¹ Pembele, antua, kukumupela umoo nu kukumupepya kwaki Yesu kilisito. kinali mupokelile malagilyo kupuna kumwitu namna kinaijipiile kuyenenda nu kukumulogelya Mukungile, ku nzila nyaso gaa mwenende nu kutendaa kukyila. ² Kululo mulingile ingii malagilyo kii nalikumupiile kukyilila u Shekulu Yesu. ³ Kululo igaa maga mawilogwa maki Mukungile; uweligwa wani -kina mwipuge nizinaa, ⁴ Kina kila umui wani ulingile namna nya kutemaa mukiima wakwe mwene ku weliligwa ni heshima. ⁵ Ulekitula nu mukiima kwa ajili ya nsula za mwili( kina anansii nasikaamwizi u Mukungile). ⁶ Walekitula ukolii muntu wensi nukipuuta mimpaka nu kukumukosela umuntua wakwe kwa ajili ya kintu ikii. kunsooko Shekulu mwene muna kulipilya igundo ku mantu tuluigaa, kina nalikutongile kukumulanga nu kushudila. ⁷ Kunsooko Shekulu sikalukwitile ku ushapuu, bali ku weligwa. ⁸ Kululo nukulisiita ilii sikukiasita ka antu, bali ukumusiita Mukungile, nukumupeela umuau mwelu wakwe. ⁹ Ku ulowa wa antua, kutilii kahaja ya mmuntu wensi kukukwandikila, kunsooko mwamanagigwa nu Mukungile kukilogwa ninye kwa ninye. ¹⁰ Taii, alimutendile igaa tulu kw antua nailii ku Makedonia tulu, lakini kukumupepya , antua, mulekitenda sunga nu kukyilikila. ¹¹ Kukumupeepya muligye nsula kukikala ukalii wautulu,kukeela imilimo yani, nu kukituma milimo ku mikono yani, kina nalikumulagililye. ¹² Itumii igaa ili musume kuyenenda izaa nu ku heshima ku aso naili kunzii ya usuili, ili ulekikepelwa nu uhitaji wensi. ¹³ Sikakutakile inyee mulinge nasika kulukulu, inyee antua, kyanya ya aso nagonile, ili mukizi tulu kinishungu kina naingi nagila ka utaii kuhusu tungo nalijile. ¹⁴ Kina kusuilile kina Yesu alukiile nu kuiukaa kankii, iyoiyo Mukungile ukakumuleta palumui nu Yesu aso nagonile nkia ku mwene. ¹⁵ Kwa ajili maso kukumuila inyee ku lukani lwaki Shekulu , kina ishee nakwapangaa, kinakakukolii tungo lya kwiza mwene Shekulu, taii sikakukakwatongela ioo nagonile nkia. ¹⁶ Kunsooko Shekulu mwene ukitima kupuna kumalundee ukiiza nu luli lukulu, palumui nu luli lwaki malaika namukulu, palumui nu palapanda yaki Mukungile, nindiio naliakiile ku kilisito ikiiuka kwandia. ¹⁷ Kangi ishee nakwapangaa, nakusagile, kukikamantana ku malundee palumui nindio kukumupokela u Shekulu kukyanya,ku nzila iyii kukitula nu Shekulu ntondo tulu. ¹⁸ Kululo, mwipolelye ninye kwa ninye ku nkani izii.