¹ Yesu ekayo navo kahali kwa mifano, ekuba, ² Udilao wa mbinguni utotie na dilao eandae kinyemi cha m-inyi ku-u kudori. ³ Ekavasugha vanyamalo ku-u kuvakaribisha vee rarikwe kulita he kinyemi cha harusi, mira tevelitie. ⁴ Dilao ekavasu wa vanyamalo vahali, ekuba. Vabayani vakabuna verarikwe, Wesiani, na-andaa via-ghu. Churu na harangho kulho jaa-chinjwa, na mburi kabuna jaita kikulho, Litani he kinyemi cha harusi." ⁵ Mira vahe ka teve-daraishe mburi ja kurarika ku-u. Vahali vekaso he mbuva kini, na vahali vekakirii he hodi kini ja biashara. ⁶ Vahali vekavajoghoya vanyamalo va dilao na kuvabutu susune na kuvaga-a. ⁷ Mira dilao ekasanuiwa. Ekasugha ijeshi ku-u, ekava ga-a hu vega-ae na kuuteketeza mwang'a kini kwa mwalha. ⁸ Halafu ekavabaya vanyamalo ku-u., Harusi iata tayari, mira verarikwe tevestahili, ⁹ Kwato soni he makutano ya kwalhi giru, vararikeni vahe vakumure kwa kila chimuruika valita he kinyemi cha harusi." ¹⁰ Vanyamalo vekaso he kwa giru na kuvakaribisha vahe vovose veva-ahoye, vakulho na vakusa. Kwato lukumbi lwa harusi lukahu vagalho. ¹¹ Mira dilao arebuu kuvawesia vagalho, ekamuaho mhe muwe teoroye gomae ja harusi. ¹² Dilao ekamlhasu, 'M-aro, umurue kimomo kuhe i-i minda tulo gomae ja harusi?' Na ka mhe telandule kigi chochose. ¹³ Niho dilao ekavabaya vanyamalo ku-u, "M-oroni mhe ya miheregha na masame na mze mbibi ga-hana he kidughu, are ambaho henekwa na kuzo na kushagha ma-iki. ¹⁴ Kwa ite vahe vangi vesewe, mira veteuliwe ni vaghere." ¹⁵ Niho Mafarisayo vekahaka na kufanyanya cho venemdara Yesu he mburi ku-u mwenye. ¹⁶ Niho vekavasugha vahini kini hawe na Maherode. Na vekam-ba Yesu, "Mhinizi, tureile ite ari u mhe wa kweri, na ite uhiniza chidumuwe ni Kiumbi he ukweri. Tuwesia maoghe ya mhe mhali na tuaija upendeleo he vahe. ¹⁷ Kwato tubaiye, ufanyanya ahoni? He ni kikulho kisheria kulhanu kodi hakwe Kaisari kana hai?" ¹⁸ Yesu eeiliye ukusa kini, "Kwa ahoni mnighesha, kune vanafiki? ¹⁹ Niaijani hera yitumika kulhanu kodi." Niho Vekamgeria Dinari. ²⁰ Yesu ekavalhasu, "Vubasa na ilhe ya ni vya kweji?" ²¹ Vekalandula, "Vyakwe Kaisari." Niho Yesu ekavabaya, "M-oni Kaisari vigi vikwae viu-u na vya Kiumbi m-oni Kiumbi." ²² Vareako to vekakwa nalundolo. Halafu vekamro na kuso kini. ^{23 24} I-aze ka Masadukayo vahali vekalita he Yesu, hu vebaa ite tehelo ufufuo wa vegae. Vekamlhasu, vekuba, "Mhinizi, Musa e-ebae, kai mhe egae bila kusa m-inyi, mbahu ku-u na amrithika mlage na amsaije m-inyi kwa ajili ya m-bahu ku-u. ²⁵ Veeata vabahu saba. Wa bosi ekadori na halafu ekaga tenasa va-inyi. Ekamroya mlage m-bahu ku-u. ²⁶ Halafu Mbahu ku-u wa kanu nau nau ekabo-i to-oto, halafu hu wa kakai, ikakwato mpaka hu wa saba. ²⁷ Baada ya kuboi to vakabuna, hu mlage nau ekaga. ²⁸ Iji he ufufuo ka mlage enekwa niwa kweji he vabahu ka saba? Kwaite vakabuna vemdorie. ²⁹ Mira Yesu ekavalandula na kuvaba, "Mkose, kwaite tem-iliye magondo neri nguvu ja Kiumbi. ³⁰ Kwaite he ufufuo, vahe tevedori neri kudoriwe. Mira vahe vekwa sa malaika are mbinguni. ³¹ Mira kwa ufufuo wa vegae, temze soma hu cho Kiumbi e-echiyoe hakaghu, ekuba, ³² Ani ni kiumbi wa kwe Ibrahimu, Kiumbi wakwe isaka, na Kiumbi wakwe Yakobo? Kiumbi si kiumbi wa vegae, mira ni kiumbi wa vahe ve hema." ³³ Too ikusanyiko lireko ya, vekamawe lundolo ni mahini ku-u. ³⁴ Mira mafarisayo vareko ite Yesu avata-aija Masadukayo, Vekakututana venye hawe. ³⁵ muwe kini, ekukwa ni mhe wa sheria, Ekamlhasu mburi kwa kumghesha. ³⁶ Mhinizi, ni amri hama egiru kuktaho kabuna he sheria?" ³⁷ Yesu ekalandula, "Udumuwe, umdumu Dilao kwa swaho ke kabuna, kwa roho ke kabuna, na kwa akiri ke kabuna. ³⁸ Ya ni u amri mgiru na ya bosi ³⁹ Na yakanu itotie na ka- Udumuwe kumdumu jirani ke sa cho ukudumu mwenye. ⁴⁰ Sheria kabuna na valotezi vetegemea amri ya nu." ⁴¹ na Mafarisayo veecheri vekututie hawe, Yesu ekavalhsu iswali. Ekuba, ⁴² "He ! mufafanya ahoni ana ya Kristo? Ye ni M-inyi wa kweji?" Navo vekam-landula, "Ni m-inyiwakwe Daudi. ⁴³ Yesu ekavalandula, "Ni kwa namna mina Daudi He Roho emse ⁴⁴ Dilao gho, "Zoko he mhegha gho wa kuume, mpaka hodi ninevabo-i vankru ke vakewe di he masame ke."?" ⁴⁵ Kai Daudi emse Kristo "Dilao," ni mburi mina enekwa m-inyi ku-u?" ⁴⁶ Tehelo emuruye kumlandula mburi hali wa, na tehelo egheshije kahali kumlhasu maswali mahali tangu ka i-aze na kuendelea.