¹ Ni akavaha kwawu, "Hakika nivaha kwinu,baazi yinu vavi vandu vavayemiki pambani ngavawonji mauti kabula yi kuuwona ufalumi waka Chapanga uhika kwa makile." ² Ni baada yi machova sita,Yesu akavatoloki Petro, Yakobo ni Yohana papamu ni yombi ku chitombi, kanjika yawu. Ndipo akatumbu kughanambuka palongi yawu. ³ Malaya yaki yikatumbu kung'anya petu, meupe nganila, meupe kupeta mung'alishaji yokapi duniani. ⁴ Ndipo Eliya papamu ni Musa vakapitali kulonge yawu, ni vakavi valonge ni Yesu. ⁵ Petro akayanga akampwaghila Yesu," Mwalimo, ni vyema tepani tivya pambani, ni tuchenga hipanda hitato, chimu kwa ajili yaku, chimu kwa ajili yaka Musa, ni chengi kwa ajili yika Eliya." ⁶ Kwa kuva ngache akamanyi kiki chu kuvaha, vakayogwipi ngamaha. ⁷ Lihundi likapitali ni kuvahyeka. Ndipo sauti ikahuma mawinguni ivaha, "Ayo ni mwanangu mpalikwa, Mu njowanila yombe." ⁸ Gafula, pavakavi paloleke,ngachevakambweni yokapi papamu nawu, isipokuva Yesu pela. ⁹ Pavakavi vahelela kuhuma ku chitombi, akavaamulu kutokumpwaghila mundu yokapi yala yoha vayakayaweni, mpaka Mwana waka Adamu paahyoka kuhuka kwa wafu. ¹⁰ Ndipo vakayatunza mambu wawu veni. Nambu vakajadiliana wawu kwa wawu ni kiki maana yaki "Kuhyoka kuhuma kwa wafu" ¹¹ Vakandaluki Yesu, "Kwa ndandi kiki vaaandishi vavaha lazima Eliya ahika hoti" ¹² Akavapwaghila, "hakika Eliya ahika hoti kuokoha hindu hyoha. Ndaki ki ilembekiki Mwana waka Adamu lazima apata mateso yanawingi ni ahakaliwa? ¹³ Nambu nivaha kwinu Eliya akayomwi kuhika, ni vakantendiki ngati movapalila, ngati vela malembu moghavaha kuhusu yombi." ¹⁴ Ni pavakelawuka kwa vanafunzi, vakawona lipogha likolongwa livahyongalwiti ni Masadukayo vakavi vabishana nawu. ¹⁵ Ni mala pavakabweni, lipogha loha likakangacha nu kunkembele kundamukila. ¹⁶ Akavalaluki vanafunzi vaki, "Mubishana nawu panani yi kike." ¹⁷ Yumu wawu mu lipongha akanjanga, "Mwalimo, nikandetiki mwanangu kwaku;akavi ni roho ichafu ambayu yintenda akaweza kulongela, ¹⁸ ni yimusababisha kuvaghaya nu kunhawuha pahi, ni kuwoka lihuluhulu kundomu ni kushagha mino ni kukakamala. Nikavaluviki vanafunzi vaku kumboha pepo, nambu ngachevaweziti. ¹⁹ Akavayanga, "Luveloko lwangakuamini, yandama nimwenga hadi lile? Yandolilika nimwenga hadi lile? Mundeta kwango." ²⁰ Vakandeta mwana waki. Roho muchafu paakambweni Yesu, ghafula likanjingi kupete kuvaghaya. Nkombo akahawiki pahi nu kupita lihuluhulu kundomu. ²¹ Yesu akandaluki tati waki, "Akavi mu hali yeneyi kwa muda wole?" Tati akavaha, "Kutumbu uwaniki. ²² Mala yengi ahawuka mu motu au mu machi, ni kulenga kumuangamiza. Ngati uweza kutenda lokapi utuhulumiayi ni utuyangatilaye." ²³ Yesu akapwaghila, Ngati uvi tayale? Kila chindu chiwezikana kwa yokapi yoaamine." ²⁴ Ghafula tati waka mwana akalela nu kuvaha, "Niamine! Niyangatila kwangakuamini kwango." ²⁵ Chikahi Yesu paawona lipogha likembelela kwawu, akamukemea