¹ "Ku bhahabhizya bha shibhanza sha Efeso simba: 'Aga ge mazwi gaghula we alemelaye zila inzota saba munyobhe zyakwe iya ndilo. Uwene akujenda mubhuzelu bhwa zahabu ya nyale saba akuyanga ishi," ² ""Imanyile she ubhomvile nu kuyituma kwaho ni mbombo nubhujimvu bhwaho ubhwanalyoli, nukuti utahondeye kuyisanganya nabhope bhebha mbibhi, pe ubhayezizye bhonti bhe bhakuyitaha ukuti bhasundikwa, fwandi te bhabho pe bhayilolesyizye ukuti bhaluma lenga. ³ Imanyile we mugulilizi, na wajenzite abhinji panongwa yi zina lyane, na utaalisite ushili. ⁴ Loli ili lye ndilinalyo pilonolela lyakwe, umulese ulugano lwaho ulwa bhwandilo. ⁵ Inga lumo kumbuha pe uguye, upinduhaje nukubhomba imbombo yewabhomvile kufuma pabhwandilo.Inga utakupinduha, kwinza kukwaho nukwefwa ubhuzelu bhwaho kufuma pabhuzilo paho. ⁶ Loli iwe ulinili, ukunkalalila gala ge Abhanikolai bhaga bhabhomvile, ge nine bhwelele genkugahalalila. ⁷ Inga ulinikutwi, tejelezya gala ge Umpepo akuvibhuzya ivibhanza. Na kwa wula wakupota ndimpa nukumwitishizya ishakulya kufuma mkasi mwikwi lyabhulanzi bhwebhuli mparadiso ya Mulungu.' ⁸ "Kwahabhizya uwa shibhanza isha Smirna simba: 'Iga gemazwi gawula we wabhwandilo na wabhumalilo we afuye nukubha nubhulanzi habhili; ⁹ ''''Ngamanyile amayimba gaho nu bhupina bhwaho (loli iwe we dumbwe), nilenga lyabhala bhebhakuyitizya bhebha yahudi (loli te bhabho vibhanza vwa Mukwalanzi). ¹⁰ Utahogope amayimba gegangakwaga. Yenya! Umkwalanzi akwanza kubhasumbila bhamu mubhupinywe inga mbhwezye kulinjizwa, Pemliyimba kunsiku ishumi lyoka. mbhanje bhasubhalilwa kwinza kwe kufwa, Pe ndilibhapa inkiha iya bhulanzi. ¹¹ Inga ulinikutwi, tejelezya Umpepo sheakuvibhuzya ivibhanza. Uwene we akupota tahapate ubhuvwalale ubhwa fwa iya bhubhili.' ¹² "Kwa habhizya wa shibhanza sha Pergamo simba: 'Aga nalyoli akuyanga uwene weali nabho ubh ipanga umuhali, we ahozile kubhili. ¹³ ""Imanyile pa bhuzilo pe akutendama - pabhuzi pe shili ishitengo sha bhumwamu bhwa munkwalanzi. Inza bhwebhulo bhahalema inkani kwizina lyane, nu utahahana ulwitiho lyaho lweluli ku kwane, ni sinku zila izya Antipasi umushimishizyi wane, umusubhalilwa wane we amamafuye mukasi yinyu, apo pe Umunkolanzi akutendama. ¹⁴ Loli ndili imbombo inyinsi niwe: ulinabhope uko abhantu bhalemeleye ivisambilizi vwa Balaamu, uwene amamusambilizizye Balaki ukubhiha ivwa kuchinga pilongolela ya bhana bha Iziraeli, inga bhalye ivwakulya vwevwafumila kwa milungu nu kumbibhi. ¹⁵ Mukasi ya bhabhele, iho niwe ulinabhope bhamo mwibho bhagalemile amasambilizyo ga Bhanikolai. ¹⁶ Pelelo pinduha! Pe utahambombe ubhwo, kwinza nalubhilo, nu kubhomba ubhulugu kulusya abhene kwa kwipanga bhwebhukufumila mwilomo lyane. ¹⁷ Inga uli nukutwi, yivilizya Umupepo sheakubhabhuzya imushibhanza. Uwene weakupotwa indimupa vimo ibhwe izelu lye lisimvilwe izina ipwa pamwanya wa libhwe izina lye nawumo alimanyile loli uwene wuyo aliposheleye.' ¹⁸ "Kwa bhahabhizya wa shibhanza sha Thiatira simba: "Aga ge mazwi ga Mwana wa Mulungu, uwene weali na minso gakwe inza vwe mwilo wa mwoto, ni vinama ngati ishaba yigulumulilwe inkani: ¹⁹ ""Umanyile she umubhomvi - ulugano lwaho nu lwitiho lwaho ni mbombo nu bhujimvu bhwaho ubhwanalyoli, nu kuti shila shuhashibhomba ishi papipi nkani isha shila shuhashibhomba pabhwandilo. ²⁰ Loli indinalyope ili kukwaho: Ukumuzulila umwantanda Yezebeli weakusita wuyo weka mukubhwi umwantanda. Ku visambilizyo vwakwe, akubhagombaniha abhasundkwa bhane kubhembuha nu kulya ishakulya she shifumwizwe shabhwila kushihotanyo. ²¹ Namupiye ha kupinduha, loli atakwitiha kuleha ubhubhibhi bhwakwe. ²² Yenyelezya! nkumupa ishitala isha mabhinu na bhala bhebhakubhomba ulubhumbu nawope kumayimba amahali, inga te bhwebhwe pinduha kushe abhabhomvi. ²³ Ndilibhahoma na mabhwe abhafwe ni vibhanza vwonti vilimanya ukuti ine nene ne kwenyelezya minsibho ni vinyonywa. Ndilimupa kila woka winyu ku mbombo zyakwe. ²⁴ Loli ku bhamo mumwinyu mwe musyaye mu Thiatira, kubhala bhonti mwemutakulema ivisambilizi ivi, nu na mwemutamanyile shila she bhamo bhakuti vwili vwa munkwalanzi, nkuyanga kukwinyu, 'intalibhiha pamwanya yinyu ubhumwamu bhwo bhwonti.' ²⁵ Pe mulyolyonti, mubhanje na maha paka pe ndiyinza. ²⁶ Wowonti akuzipota nu kubhomba shila she nkubhomba paka pabhumalilo, bhwakwe indimupa amaha pa bha munsi. ²⁷ 'Ahabhalongozya ku ndisa ya shijela, inza vwe beseni, litope, alibhabazulanya vipusapusa.' ²⁸ Inga vwe naposhela kufumila kwa Tata wane, indimupa wope inzota iya nzachi. ²⁹ Penga uli ni kitwe, yivilizyaga shila she Umupepo akuyabhuzya ivibhanza.'