¹ Yesu agendele muchima che mizaituni. ² Namweja katondo naja Lindi muyekalu, na bhanu bhona nibhamulubha neyanja nabheigisha. ³ Abhandiki na Bhafarisayo nibhaleta omugasi unu bhagwatile mu bhulomelwa. Nibhamutula agati. ⁴ Niwo nibhamubwila Yesu ati, "Omwiigisha, omugasi unu bhamugwata mubhulomelwa, ⁵ Woli, echilagilo cha Musa achilagiliye okubhalasa amabhui abhanu lwa bhanu, owaika kutiki ingulu yaye? ⁶ Bhaikile ago okumusaka koleleki bhabhone omusango gwo kumubhula, nawe Yesu nenama asi nandika kwe Chala chaye. ⁷ Bhejile bhagendelela nibhamubhusha, nemelegulu nabhabwila ati, "Oyo atali na chibhibhi kwimwe, abhe wa kwamba okumulasa amabhui." ⁸ Nenama lindi asi, nandika kwe Chala chae. ⁹ Bhejile bhongwa ago bhagendele oumwi no undi okwambila kumukaluka. kubhutelo Yesu nasigalao enyele ela, amwi no mugasi aliga agati yebwe. ¹⁰ Yesu nemelegulu nabhabwila ati, "Omugasi, abho abhakusitaka bhalyaki? Atalio nolwo umwi oyo kamulamula?" ¹¹ Naika ati," Atalio nolwo umwi Lata bhugenyi." Yesu naika ati, "nolwo anye nitakulamula. Genda njila yao okwambila oli no kugendelela utakola chibhibhi lindi." ¹² Lindi Yesu naloma na bhanu naika ati, "Anye ni bwelu bwa isi; oyo kandubha atakulibhata muchisute kabha no bwelu bwo bhuanga." ¹³ Abhafalisayo nibhamubwila ati, Owibhambalila omwene; obhubhambasi bwao bhutali bwe chimali." ¹⁴ Yesu nasubya nabhabwila ati, "Nolwo nikebhambalila omwene, obhubhambasi bhana ni bwe chimali. Enimenya eyo enisoka niyo enigenda, nawe emwe mutakumenya eyo enisoka neyo enigenda. ¹⁵ Emwe omulamula chinyamubwili; Anye nitakulamula ona ona. ¹⁶ Anye nolwo nikalamula, obhulamusi bwani ni bwe chimali okubha nitali wenyele, nawe nili na Lata oyo antumile. ¹⁷ Nikwo nebhilagilo byemwe byandikilwe ati obhubhambasi bwa bhanu bhabhili no bwe chimali. ¹⁸ Anye enibhambalila, na Lata oyo antumile kambambalila." ¹⁹ Nibhamubwila ati, Lata wao alyaki?" Yesu nasubya ati, "Anye mutakumenya nolwo Lata wani mutakumunyenya mwakasangile nimumenya anye mwakamumenyele na Lata wani. ²⁰ Aikile emisango ejo Ali ayei need chibhikilo awo aliga neigisha mu yekalu, na Atalio nolwo umwi oyo amugwatile ku kubha omwanya gwae gwaliga guchali kukinga. ²¹ Mbe nabhabwila lindi ati, "Nagenda jani; nawe mulinyenja na mulifwila mu bhibhibhi byemwe. eyo enigenda, mutakutula kujayo." ²² Abhayaudi nibhzika ati, "Kajaokwiita omwene, okubha aikile ati, 'eyo enigenda mutakula kujayo'?" ²³ Yesu nabhabwila ati, "Omusoka emwalo; anye enisoka injulu. Emwe ni bha isi inu; anye ntali wa isi inu. ²⁴ Kulwejo, nabhabwila ati mulifwila mubhibhibhi byemwe. mwikilishe okubha ANYE NIWE, omufwa mu bhibhibhi byemwe". ²⁵ Kulwejo nibhamubwila ati, "Awe niga?" Yesu nabhabwila ati, galiya nabhabwiliye ku bwambilo. ²⁶ ninajo emisango mwafu ejokuloma no kulamula ingulu yemwe. Nolwo kutyo, unu antumile ni we chimali; ne misango ejo nonguwe okusoka kwemwe, ne misango ejo enijaika mu si; ²⁷ Bhatamwelewe ati aliga naika nabho eja Lata. ²⁸ Yesu anaika ati, "mukamuyanika ingulu Omwana wo munu, awo mulimenya okubha ANYE NIWE, na ati nitakukola lyonalyona kubwani any akabha Lata anyiigisishe, enaika emisango jinu. ²⁹ Unu antumile ali amwi nanye, nomwene atakusiga wenyele, bhuli katungu enikola agoagamukondela." ³⁰ Omwanya Yesu naika emisango ejo abhafu nibhamwikilisha. ³¹ Yesu naika ati