¹ Paulo, muitumi waki Yesu Klisito, nalimuite kutula muitumi, nu kutemanulua kunsooko ya mpola zaki Mukungile. ² Iiyii yaii impola iyo nalumiaidile ikalii kukilila manabii akue kumandiko namelu. ³ Nu kuhusu muana wakue, nalimulelue kupuna lulii luaki Daudi kunamna ya mwili. ⁴ Mwene alimutanantigue kwa muana waki Mukungile ku ngulu yaki muau muelu ku wiulua wa akii Yesu Kilisito Shekulu witu. ⁵ Kukilila mwene kuasingila ukende nu witumi ku utegelii wa usuili katia ya nsii tulu, kunsooko ya lina liakue. ⁶ Kati a ya nsii izii, inie gaa muiitue kutula muaki Yesu Kilisito. ⁷ Balua iyii ingi ku tulu naili ku Lumi, nalogue nu Mukungile, naliitue kutula kutula antu eluu. ukende na utule kumiani, ni amani kupuna kuaki Mukungile Tata witu nu Shekulu Yesu Kilisito. ⁸ Kuandia, numusongilie Mukungile wane muaki Yesu Kilisito kunsooko yani tulu, kunsooko usili wani utanantigua mu unkumbigulu tulu. ⁹ Ku ndogolelio Mukungile ingi shuda wane, nanukumutumikila ku nkolo yaneku mpola ya muana wakue, nikina nkikita kukuatea. ¹⁰ Matungo mensi nilompa ku sala zane kina ku nzila yensi ndigie mpeleleko kutula usaii inono ku ulowa waki Mukungile kua kuiza kumiani. ¹¹ Ndogolelio ntite nsul aya kumuona, ndigie kukumupela inie kalama nkei za munkolo, ndigie kukumukamia. ¹² Yaani, nilailaa kupegua moo palumui nininye, ku nzila nya usuili wa kila umui witu, wani ninyane. ¹³ Ino antu, sinsiilie muulie kulinga kina, nkua ningi nitaka kuiza kumiani, lakini numugiligue mpaka itungo ilii. Alinsiilie itii kutula ni nkalii kumuiani kina yilii gaa muakatia mui antu a nsii. ¹⁴ Nidaigua ni Ayunani ni agenda gaa, asugu ni alele. ¹⁵ Kululo, ku upande wane, ine nkoli nakondaa kutanantia impola kumiani gaa nininye namuili kuaso ku Loma. ¹⁶ Kundogolelio sikanikizimionela nsoni impola, kunsooko ingi usuumi waki Mukungile naukuleta ugunua ku kila nukusuilaa, ku Myahudi kuandia ku ku Myuanani gaa. ¹⁷ Kundogolelio haki yaki Mukungile yalagilagua kupuna usuili sunga usuili, kina nayandikue, "muna haki ukakikala ku usuilli." ¹⁸ Ndogolelio ikuo liaki Mukungile ndagilue kupuna kugulu ku utiulianu udobu tulu wa antu, uwaso kunzila ya uzalimu ukupisa ikulukulu. ¹⁹ Iyii ingi kunsooko, tulu namasumile kukumazuka kyanya yaki Mukungile ingi kualie kumiao. Ndogolelio Mukungile walingagia. ²⁰ Ndogolelio mantu makue nasikamigiile izaa matla kualie kupuna kuyumbua unkumbigulu. Malingikile kukilila intu naliiyumbue. Mantu igaa ingi usuumi wakue wa kalii na kalii ni yukii lia ukungile. Mapunilo makue, antu iaa agila nsooko. ²¹ Iyii ingi kunsooko, ingawa alialingile kuhusu Mukungile, sikanamukulia umwene kina Mukungile, wala sikanamupela kishongelio. Badala yakue, atulaa anaulu ku masiigo mao, ni mioo yao nitiite ulele niikilua kiiti. ²² Aliiitile kina ingi asugu, lakini natula anaulu. ²³ Naaukaila u utukufu waki Mukungile namugila kaononi ku mpiani ikyelu liaki lia muntu na mononi, ni lia nonii, lia nimuu za migulu inii, ni lia iyumbe nayukuagula. ²⁴ Kululo Mukungile aliwalekile atiate insula za mioo yao ku ushapuu, ku miyili yao kuligua nsoni ktaia yao. ²⁵ Ingi aoo naliakaile kulukulu yaki Mukungile kutla ulongo, na aliakukulagia nu kutumikila iyumbe badala ya muumbi, nuakukuligua kalii na kalii. amina. ²⁶ Kunsooko iyii, Mukungile atiate nsla zao za nsoni, kunsooko asungu aoo nakaila utumilii wao wa yukii ku ikio nakisia ni yukii. ²⁷ Iyo, agosha gaa naleka utumilii wao wa yukii ku asungu nu kyakilue nsula kukila iene akola. Iaa alii agosha naliatendile ni agosha iaa nasika majipiile, ninali asingile ilango nalilijipiile upugamukii wao. ²⁸ Kunsooko nasitaa kutula nu Mukungile ku ulingii wao, nualekaa atiatee masala mao nasika mazaa atende mantu igo nasikamazaa. ²⁹ Ijulue nu uzalimu tulu, udobu,nsula nu ubii. Ijulue nu wilu, uulagi, wilea, ukonganii, ni nia nambii. ³⁰ Iene gaa ingi ateketii, atungia, na amuipilue Mukungile. Naitiite munomo, kisipili, nu wiketii. iene atunga mabii, na sika akutegela alelii aoo. ³¹ Ioo agila ulingii: nasikaasuilikile, agila kaulowa wi yukii, na agila kakinishungu. ³² alingile ikanuni zaki Mukungile, ya kina antu nakutendaa mantu ma namna nyaso ijipiile nkia. Lakini sika du itendaa mantu maso, ioo gaa ikigombia ni ndioo naitendaa mantu maso.