¹ Yesu na vahina ku-u vekahe sina na Jerusalemu na vekaso mpaka Bethfage, he lungori mizeituni, halafu Yesu ekavasugha vahina ku-u vanu, ² ekavabaya, "Soni he kijiji chidosa, na kagi kawe mneheya m'punda ioroiwe too, na m-inyi na hara ku-u. jigeni na kujigera hawe. ³ kai mhe wowose ekumubaya chochose kwa ka, mneba, 'Dilao ejidumu,' na mhe ka kagi kawe enemuro mlita hawe najo. ⁴ Mburi ya ilianye ni hu iyoiwe kutahoya he mlotezi lazima litimijwe. Ekavaba , ⁵ Vabani vabora Sayuni, wesia, dilao ke elita hakaghu, mnenekeri na ekutue m'punda, na hara ya kiagiru, na hara gitutu. ⁶ Halafu vahina veka-ka na kuzabo-i sacho Yesu evasigire. ⁷ Vekagera m'punda na hara, na kuke gomae kini ana kini, nau Yesu ekazokodi too. ⁸ Vakumure he mkusanyiko veka nagha gomae kini kwalhi, na vahali vekate matambi kuli he mihatu naku nagha he barabara. ⁹ Umati umka-eye Yesu ukama kilondo,vekuba, "Hosana he m-inyi wakwe Daudi! Ni keba elita kwa ilhe la Dilao. Hosana ana sha!" ¹⁰ Yesu arehe Yerusalemu, mwang'a mzime ukaituka na kuba, "Ya ni ji? ¹¹ "Umati ukalandula, "ya ni Yesu Mlotezi, kuli Nazareti ya Galilaya." ¹² Halafu Yesu ekabuu he ihekalu la Kiumbi. Ekavauguluti gana vakabuna ve-ekuwe na kudi he ihekalu. Na ekabidula meza ja vevunja hera na vikire vya vyazadi sua. ¹³ Ekavaba , "hegondiwe, "Minda gho inesewe minda ya kirurumo, mira kune mwaibo-i m'panga ya vagwalo." ¹⁴ Halafu vipofu navilema vekamlitia he ihekalu, nau ekava-uti. ¹⁵ Mira vagiru va kirurumo, na vaandishi vareaho, maajabu yo ebo-iye, na vareko va-inyi vekuma kilondo he ihekalu na kuba, "Hosana he M-inyi wakwe Daudi." Vekadarewe ni malhaha. ¹⁶ Vekambaya, "Ukoe ka chiyowe niya vahe?" Yesu ekavaba, "Eee! Mira temnaraa soma, 'kuli he mi-o ya va-inyi na va-inyi wagitutu vegosiwe, mlo sifa kamiri?" ¹⁷ Halafu Yesu ekavaro na kuso gana ya mwang'a he Bethania na kugosha are. ¹⁸ Chalheni ekukwa ekirii he mwang'a, ekakwa elo kela. ¹⁹ Eka aho mtini kakera ya barabara, Ekaudosa, mira teahoe kigi ana ku-u, mira mahako bi. Ekaubaya, "Use-ezakwa na matunda hake kahaliwa." Na kagi ka mtini ukanyuluka. ²⁰ Vahina vare aho, vekashangaa na kuba, "Chikwaemo mtini uwanyaluka kagi kawe?" ²¹ Yesu ekalandula na kuvabaya, "Kweri ni mubaya, kai mnekwa na imani isilo futofuto, temkabo-i hucho chibo-ike he hu mtini to. Mira mneubaya hata hu lungori, Udoriwe na uzebibiwe baharini, na inebo-ika. ²² Chochose cho mnetasa he kirurumo, ilai mkuamini, mnedoria." ²³ Yesu areahe hekaluni, vagiru va kirurumo na vazee va vahe vekamlitia too ekuhiniza na kumlhasu, "Ni kwa mburi ya kweji ubo-i mburi ya? Na niji ekuoe mamlaka ya?" ²⁴ Yesu ekalandula na kuvabaya, "Na ani kahali nimulhasu iswali iwe. Kai mkunibaya, na ani wato-oto ninemubaya ni kwa mburi