¹ Paulo, mnyamalo wakwe Yesu Kristo, eseiwe kukwa mtume, na kukewe he mburi ya Injili ya Kiumbi. ² Yayo niyo huyo injili eikeye kilahagha azeto kutahoiya valotezi ku-u he magondo manyakhare. ³ Ni kulanga Mu-inyi ku-u, eahoiwe he mbari yakwe Daudi he namna ya msa. ⁴ Uye eebirikirwe he Mu-inyi wakwe Kiumbi he nguvu ya Swaho ya unyakhare he ufufuo wa vegaye, Yesu Kristo Dilao kanu. ⁵ Kutahoiya uye uye twaadoria neema na utume he kukoiya kwa Mdarisho he mataifa makabuna, he mburi ya ilhe ku-u. ⁶ He mataifa yayo, kune naho museiwe kukwa vakwe Yesu Kristo. ⁷ Barua yayi he vakabuna veata Rumi, vedumuwa ni Kiumbi. Veseiwe kukwa vahe vanyakhare. Neema na ikwa hakaghu, na m'polele kuli he Kiumbi Aba kanu ne Dilao Yesu Kristo. ⁸ Bosi, nimshukuru Kiumbi gho he Yesu Kristo kwa mburi kaghu kabuna, ⁹ Kwaite mdarisho kaghu ubirikirwa he dunia ndime, Kwaite Kiumbi ni shahidi gho, huye nimnyamarikia he swaho gho he injili ya Muinyi ku-u, hucho nizoko he kuvalanga. ¹⁰ Ma-aze kabuna he miaresi gho ite he kwalhi yoyose nipate mwisho ku-u kukwa na mafanikio iji he midumuire ya Kiumbi he kulita kaghu. ¹¹ Kwaite nidumu kumuaho, nesa nipate kumu-o kune baadhi ya karama ja he swaho, nipate kuvaimarisha. ¹² Saite, nifanyanya kubutuwe swaho hawe na kune, he kwalhi ya mdarisho wa kira muwe kanu, kaghu na gho. ¹³ Iji vabahu, sidumu mubeni kuile ite, kagi kakumure needumuye kulita hakaghu, mira nikalhiijwa mpaka waijiji. Needumuye to nesa kukwa na matuunda hakaghu sahucho chikwaye naho he vahe va mataifa. ¹⁴ Nidaiwa ni vayunani na vagalho naho, veilishe na virundu. ¹⁵ Kwato, he upande gho, ani niata pere kubirikira injili hakaghu nahi kune muata are Roma. ¹⁶ Kwaite si-iahoiya susune injili, kwaite ni umuruisho wa Kiumbiugera wokovu he kira edarisha, he Myahudi ini na he Myunani naho. ¹⁷ Kwaite haki yakwe Kiumbi ya-ahoikana kuli mdarisho mpaka mdarisho, sahucho chigondiwe, "Elo haki enezoko he mdarisho." ¹⁸ Ake malhaha ya Kiumbi ya-ahoikana kuli mbinguni dhidi ya uasi na ukusa mkabuna wa vahe, huo he kwalhi ya ukusa waimatu kweri. ¹⁹ Yayo ni kwaite, makabuna yemuru ku-ilikana ana ya Kiumbi ni wazi hakini. Kwaite Kiumbi aava-baya. ²⁰ Kwaite mburi ku-u jisi-ahoikana kikulho yaakwa bule kulholhoshi kuumbwa kwa idi. Yereilikana kutahoiya vigi viumbiwe. Mburi yajo ni umuruisho ku-u wa milele na uazeto wa ukiumbi. Vizalijanya iji, vahe yavo tevelo udhuru. ²¹ Yayo ni kwaite, hata kai veere-ile kulanga Kiumbi, tevezemtogola uye sa Kiumbi, neri tevem-oye shukurani. Mira iji, vaakwa vapumbavu he fanyanyi kini, na swaho kini jilo urundu ubutuiwe kidughu. ²² Veekuseye ite ni vaza-iliisha, mira vekakwa virundu. ²³ Vekaughiriti unyakhare wa Kiumbi asiwa kuonigi, he mfano wa vubasa vya mhe ere wa kuonika, na ja madeghe, ja vanyama velo masame mahai, naja viumbe vira-avua. ²⁴ Kwato Kiumbi ekavaro vadose vidumuwe ni swaho kini he kukandana, he misa kini kubutuwe susune herevvo. ²⁵ Nirevo vebadirishe kweri ya Kiumbi kuwa mongo, naho akeo ve-aresie na kunyamarikia viumbe badala ya Eumbiye, huye etogolwa azeto na azeto. Amina. ²⁶ He mburi ya, Kiumbi ekavaro vadose tamaa kini ja susune, kwaite valagge kini veebadirishe matumizi kini ya azeto he hucho chikwaye kimzungure na azeto. ²⁷ Naho kahali, va-agiru navo vekaro matumizi kini ya azeto he valage naho hekakwa na tamaa he vo salaghu. Yavo veekwaye vaagiru huvo vebo-iye na va-agiru va-aro yesiye hevo. naho huvo vekadoria adhabu ivayeye he ukusa kini. ²⁸ Kwa ite veelhiiye kukwa na kiumbi he fanyanyo kini, ekavaro vadose akiri kini jisiye, vabo-i mburi huy=jo jisiye. ²⁹ Vehuiwe ni ukusa uzurumiji mkabuna, ukusa, kudumuisha kukusa. Vehuiwe ni wizu, kuga-a, aku, mambeza, na fanyanyi kusa. ³⁰ Vo navo nivazayoyo vahe, vesingizia, naho vemsanuiya Kiumbi. Velo aku, vibwange, na kukukomba. Vo nivaza gera makusa, naho vesikoiya vazazi kini. ³¹ Vo tevelo u-iliisho, teveaminika, tevelo midumuisho ya azeto naho tevelo mbazi. ³² Ve-iliye kanuni ja Kiumbi, ite vahe vebo-i mburi ja namna kavedumuwe kuga. Mira sio bi veboi mburi kajo,vo naho vedumuijana na huvo vebo-i mburi kajo.