¹ Kwa njea eyei, nyenye nechu, mwakhema a mwonge kifunya kwa aghosia vanyu aghonjo, nechu na mpese vange vawe vatina uyanja ukwami, ukeera ntendo ya khema vawe vadahite urutwa nekutie ukhani, ² kusoko veso aghonjo veutendeka vajionaa ntendo yanyu ne njinja itambe na mwighuyo. ³ Eyei etendeke tikwa woghe wa kunji --- usuka njee, thamani asahabu, na ujaa ra mayao a mtindo. ⁴ Nyeso hiya ayo etendeke kwa untu wa munge wo nkhoo, na ukhemeya khati auija wo ughofa na uhava unkhoo, nechu wa nguu usonge a Mungu. ⁵ Kusoko akhema ne aeru chwe vekakiora aghonjo kwa njea eyei, evina uhuvei khati a Mungu na vekavareja aghohi vawe aghonjo. ⁶ Kwa njea eyei Sara ahamteja Ibrahimu no mwetana mweso ''mkuu''wakwe. Nyenye famoi ne vana vakwe mbese mtende ne maja na mbese mtiuteja ne mave. ⁷ Kwa njea eyeyo eyeo, nyenye aghosya mnoneye kekhaa na akhema vanyu samumanyie, ne veso ayanyu ne akhema ne vatiwanguu, ne nesavamanyie veso ne kuya anyofokea anyanyu va mboto a ufanga. Tendi vii nechu marombi anyu ataemewe. ⁸ Umpeo, nyenye nyonge, tendeki mwina ihaa rimwe, ne mwina uvai, uyanjo hinya anyandughu, ategheyi na afoo. ⁹ Mtarefe uvee kwa uvee, na ituki kwa ituki. Kinyume kayo, mfwwaeye uongeyaa kusoko eyei mwaetaniwe nechu mdahe usa mboto. ¹⁰ ''Wasuu ne ukusegha uyanja ufanga no uona utiku ne vija enoneye awemie ureme wakwe kene uvee na meomwo akwe ureghetya ivee. ¹¹ Na akihengeye na ureha ne mavee na utenda ne maja. Afenje majeghana no yambeya. ¹² Miho amkuu eumwonaa muya tute na matwe akwe eutegheya maombi akwe. Nyeso usio wa mkuu we hiya na avoo ne veutendaa ne mavee.'' ¹³ Ne anyu neujomruanga nyenye, nesa msehete ne rijaa? ¹⁴ Nyeso ne mbese mkhaseke u tute, muongejwa. Mtaoghete ayoo nechu veso veuyaoghofaa mtatendeke mwina wovaa. ¹⁵ Bahu ayo, mumueke Kreso mkuu u nkhoo yanyu kinya mfoo. Muiche mtendeke mwifunyiye umsucha mumntu ne ukumuweya nyenye ntuni ne mmerindie kene Mungu. Tendevii kwa ufoo na mwighuyo. ¹⁶ Mtendeke mwina maghemo ne moja nechu antu neveutuka mikhao anju ne meja kene Kreso, vadahe uiraa minyaa kusoko veuteghelya hiya khati anyu nechu mtendaa mavee. ¹⁷ Ne huja nanguu, nechu Mungu asighete, nechu mwakhasekaa kwa utenda ne maja tiwese kwa utenda ne mavee. ¹⁸ Kreso no akakhaseka mhinjo umwe kusoko a mahutye. Mweso nechuwina tute akakhaseka kusoko itu nechu are kutianya tute, nechu akurete sese kene Mungu. Akakuya umwere nyeso ahatendwa mfanga unkhoo. ¹⁹ Khate ankhoo, akaenda no itanatya nkhoo iyio nechu fanei yo kitungo. ²⁰ Eitikweti witegheyi ikhondo ne uguimeyi wa Mungu neare urindie ikhondo ama Nuhu, itiku ro ujenga ra safina, na Mungu akakhomoa emtu ahei ufanga ve mnana ufuma umaje. ²¹ Eyei ne nkhori auoywa neumkhomoa nyenye fomoi, ti kinga uoya ikhwe ufuma umwere, nyeso kinya iombi ra nkhoo ne njeni kene Mungu, ukeera ufetye wama Yesu Kreso. ²² Mweso urefo umkwono wa kilelo wa Mungu. Wendie kirunde. Maleeka, udaho, na nguu ni nyoenye imtegheye mwenso.