¹ Bhwo shakinda shisho ngashibona tesha umulyango ghwighuka kumwanya nishu lila ilyakwanda lyo ngalipulika uti lishu lya ngangabhwite jyikujyugha nune jyikuti, kwela mpaka kuno nune itingulangishe sho ndishi kabhe kwolinga shakinda isho.'' ² Papo naghite nabha mwambepo, tesha ichitengu cha bhunyafyale chibhikighwe kumwanya jyumo ikile pamwanya pahitengu chicho. ³ Ghwepe jyo ikalile akabhoneka akoline ni jyondo lya jyaspi nu akiki, nu mpingo pingo ghwafula ghukachishungulila ichitengu chila icha bhunya fyale, ghukakolana ni zumaridi. ⁴ Fyope nilitengu amalongo mabhili na tuna fikachishungulila ichitengu chila icha bhunya fyale, pamwanya pa fitengu fila ngabhabona abhakulu bha fipanga amalongo, mabhili na tuna bhikalile bhabhafwashishe inyenda imyechu mwope muntu jyabho bhakabha ni ngigha ijya sababhu. ⁵ Pope pachitengu chila icha bhunyafyale pakufuma amaghesi nishu ilya lulundumo ninyale tuhano na tubhili isha mulilo shikabha kundashi kula kuchitengu cha bhunyafyale shosho ndumbu tuhano na tubhili isha Chala. ⁶ Kundashi kuchitengu cha bhunyafyale, chila kukabha ni chifwani cha nyanja jya libhonelo uti lighalasi pope pakati pachitengu chile icha bhutwa na mumbafu mwoshi muchitengu chila, fikabhamwo ufyumi fina bhiswile amaso kundashi nakunyumba. ⁷ Ghwepe nghwa ghwumi ughwa kwanda akabha chi fwani cha ngajamu, ghwape nghwa bhwumi nghwa bhubhili akabha chi fwani cha kaghwata ghwepe ughwa bhwumi ughwabhutatu akabha ni cheni uti cheni cha mundu ghwepe ughwa bhwumi ughwa bhwua akabha chifwani cha muswanga ghwa ghawukupuluka. ⁸ Fyope ifwumi ifi fina kukuti jyo akabha nifipapande tuhanu na kamu fikabha namaso mwoshi mwoshi munyuma na mukati sona bhata kutusha oamusi na pabhushiku, bhakuti umwelu umwelu, umwelu umutwa Uchala, ughwa maka ghoshi, jyo akabhakwo jyo alikwo jyo iti akise.'' ⁹ Bhope abhabhwumi ghwo bhakumpa umwene jyo akwikala pamwanya, pailitengu cha bhutwa, ubhwehi nubhwimikighwa, nulupalisho jyujyo mwami bhwila na bhwila, ¹⁰ Popo abhakulu bha fipanga bhabho amalongo mabhili na tunabhakughwa pandeshi pake jyula ikile pamwanya pachitengu chila icha bhutwa bhope bhakumwiputa jyujyo mwumi bhwila bhope bhakutagha ingigha shabho mundashi muchitengu chila icha bhutwa, bhakuti, ¹¹ ''Ubhaghile ughwe mutwa ghwitu na Chala ghwitu ukwambilila ubwelu nu bhwimiki ghwa na bhubhaghile papo ghweghwe ukafipela ifindu fyoshi, kunongwa jya bhwighane bhwako fikabhakwo fyope fikapelighwa.''