¹ Simon Petro, motumwa na motomwa wa Yeesu Kirisitu, kwavara vaesokera otoolu oraora wa samani kempere kwaesokera siye, otoolu orekoo nyombi ya haki ya Molongo na mwana weyto Yeesu Kirisitu. ² Mboto evee kore nyee; otoolu odumeke olokera maarifa wa Molongo na Monene weyto Yeesu. ³ Olokera oteri wa Molongo kwatoola mpoongo jaachwe joonse kwajili wa mwikalo, Osuma kore Molongo ora wakwamokola kwaajili ya wooja wa olaulau wachwe. ⁴ Kwanjera ee vakevarererya ahadi nene ya samani . Wajisha ere ili okojisha kempere are wee Molongo, kenfero kokendelea oreka ovee wa wero ee. ⁵ Kwafara oo, jishi bidii oduuma woja kwa njere ya otoolu wanyu, kwasababu ya wooja, oteri. ⁶ Olokera oteri, cheero, naolokera cheero saburi, na olokera saburi osaolwi. ⁷ Olokera osaolwi wooja waanjwi wavawalane na olokera waanjwi wa waalwe, waanjwi. ⁸ Akunja mpoongo jako iji nyombi yaanyu, yakendelea okola nyoombi yanyu, basi nyee temojeva moomba au vanto mokayaye vaana kore oteri wa Monene Yeesu Kirisitu. ⁹ Hakaaka wowonse akiseva naeyo mpoongo ee, woona mpoongo ya faufe mono, wee ne motifalu, weviye oje otakaso wa mbiri jaachwe jakalii. ¹⁰ Kwajawo, vawalane, jishi juhudi ili wehakikishaiya osaolwa nawamokolwa kwajili yaanyu. Akunja ojisha moje aa, temojenkonkovala. ¹¹ Joo wetorera moje viinge wa morengo wa ingerera nakore osungati wa nsiko joonse wa Monene weyto mokori Yeesu Kirisitu. ¹² Kwajawo nee neova ninje tayari ovakombokisha ninje mpoongo iji kila mara, baakunja neomanya mokende faafo, nafafo moveye terere kiore chaadi. ¹³ Omoririkana nkeende neterere ovarerya naovakombokisha yolwi ya mpoongo iji, ningali njire kore ema ere. ¹⁴ Kwankefero omanya nkeende kuwa tere muda moliioferenka nije ema raane, Kempere Monene Yeesu Kirisitu anjonesha. ¹⁵ Wetaidi ninje kwa bidii kwaajili yanyu ili mokomboke mpoongo iji baada yanee oferenka. ¹⁶ Kwafara siye tekwatuumba hadisi jingeriwa kwaomanya fara kwavaelekea yolwi ya ngulu na wesibitisherya kwa Monene weyto Yeesu Kirisitu, bali siye kweisekoo mashaidi va olaulau wachwe. ¹⁷ Wee wasokera olaulau na eshima osuma kwa Molongo baaba fara sauti yateerwa osuma kore olaulau monene ekeloosa, Oo nawe mwana waane,mwaanjwi waane ambae nandamwanja wee. ¹⁸ Kwateera sauti ee ekesumera irunguitwe fara kwiise nawee kore ora mweembe, molaulau. ¹⁹ Koteete ere ineeno ra ontone rasibitika, vara mwajisha terere otekeleza. Nejaa taa yandaka duuwi mpaka kochee na njota ja mawiyo jandonekana kore miyoo yeyto. ²⁰ Tabuwi aa ya kwamba, teoriko ontone wandaandekwa kwa sababu ya ririkana kwa ntone mweene. ²¹ Kwafara teoriko ontone waja kwa waanjwi wwa vaanto isipokuwa vaanto vawezeshwa ne Moo Molaulau aloseka osuma kwa Jova.