¹ Kutambule yani gua? kulongoleke ku milandu ukende wongeleke? ² Aaa. Ishee nakukiie mu milandu, kusumilei kanki kukikala ku nyaso? ³ Mbii sikamulingile kina ioo naliabatisigue ku Kilisito aliabatisigue ku nkia yakue? ⁴ Alikuaikue palumui nunduyo kukilila ubatizo ku nkia. Iyii alitendekile kina iyo u Kilisito nalimuukigue kupuna munkia kukilila ukuligua waki Tata, kina ishee kusumue kugenda ku upia wa ukalii. ⁵ Ndogolelio anga kuakamantanigue palumui nunduyo ku mpiani nya nkia yakue, gaa kukikamantanigua ku ukunukulu ⁶ Ishee kulingile itii, untu witu wa kalii aliwangikue palumui nunduyo, kina mwili wa milandu wononue. Iyii alipuniile kina kulekiyendelela kutula wa milandu. ⁷ Mwene nalukile mutendue muna haki kuliganila ni milandu. ⁸ Lakini kina kuakia palumui nu Kilisito, kusuilile kina kukakikala palumui nunduyo gaa. ⁹ Kulingile kina Kilisito muiulue kupuna kua akii, ni kina sika mukii kankii. Kifo sikakyukumutema kanki. ¹⁰ Ndogolelio ku mpola nya nkia nalukile ku milandu, alukilee nkua imui kunsooko ya tulu. Sunga, ukalii nukalile, ukalile kunsooko. ¹¹ Ku nzila iyo iyo, nininye gaa yumujipiile kukialia kutula akii ku milandu, bali mpanga ku Mukungile ku Kilisito Yesu. ¹² Kunsooko nyaso ulekigombia milandu itemee mwili wako kusudi usume kukuzitiata isula zakue. ¹³ Ulekipunia inandii za mwili wako ku milandu kina isheme naigila kahaki, iyo ipunie ninye ku Mukungile, kina naapanga kupuna kuukii. Na zipunii nandii za miili yani kina isheme ya haki kuaki Mukungile. ¹⁴ Mulekigombia milandu yumuteme. Kunsooko sika muili pansii ya shalia. ¹⁵ Yani gua? kutende milandu kunsooko kukutilii pansii ya shalia, bali pansii ya ukende? aaa. ¹⁶ Sikamulingile yakina kumuakue mwene namukipunia ninye kina itumii mwene inyee mutula itumii akue, Mwene yumujipiile kukumutiata? Iyii ingii kulukulu sunga kina inye ingi asese ku milandu nitualilaa inkia, hau asese a utiatili wa haki. ¹⁷ Lakini wasongeligue u Mukungile! kunsooko ali muasese aa milandu, lakini muatiata kupuna mumioo iyoo namna ya manio namuapegue. ¹⁸ Muatendagua huru kupuna ku milandu, na muatendagua asese a haki. ¹⁹ Nilikitia kina muntu kunsooko ya uneketu wa miili yani. Ku ndogolileo kina iyoo nalimupunilie iyungo ya miili yani kutula asese ku ushapu nu udobu. kunsooko iyo iyo, punie iyungo ya miili yani kutula aa haki ku weligua. ²⁰ Kunsooko kinali muasese aa milandu, alimuihuru kulii ni haki. ²¹ Ku tungo lyaso, alimutiite nkalii nyii ku mantu nami tungo ilii muyona nsoni kumaso? kunsooko mapunilo ma mantu maso ingi nkia. ²² Lakini kunsoko inoo muatenda huru kulii na milandu na muatendeka asese kuaki Mukungile, mutite nkalii kunsooko ya weligua. Punilo ingi upanga wa kalii na kalii. ²³ Kunsooko mushala wa milandu ingi ukii, bali zawadi ya nkanda nyaki Mukungile ingi upanga ku Kilisito Yesu Shekulu witu.