo yo musifu Mungu, khunu athungwa vangi vavathegh'eye, ²⁶ Ghafla khukhatokea ukhakhatho ukhuu na misingi a gereza ikhahingiswa, nduri yo gereza ikharugh'ukha na minyororo a athungwa vong'e ikhahogh'ohywa. ²⁷ Mulinzi wa igereza akhaukha ufhuma uthuo na akhaona nduri yong'e ya gereza irugh'ue, khwenso akhahoa ufanga wakhwe na akhasigh'a ukhiuragh'a khusokho akhagh'ema athungwa vong'e vathokhaa. ²⁸ Khwenso, Paulo akhakhwa mukhindo kwa ruri ni ukhuru akhahanya, "Uthakhidhuru khusokho song'e khwi hafhai." ²⁹ Mulinzi wa igereza akharomba thaa irethwe na akhahefhea unyumba a igereza kwa haraka, ni ukhukhakhatha na uthija, akhavagwira Paulo na Sila, ³⁰ na uvafhunya unji a igereza na uhanya, "Akhuu, nithendentuni ili nidahe uokhoka?" ³¹ Na uvakhania, "Mwamini Thatha Yesu na ujuokoka ithambi rimwedu na nyumba akho." ³² Vakhahanya nkani yama Thatha khene mwenso ithambi rimwe na antu vo khakhwe, ³³ mulinzi wa igereza akhavahoa uthikhu ururo na uvaoya maeneo nivavare, mwenso ithambi rimwe na antu vyo khakhwe vakhabatizwa mara. ³⁴ Akhawatha Paulo na Sila ukhakhwe na uvathengea maliwa. Na mwenso wathendekha wina furaha ni nkuru ithambi rimwe na antu vokhakhwe khusokho vakhamwamini Mungu. ³⁵ Neari mumwi, mahakimu vakhathuma ukhani khene mulinzi wa igereza vakhahanya, "Varekhee vong'e vende", ³⁶ Mlinzi wa igereza akhamukhania Paulo unto a nkhani iyo ya kuwa, "Mahakimu vakhathuma ukhani niruhusu mufhwaye: Khwenso fhumi unji na mwende kwa imani." ³⁷ Khwenso Paulo akhavakhania, "Vakhakhukhwa hadharani, antu ni Warumi bila ukhuhukumu na vakhaamua ukhuju gh'utya ukhigereza; halafu fhanoi vusigh'a ukhufunya khwa siri? Khuthiri ithuwezekhana venso vayo vajo khufhunya hafhai." ³⁸ Alinzi vakhavakhania mahakimu unto a nkhani iyoo, mahakimu vikhathija ino afoyo ni vajomanya kuwa Paulo na Sila ni Warumi. ³⁹ Mahakimu vakhaja na uvasiya vafhume, na reva jovafhunya unji a igereza vakhavaromba Paulo na Sila vafhume unji a ng'ii awe. ⁴⁰ Khwenso Paulo na Sila vakhafhuma unji a igereza vakhaja ukhaya ama Lidia. Paulo na Sila nivajovaona anyandugh'u, vakhavatia nguu na ufhwaya u ng'ii isiyi.