kubhaliya Abhayaudi abho bhamwikilisishe, "Akabha mukeyanja misango jani, ndiwo omubha bheigisibwa bhani bhechimali, ³² Emwe mulimenya echimali, ne chimali chilibhatula mumulabho." ³³ Nibhamubya ati, "Eswe ni lwibholo lwa Ibrahimu na kata chichaliga kubha asi yobhugaya bhonabhona owaikaki, "Echitulwa muchilabho?" ³⁴ Yesu nabhasubya ati, "Nichimali, nichimali enibhabwila ati, oyokakola echibhibhi ni mugaya we chibhibhi. ³⁵ Omugaya atakwiyanja munyumba mwanya gwona; Omwana kekala siku jona. ³⁶ Kulwejo, akabha Omwana akabhatula muchilabho, omubha muchilabho chimali kata." ³⁷ Enimenya ati emwe ni lwibholo lwa Ibrahimu; omundonda okunyita kulwa injuno yo musango gwani gutana mwanya agati yemwe. ³⁸ Enaika amagambo ganu nalolele amwi na Lata want, emwona abhene omukola amagambo ganu mwonguwe okusoka kwi esomwana wemwe." ³⁹ Mbe nibhamubya no kumubhwila ati, "Lata weswe ni Aburamu." Yesu nabhabwila ati, "Chisanga muli bhana bha Aburamu, mwakakolele emilimu ja Aburamu. ⁴⁰ Nolwo olyanu omuiga okunyita, omunu unu abhabhwiliye echimali ati nonguwe okusoka ku Nyamuanga. Aburamu atakolele kutyo. ⁴¹ Omukola emilimu je somwana." Ni bhamubhwila ati, "Chitebhuwe mubhulomesi, China Lata umwi, unu ali Nyamuanga. ⁴² Yesu nabhabwila ati, "Akabha Nyamuanga ni Lata wemwe, mwakanyendele anye, okubha nisokele ku Nyamuanga; okubha nitejile kubwani, nawe unu antumile. ⁴³ Kulwaki mutakungwila emisango jani? kwokubha mutakutula kwikomesha okungwa emisango jani ⁴⁴ Amwe ni bha esomwana wemwe, shetani, no mwenda okujikola okuligila eje somwana wemwe. okwimilegulu muchimali kwo kubha echimali chitalimo kwimwe. Akaloma olubhei, kaloma okusoka mukatungilwe kaye okubha ni mubhei ne semwene nimubhei. ⁴⁵ Nolwo woli, kwo kubha enaika ebye chimali, mutakunyikilisha. ⁴⁶ Niga kwimwe unu katula okumbambalila ati ndine chibhibhi? akabha ninaika ebye chimali, kubhaki mutakunyikilisha? ⁴⁷ Unu ali Wanyamuanga kongwa emisango ja Nyamuanga; emwe mutakungwila kwo kubha emwe mutali bha Nyamuanga." ⁴⁸ Abhayaudi nibhamubya nibhamubwila ati, chitaikile echimali kubha awe ni Musamalia na una lisambwa?" ⁴⁹ Yesu nasubya ati, tali nesambwa; nawe enibhala Lata wani, nemwe mutakumubhala. ⁵⁰ Nitakuyenja likusho lyani; alio umwi unu kayenja no kulamula. ⁵¹ Nichimali, chimali, enibhabwila ati, unu kagwata omusango gwani, atalibhona lufu kajanende." ⁵² Abhayaudi nibhamubya ati, "Oli chamenya ati uli no musambwa. Abrahamu na bhaligi bhafue; nawe owaika ati, 'Akabha omunu atakugwata omusango gwani, akulabha lufu.' ⁵³ Awe utali mukulu kukila Lata weswe Abrahamu unu afuye, na bhalagi ona bhafuye. Awe owikola kubha niga?" ⁵⁴ Yesu nasubya ati, "Akabha nikekusha nenyele, okwikusha kwani ni kwa kutyo ela; ni Lata wani niwekankusha - onu omwaika kubha Nyamuanga wemwe. ⁵⁵ Emwe mutamumenyaga omwene, nawe anye nimumenyele omwene. Akabha nikaika ati,'nitakumumenya,' enijosusana nemwe, bhanu omubheya. Nolwo kutyo, nimumenyele nemisango jaye nijigwatile. ⁵⁶ Lata weswe Abrahamu akondewe okulola olusiku lwani; nalulola nakondelelwa." ⁵⁷ Abhayaudi nibhamubwila ati, "uchali kumala mwaka makumi gatanu awe umulolele Ibrahimu?" ⁵⁸ Yesu nabhabwila ati, "Nichimali, chimali, nabhabwila ati, Abrahimu achali kwibhulwa, ANYE NDIO." ⁵⁹ Mbe nibhagenda amabhui bhabhone okumubhuma, nawe Yesu neibhisa nauluka mu yekalu.