ya mina nibo-i mburi ya. ²⁵ Ubatijo wa Yohana- ulie le, mbinguni kana ha vahe? " Vekalhasuana venye, Vekuba, tukuba, twaraaba , ulie mbinguni,venetuba , kwa ahoni temu-muaminiye? ²⁶ Mira twara-aba , ulie he vahe, tuogoha makutano, kwaite vakabuna vemwaho Yohana sa mlotezi." ²⁷ Halafu vekamlandula Yesu na kuba, "Tetuiliye," Ekava baya naho, "Neri ani sikamubaye ni kwa mburi mina nibo-i mburi ya. ²⁸ Mira mfanyanya ahoni? Mhe elo va-inyi vanu, Ekaso he muwe na kumbaya, 'M-inyi gho, so urebo-i nyamalo he mbuva ya mizabibu ²⁹ wai. M-inyi ekalandula na kubasikaso,' baadaye ekabadirisha fanyanyi ku-u ekaso. ³⁰ Na hu mhe ekaso he m-inyi wa kanu na kuyo kigi wa hu-uhu. M-nyi ekaba, 'Nineso dilao', mira tesoe. ³¹ Ni mhama he va-inyi vanu ebo-iye chidumuwe ni aba kini? Vekaba, "M-inyi wa bosi." Yesu ekavaba, "Kweri nimubayani. Vezadara ushuru na makahaba venebuu he udilao wa Kiumbi venemuka-eya msinabuu. ³² Kwa ite Yohana eelitie hakaghu kwa kwalhi ya isikomborike, mira temu-muaminiye. Na kune mreza-aho ka likubo-ika, temze muru kuvoteka ili baadaye mumuamini. ³³ Sikijani mfano mhali. He-elo mhe, mhe elo mbuva kiru. Ekalha mizabibu, ekake lwigo, ekabo-ina chombo cha ku-ulea divai, ekakwa na mnara wa valinzi, na ekalikodisha he vatunza zabibu. Halafu ekaso he idi ihali. ³⁴ He uluki wa mizabibu urehe sina, ekavasugha vanyamalo vaghere he vazakuru va mizabibu kudori mizabibu ku-u. ³⁵ Mira vazakuru va mizabibu vekavadori vanyamalo ku-u, Vekam-ma muwe, vekamga-a mhali, na vekam-ma muwe kwa masaheru, ³⁶ Kwa kagi kahali, Mwenye ekavasugha vanyamalo vahali, vakumure kutaho hu va bosi, mira vazakuru va mizabibu vekavabo-i to-oto. ³⁷ Baada ya ata dilao hu ekamsugha hakini m-inyi ku-u, ekuba, "Venemheshimu m-inyi gho." ³⁸ Mira vazkuru mizabibu varemuaho mbwange huye, vekaba-yana, "Ya ni u mpaji. Litani, tumga-a na tudori upaji. ³⁹ Kwato vekamdori, vekam-bibi kana ya mbuva ya mizabibu na kumga-a. ⁴⁰ He mzalo mbuva ya mizabibu ekunelita, enevasamo vazakuru va mizabibu?" ⁴¹ Vekam-ba, "Enevaoni ka vahe vakusa kwa kwalhi ya ukai sha, na halafu enei-kodisha mbuva ya mizabibu he vazakuru vahali va mizabibu, vahe vene-lhanu kwa mburi ya mizabibu ikune-aasi. ⁴² Yesu ekavaba, "Temsomie he magondo, 'Isaheru lilhiiwe ni vekwa, laakwa isaheru igiru la msingi. Ya lee-lie he Dilao, na ligera lundolo he ma-ila kanu? ⁴³ Kwato nimubaya, Udilao wa kiumbi unedoriwe kuli hakaghu na kuowe taifa linewesia matunda ku-u. ⁴⁴ Wowose enelhu ana he isaheru ka enepuika vibesubesu. Mira he wowose linemlhuiya, linemshagha. ⁴⁵ Vagiru va kirurumo na mafarisayo vareko mifano ku-u, veka-aho veyoiwa vo. ⁴⁶ Mira kila varedumu kuka-a mheregha ana, vekakoya bughu makutano. kwa ite vahe vekumuwesia sa mlotezi.