¹ Paulo, Silwano nu Timoteo ku kanisa lya Asesalonike ku Mukungile tata nu Shekulu Yesu kilisito. neema nu usuili utule nininye. ² Kwipunia songela kwaki mukungule kila tungo kunsooko yani tulu, tungo kinakukuatea mu malompi miitu. ³ Kumijukile bila kupela ntongela yaki Mukungile nu tata wiitu mulimo wani wa usuili, ukamu wikazanya wa ulowa, nu wiumatilya nautite ugimya kunsooko ya pembele kwaki Shekulu Yesu kilisito. ⁴ Antua namwalogwe nu Mukungile, kumanile uwitwa wani, ⁵ Ni kina injili yitu naliyizile kumwani sika kulukani du, bali gaa ku ngulu, ku muau mwelu, nu ku utai. ku namna nyaso, mumanile gaa ishee alikwi antu kii mumwani ku kunsooko yani. ⁶ Alimwi antu akukuiga ishee nu Shekulu, kina nalimusingile lukani ku lwago ku ulumbi naupunile kwaki muau mwelu. ⁷ Ni nakipunile kyakwe, namutula mpyani ku tulu ku Makedonia nu Akaiya na asuili. ⁸ Kululo kupuna kumwani lukani lwaki Mukungile lukumazukile pensi, na sika kwa Makedonia nu Akaiya ung'ene mwene. Badala yakwe, ku kila luandii usili wani ku Mukungile ukumazukile pensi. ⁹ Kululo ienee enee ipunia mpola wizilo witu aliwii katia yani. ishimulila kinali mumupulukiile u Mukungile kupuna ku sanamu nu kukumutumikila Mukungile nwihai ni nkangi wakulukulu. ¹⁰ Aliapunilye mpola kina mumulindile mulisha wakwe kupuna kugulu, nalimwiulwe kupuna kwa akii. nu nduyu ingi Yesu, nukukuika hulu kupuna ku kuo nalijile.