¹ Leka Agrippa akanjowili Paolo, kuyitikalika ujowe wamwene pa mhalo wako. ² Bahalapala paolo, pakatambaswili kiwoko, akayihigili kukita. Nisengusa kukita lilino yanihigile pa chengo kyako mutwa Agrippa, ya fyoha fila nilungamakasika nafyo ni wayehudi. ³ Pakuya wenga wakumanyakisa mikuwa yoha ni makoto ga wa yehudi, ndawa iyi nikuluwa uniyufwanile mwakwisinga. ⁴ Mumu mutamilo gangu kitumbulile uchoko wangu, aga gayili kitumbulo pa mhuku wangu, na pa yerusalem, wamanya woha wa yehudi. ⁵ Pakuwalalila ya nenga kitumbulile mwandi, wona wa londa kulasa ulungamakiso, umu ndingo wa kupataliko kakulutila ka dini tenga, nikalamiti mfarisayo. ⁶ Na hino niyima apa nipawulike pa mhalo wa kihuwalila. ⁷ kya kilago kila kyakitiki nu milungu kwa wakadadi witu. Kuhulakula mitangilo yituu kumi ni yiwili, pakutumakila kulutila musi ni kilo, wahuwalila kufikila; ni ndawa ya kihuwalilo iki nipelewa mhalo na wa yehudi mutwa. ⁸ wuli kipawulika kwinu kyangakeleka kukita mulungu asyusa wakufwa? ⁹ Chakaka kukaniwonakili wicho namwene kukita nilinganila kukita fingi fya kupindika lihina lya Yesu wa Nazareti. ¹⁰ Na iki kawili nikakiti pa Yerusalem: leka nikadinditi pakukungika wa mahele wa walafu, apa nikayupiti chengo kila kwa makasisi wakulungu, na kawili, pakukomeka awa, nikatyitakili mumu. ¹¹ Na pa masungoge goha pangi pangi kuwayambulisa pingi, nikayili kuyumalakila wajowe bkasfemia, na pakulutila kuya nu lupengo pa awa, nikawahyungiti mpaka haka makaya ga kigeni. ¹² Mumu, pakubita mwanja ku Damasek, ni chengo nu luwimbi lwa makasisi wakulungu,. ¹³ Lijuwa pa mutu, mutwa, pa ndila nikaweni lulangalila kuhumila kunan, kulutila kumulika kwake lijuwa, ni lukamuliki kunisyungutila nenga na wala wa mwanja pamonga nu nenga. ¹⁴ Na apa tagwili tawoha pasi, nikayufwini lilowe kunijowela pa ki Hebrayo, Saul, unikimbisila kiki? kinono kwa wenga kufyatila fya kuhongholeka. ¹⁵ Leka nenga nikajowiti, uyii nani, Bambo? na Bambo akajowiti, Nenga niyii Yesu uyu unihyunga. ¹⁶ Leka uyime, ni uyimaye pa magulu gako. ¹⁷ Pakuya nakwonakili ndaw a ya iki, kukukamusa uye wakutumakila nu ndungamakiso wa ifi uniweni mumu, ni wa ifi yanikuwonakile mumu. Kukuwusa pa nsafi nipa mihuku kwa wala nikutuma kwake. ¹⁸ Kuwadindula miho gawe, ni kuwang'anamusa kuhuma pa lwisi kuyingalile mu lulangalila, ni kuhuma pa mbafu ya shetani kwa mulungu, nausi wayupe kulekelekesa sambi ni lilundu pagati pa wala wakuwalasika pa kiyitakiso kiyii pa nenga. ¹⁹ ,Mumu, mutwa Agrippa, nikayili lepa wangayufwana lingumbisi lya kunani. ²⁰ Leka pa wala pa Damasek pakutumbula, ni [pa yerusalem kawili, ni pa ndima woha wa yeruhudi, ni pa mihuku, nikawandisi kupela ni kunkilawukila mulungu, pakukita ifi fyakulinganila kupela. ²¹ Kwa ndawa iyi wayehudi akanikamwili pa kawili, nikalonditi kunikoma. ²² Mumu pakupatila matangataliko kuhuma pa mulungu mpaka lilino li niyima kulasa ulungamakiso kwa nchoko nu nkulungu, nukujowa kandu lepa llema aga wakulweta wakalongili nu Mussa kukita yagayiche. ²³ Kukita Kristo uyu ngahumbusiki, nu kukita pakutama wakutumbula pa kusyuka kwa mwakufwa yawandise lulangalila kwa nsafi ni kwa mihuku kawili. ²⁴ Leka pakayihigili aga, Festo akakwesiti lilowe kujowa uyii nu lupengo paolo; kumanya kwako kungikung'anamusa wenga kwa lupengo. ²⁵ Leka paolo akajowiti, nukuyu lepa wa lupengo, Festo nnofu kulutila, koma nipisa malowe ga chakaka ni ga luhala gangayumbatika waka. ²⁶ Pakuya mutwa awalalila ga findu ifi, ni kwake nilongela pa ukamba; pakuya nenga nukukela lepa kukita kandu ka findu ifi kufihiki kwake; pakuya kindu iki kikitiki lepa kuhyetu. ²⁷ Mutwa Agrippa, uwakela wakulweta? Nimanya kukita ukela. ²⁸ Leka Agrippa akajowili paolo, pa kyakichoko uyii mu kunikonga nenga nikitike mkristo. ²⁹ Leka paolo akajowiti, wona nikagamiti kwa mulungu kukita haka pa kyakichiko hapa pingi nukuya wenga wakape, koma woha awa waniyufwanila lilino nawombe kawili, wakitike kimonga kimonga ngati nenga namwene, lema kwa minyololo. ³⁰ Nu mutwa akayimitii, ni nduna, ni Bernikem na awa wakutama nawo. ³¹ Ni apa wakawukiti, wakajowili kukita mundu uyu nukukita lepa kandu kakulinganila kufwa haka minyololo. ³² Leka Agrippa akanjowili Festo, mundu uyu ngahotwili kuwopoleka, wona akabkemili lepa Kaisar.