¹ Kwato tulo udumuijo, ari kukumu, kwaite he huyo uhukumu mhali ukubutu he hatia salaghu. Kwaite ari uhukumu ubo-i mburi hujo hujo. ² Mira tureile ite hukumu ya Kiumbi ni ya ana kini vebo-i mburi sa kajo ³ Mira ari fanyanya yalo, ari huye uhukumu huvo vebo-i mburi kajo hata kai ari urabo-i mburi kajo kajo. He une-gugulu hukumu ya Kiumbi? ⁴ Kana utafanyanya kagitutusha ana ya ukumure wa ukulho ku-u, kukharetisha he adhabu ku-u, na ugumiriji ku-u? He, tu-iliye ite ukulho ku-u udumuwe kukuti-i he kuvoteka.? ⁵ Mira he kuagha na ukuji ke na he swaho ke isilo na uvoteko ukukeiya salaghu akiba ya malhaha he muaze hu wa malhaha. Yaani, muaze huo wa ughubulo wa hukumu ya haki ya Kiumbi. ⁶ Uye enemlhanu kira mhe kipimo chiaghaye na mibo-ire ku-u: ⁷ he huvo evo he ukulho wa mibo-ire mikulho vaada-a ntogolo, heshima na kusa-onika, eneva-o uzime wa azeto. ⁸ Mira he huvo ere vabinafsi, vesikoiya kweri mira kudosa zuruma, kusanuiwa na malhaha makai yelitiye. ⁹ Kiumbi enegera vwasi na kunyamarika ana he kira nafsi ya mhe ebo-iye makusa, he Myahudi bosi na he Myunani naho. ¹⁰ Mira ntogolo, heshima na m'polele inelita he kira mhe ebo-iye makulho, He myahudi bosi, nahe Myunanani naho. ¹¹ Kwaite tehelo upendeleo he kiumbi. ¹² Kwaite sahucho vakumure vebeniye hesilo sheria venelaha hesilo sheria, naho sahucho vakumure vebeniye kuagha na sheria venehukumiwa he sheria. ¹³ Ake si verakoiya va sheria velo haki mbele ja Kiumbi, mira ni huvo veibo-isheriavenetariwa haki. ¹⁴ Kwaite vahe va mataifa, huvotevelo sheria, veboi he uazeto mburi ja sheria, vo, vaakwa sheria he nafsi kini, hatakai vo tevelo sheria. ¹⁵ He yalo veaija ite mibo-ire idumuwe ni mujibu wa sheria yaagondwa he swaho kini. Fanyanyi kini naho jivashuhudia vo, fanyanyi kini salaghu kana jivashitaki kana kuvalinda vo ¹⁶ salaghu naho he Kiumbi. Yayo yebelijanya he ma-aze huyo Kiumbi enehukumu kimatuiwe ja vahe vakabuna, viaghe na injili gho, he kwalhi yakwe Yesu Kristo. ¹⁷ Tuba ite ukuse salaghu Myahudi, ezokoye he sheria, faru nakukutogola he Kiumbi, ¹⁸ ya-ile madumuisho ku-u, na kupima mburi hujo jisitotiana nayo, baada ya kusughawa ni sheria. ¹⁹ Naho tubaite ulo ujasiri ite ari salaghu ni mzaka-eti wa vipofu, luatame lwa huvo veata he kidughu, ²⁰ mzawesiisha wa virundu, mhinizi wa va-inyi, naho ite urelo he sheria namna ya uiliisho naho kweri. ²¹ Ari iji, umbirikiria mhali, he, tukuhinija salaghu? Ari ubirikira kusaagwa, he ari tugwa? ²² Ari uba usizini, he uzini? Ari usanuiya mapupe, he ugwa he muaresi? ²³ Ari ukutogola he sheria, he tumbutu susune Kiumbi he kujipu sheria? ²⁴ Kwaite "Ilhe lakwe Kiumbi libutuwe susune hasi ya vahe va mataifa he mburi kaghu," sahucho cheegondiwe. ²⁵ Kwaite kutahiriwa kweri kuye kai ukukoiya sheria, mira kai ari ni mzaoni wa sheria, kutahiriwa kuke kutakwa tekutahiriwe. ²⁶ Iji, chikukwa, mhe esitahiriwe ene-endelea kudara vidumuwe ni sheria, he kusaatahiriwa ku-u tehekadoriiwe sa ite aatahiriwa? ²⁷ Nahuye esibutuiwe elha he azeto tekakukuhumu kai ekutimija sheria? Yayo ni kwa ite ulo magondo yegondiwe na elha nayo mira ucheri mzaoni sheria! ²⁸ Kwaite uye si Myahudi eahoikana kwa gana: neri kutahiriwa si huko ambaho ni kwa gana bi he msa. ²⁹ Mira uye ni Myahudi akwaye kwa za, Naho elha ni swaho, he swaho, sihe igondo. ntogolo ya mhe ekwaye to teilijanya na mhe mira ili he Kiumbi.