roho muchafu nu kuvaha, "Wenga roho bubu ni chadenda, nikuamulu wakayingi kwaki kaveti." ²⁶ Akaleliki kwa makili ni kumuhangaisha mwana ni roho yikamboka. Mwana akawonikana ngati yoahwile, Ndipo vanawingi vakavaha, "Ahwile," ²⁷ Nambu Yesu akantoliki, kwa chiwoku akanjinula, ni mwana akayema. ²⁸ Chikahi Yesu payingila mukati, vanafunzi vaki vakandaluki falagha, "Kwa ndava kiki ngachetaweziki kumboa?" ²⁹ Akavapwagila, kwa namuna aye ngacheliwoka isipokuva kwa kulova.'' ³⁰ Vakawoka pala nu kupete ku Galilaya. Ngachepaliki mundu yokapi amanya pavavili. ³¹ kwa kuva akavi avawola vanafunzi vaki. Akavapwaghila, "Mwana wa Adamu vamufikisha mu mawoku yi vandu, ni vankoma. Paaya ahwili, baada yi machova ghatatu ahyoka kaveti." ³² Nambu ngachevaeliwi maelezu yanaya, ni vakayoghopa kundaluki. ³³ Ndipo vakahika Karperinaumu. Chikahi paakavi mukati yi nyumba akavalaluki "Mukayi mujadili ki mundela?" ³⁴ Nambu vakatama chinunu. Kwani vakavi vabishana mundela kwamba nane akavi nkolongu nganila. ³⁵ Akatemi pahi akavakema kumi ni vaveli papamu,ni akavaha nawu, " Ngati yokapi apala kuva wa kwanza, ni lazima aya wa mwishu ni ntumishi wa woha." ³⁶ Akantoliki mwana nchoku akambeka katikati yawu, Akantola mu mawoku yaki, akavaha, ³⁷ "Yokapi yoanjopele mwana ngati ayoyu kwa lihina lango, kaveti aniyopale nenga, ni nakuvi mundu aniyopalili, ngacheaniyopale nenga pela, nambu kaveti yoanitumike.'' ³⁸ Yohana akampwaghila, "Mwalimo tumbweni mundu awoa pepo kwa lihina laku ni tukamuhivalakila, ndava ngacheatuyengalela. ³⁹ Nambu Yesu akavaha, "Mukamuzuiya, kwa kuva njeta yoahenga lihengu likolungu kwa lihina lango ni ndipo baadayi avaha lilovi libaya lokapi panani yango. ⁴⁰ Yokapi ywangakuva kinyumi ni twenga avi upandi witu. ⁴¹ Yokapi yoakupekiya chikombe cha machi ya kunywa ndava uyi ni Kristo, chakaka nupwaghila, ngaahovei thawabu yaki. ⁴² Yokapi yoavahoveha vana avava vachoku vavaniamini nenga, ikavyaa chinyahi kwaki kukongewa liganga li kushaghila muhingu nu kundekela mu bahalini. ⁴³ Ngati chiwoku chaku chikukosecha uhekata. Ni heli kuyingila mu womi changa chiwoku kuliku kuyingi mu hukumu uyi ni mawoku yoha mu motu wangakuchuchuka." ⁴⁴ "Mahali ambapu matekenya ngakuhwa ni motu wanga kuchuchuka." ⁴⁵ Ngati ligholu laku lukukosecha, uhekataye. Ni chinyahi kwaku kuyingi ku womi uvi chilema, kuliku kukuleke ku hukumu ni magholu ghaveli. ⁴⁶ "Mahali ambapu matekenya ngakuhwa ni moto wanga kuchuchuka." ⁴⁷ Ngati lihu laku likukosecha litupulaye. Ni chinyahi kwaku kuyingi mu ufalume waka Chapanga uvi ni lihu limu, kuliku kuva ni mihu ghavele ni kukuleke kuzimo. ⁴⁸ Mahali papavi ni matekenya vangakuhwa ni motu wangakuchuchuka. ⁴⁹ Kwa kuva kila mmoja akolizwa ni motu. ⁵⁰ Mwinyu ndi unyahi, ngati mwinyu uhovihi ladha yaki, watenda woli iya ni ladha yaki kaveti? Muya ni mwinyu miongoni mwino maveni, ni muya ni amani kwa kila mmoja."