¹ U Paulo, nu Silwano nu Timotheo kushibhanza isha Bhathesalonike kulitawa lya uMulungu nu taata mwene uYesu Krisiti. Uwinza nu wihalo vibhe peeku nimwe. ² Tukufumwa isalifwo kwa Mulungu wila bhulo mwendi, wetubhateha mupuuto zyitu. Tukukumbuha nutata witu imbombo yitu iya lwitiho. ³ Kudaaga uwalugano, uwujimbilizu uwamaha agamuilongolela aga mwene uYesu Krisiti. ⁴ Abha mwitu mwu Mulungu, abhaganile tumanyile ulwitiho lwinyu. ⁵ Anza shindumbiliho zyitu zyilile kukunyu tekukwizwi bhulo ha, yoli kumaha, amupepu umufinjile, nuwana lyoli, anzashinisho, mumanyize kuntitwe twali bhuli bhuli mukansi yinyu mumwinyu. ⁶ Mwali mwabhandu bhakutwenyezya itwe numwene, anzashemwaposhelenye izwi amayimba nuwinza kufuma kumupepu umufunjili. ⁷ Kufumilana nigo, muhabha mwabhinza kushila abhandu abha muMakedonia nu Akaiya bhala bhebhitishile. ⁸ Kwe kunti kufuma kukwinyu izwi lya Mulungu lisatile mwondi, te Makedonia nu Akaiya abhenebhulo. Popondi palala ulwiho lunyu luviwishile kufuma mwa Mulungu livwishile mwondi nagegaloleshile, tutakwanzilwa kulonga nazimo. ⁹ Kwe kunti bhibho abhene bhakelonga kwinza kwitu wali bhulibhuli mukasi yinyu bhakupembulila she bhahamugalushila uMulungu kufuma mushifwani kumubhola u Mulungu we mwumi uwana lyoli. ¹⁰ Bhaletile inpembu kunti mukumugulila umwana wakwe kufuma kumwanya. Wamazyashile kufuma kubhafwe unu wuYesu, muwusafushe kufuma muyimba yega hayinza.