¹ Yesu paakavi atembela kuhuma ku hekalu, yumu wa vanafunzi vaki akandaluki, "Mwalimo lolakya maganga ayaya yi kukangacha ni majengu!" ² Akavampwaghila, Uyawona majengo ayaya makolongwa? Njeta liganga hata limu lelahighalya panani yi lengi ambalu ngavalihahui pahi". ³ Niyombi paakavi atemi panani yi Chitombi chi Mizeituni ku nyuma yi hekalu, Petro, Yakobo, Yohana ni Andrea vakandaluki kwa sili, ⁴ "Tupwaghila, mambo aya yavya lile? Ni kiki dalili yi mambu aya kupitalila?'' ⁵ Yesu akatumbu kuvapwaghila, "Muya makini kwamba mundu yokapi nga akavapotosha. ⁶ Vanawingi vahika kwa lihina lango vavaha, 'Nenga ndi nepani' ni vavapotoshayi vanawingi. ⁷ Pamayowana ngondu ni tetesi yi ngondu makoyoghopa; mambu ayaya ngacheghavi ni budi kupitalila, nambu mwishu ukona. ⁸ Taifa layinuka kinyumi ni ufalumi. Paya ni matetemeku sehemu mbalimbali, ni injala. Awoo ni mwanzu wu utungo. ⁹ Muya mihu. Vavapeleka hadi mu mabalaza, ni vandapula mu masinagogi. Vanjemika palongolu yi vatawala na vafalume kwa ajili yango, ngati ushuhuda kwawu. ¹⁰ Nambu injili lazima yitumbula kuhubiliwa kwa mataifa yoha. ¹¹ Pava vankamula ni kuvakabidhi, makayoghopa kuhusu chela chemavaha. Mukati yi muda wonowu, mapata ki chi kuvaha; ngamakuvi mwenga mwemalongilaye,bali Roho Muhuhu. ¹² Ndongu antakila ndongu kukomeka, tati ni mwana waki. Vana vayema kinyumi chaka tati vawu ni kuvasababishi kukomeka. ¹³ Vanhakalyayi ni kila mundu kwa ndandi yi lihina lango. Nambu yoavumilyayi mpaka mwishu, mundu oyu aokokukaye. ¹⁴ Pamawona chukizo li uhalibifu liyemi pala pangakutakiwa kuyema (yoasoma ni amanyayi), ndipo vavayi mukati yi Yuda vakembelya ki hitombi, ¹⁵ niyombi yoyuvi panani yi nyumba akahuluka pahi yi nyumba, au kutola chokapi chechivi kunja, ¹⁶ ni yoavi ku mighonda akakelewuka kutola lilaya laki. ¹⁷ Nambu ole wawu vakambomba vavayi ni chitumbu ni vavayongeha mu machova yanaya! ¹⁸ Ndovayi kwamba yikapitali chikahi chi mbepu. ¹⁹ Kwani kwavya ni matesu makolongwa, ambayu ngacheyawahiti kupitali, kutumbu Chapanga paauwomba ilimwengu, mpaka henu, njeta, wala ngacheyipitali kaveti. ²⁰ Mpaka Bambo paapunguza machova, njeta hyegha yeyaokuka, nambu kwa ajili yi vateule, vavahawulika, apunguza namba yi machova. ²¹ Chikahi echi ngati mundu yokapi avapwaghila,Lolakya,Kristo yuvi pambani!; au 'Lolakya,yuvi pala!' makaamini. ²² Kwani Vakristo wu upuhi ni manabii wu upuhi vapitilayi ni vawoha ishala ni maajabu, ili kwamba, vavakongayi, yamukini hata vateule. ²³ Muya mihu! Niyomwi kumpwaghila yanaya yoha kabula yi wakati. ²⁴ Nambu baada yi matesu yi machova yanaya, lyova valiyingiha luvendu ,mwehi ngawawohi luvalu lwaki, ²⁵ ndondu yahawuki kuhuma ku angani, ni makili yayavi kunani yanyukanyuka. ²⁶ Ndipo pavamwona Mwana waka Adamu ahika ku mawingu kwa makili makolongwa ni utukufu. ²⁷ Ndipo avatuma malaika vaki ni avakusanya papamu vateule waki kuhuma pandi kuu nchechi za dunia, kuhuma mwishu wa dunia mpaka mwishu wa mbingu. ²⁸ Kwa mtini muliwolayi. Ngati limbandi moliweza kuwoha nu kuveka kanyata mahamba yaki, ndipo mamanya kwamba lumu luvi papipi. ²⁹ Ndivyo yavya, pamawona mambu yanaya yapitalila, mumanya kwamba avi papipi, ni malangu. ³⁰ Chakaka, numpwaghila, luveleko londo ngalupeti kutali kabula yi mambu yanaya ngacheyapitali. ³¹ Mbengu ni ndema yapeta,nambu malovi yango ngayapeti kamwe. ³² Nambu kuhusu lichova eli au saa, njeta yoamanyi, hata malaika wa kunani, wala Mwana, ila Atati. ³³ Muya mihu. Lolakya, kwa ndandi ngachemumanyi ni muda woli payapitilila. Muya vaangalifu, Mulolakya ni mulova. ³⁴ Ni ngati mundu yoayenda mu mwanja; akaileka nyumba yaki, nu kumbeka ntumwa waki kuva ntawala wa nyumba, kila yumu ni lihengu laki. Nu kumuamulu mlinzi kutama mihu. ³⁵ Kwa vela muya mihu! kwani ngachemumanyi ni li bwana wa nyumba paakelewuka ku nyumba, yiwezikana ni chimihi, ikilu wu pamahiku, chikahi likongovi palaveka, au pulukyela. ³⁶ Ngati ahika kwa ghafula, akakuketene ughoni. ³⁷ Chela chenivaha kwaku nikivaha kwa kila mundu. Mukeshaye!"