¹ Upauli mubhomvi wa Yesu Krisitu kubhaganwa bha Mulungu, nalyoli lilyo ahadi iya bhupuma bhwebhuli mukasi ya Ukristu Uyesu, ² Pe Utimotheo umwana umuganwa: Ubhwila, ulusankano nu mutende kufuma kwa Mulungu Tata nu Ukristu Uyesu Mwene witu. ³ Nkumusalifwa Umulungu, wenkumubhombela ku umwoyo umwinza ngati vwebhahabhomba abhatata bhane, pelwenkukumbuha inkani ku kuputo yane. ⁴ Ubhusiku nu musanya kunyonywa kukwenya, ili inga imbe nu luseshelo. Nkukumbuha amansunzi gaho. ⁵ Nabha newakubhakumbusya kubha ulwitiho lwabho, lwe apa woka lwatendime kwa nyehokulu wakwe Loisi nu mayi wakwe Yunisi.Nu nanu nalyoli ya kubha nulwitiho iyo yikutendama mukasi yako ⁶ Shehifukwa nukukumbusya kuzunjizya ishipaji sha Mulungu sheshili mukasi yaho kwidala ilya kubhiha inyobhe yane. ⁷ Kwekuti Mulungu atahatupa umwoyo wa lwiga, loli iya maha nu lugano nu mushinzi. ⁸ Ku lilyo utahamwenyezye bhulo ku mbombo zya Mwene witu, pote wane nine Pauli umupinywe wakwe. Loli ukubha poka kumayimba kujulu ya mazwi aganalyoli na amaha ga Mulungu. ⁹ Pe Umulungu weahatupoha nu kutwita kundajilo ifinjile. Kutahabhombwa ishi kulandata nimbombo zwitu loli kulandata nu bhwila na vweahapanga kwakwe wuyo. Ahatupa imbombo haya ku Kristu Yesu lwashili ahabhalilo ahabhwandilo. ¹⁰ Bhope isalizi ubhulokole ubhwa Mulungu bhwigulilwa kwa kwinza kwa mupoha witu Kristu Yesu. Nu Kristu wakomesizye ifwa nu kuleta ubhupuma bhwebhutali nubhumalilo ku mwanga wa mazwi. ¹¹ Kushifukwa isho nkasebha kubha mulumbilizi, iyambombo nu musambilizi. ¹² Sheshifukwa ishakuyimba nawope, loli ntakwenya ishi kwekuti mumanyile wuyo wembwezizye kumwelebhwa. Ndili nubhunalyoli kubha uwene ahabhwezya kusengula shila shenamupiye kukwakwe kwi siku lila. ¹³ Ukumbushe ishifwani isha kalalata bhwa bhuzelu bhwebhwivisile kufuma kukwane, poka nubhuzelu nu lugano bhwebhuli mukasi niya Kristu Yesu. ¹⁴ Gasengule amambo aminza gaahakupa Mulungu kufumila Kumupepo Umufinjile atendime mukasi yitu. ¹⁵ Umanyile ya kuti, bhonti bhebhakutendama ku Asia bhandesile. Kwi shibhunga ishi Figelo nu Hemogene. ¹⁶ Mwene uyipelelezye inkaya ya Onesiforo kwekuti u lwinji ahakobhosyaga na atahanenyezyaga insoni iminyororo yane. ¹⁷ Loli uwene, paali Kuroma ahandondolaga ku maha nu kunaga. ¹⁸ Umulungu amwavwe kulwaga lusankano kufuma kukwakwe isiku lila. Inza vweahanavilizya penali Kuefeso, iwe umanyile ahinza.