¹ Ishi she shitushzya sha Yesu Kirisitu she Umulungu ahamupa ingape kulolesya abhabhomvi bhakwe ivintu vwe vwinza kwimpupa. Ahabhomba zimanyishe ukuti kumulajizya uhabhizya wakwe ku mubhomvi wakwe Uyohani. ² Uyohani ahafumwa ulusimishizyo ulwa shonti shila she ahashila izya ni mazwi ga Mulungu nu ku lusimishizyo lwe lufumilwe izya Uyesu Kirisitu. ³ Alotwaje uwene we akubhazya mukuhola na bhala bhonti bhe bha kugivwa amazwi ga mukubhwi unu nu kuvwila she shisimvilwe umo, panongwa ahabhalilo hapalamila. ⁴ Uyohani, ku vibhanza saba gegali mu Asia: ubhwila bhubhanje kukwinyu nu bhwihalo fufumila ku kwane we alipo, na weamalipo pe nawealiyinza, nu kufumila kwa mupepo saba pilongolela yi tengo lyakwe isha bhumwamu, ⁵ nu kufumila kwa Yesu Kirisitu uwene we musimishizyi, musubhalilwa mupapwa wa kwanda wa bhebhafuye, pe mulongozi wa bhamwene wa nsi ino. Kukwakwe uwene atuganile pe atubhisile bhasatulwa kufumila mumbibhi zyitu kwi bhanda lyakwe, ⁶ atugomvile tubhe swe bhamwene bha Mulungu nu Tata wakwe - kukwakwe kubhanje ubhu mwanu nu maha shima na shima. Amina. ⁷ Yenya, kwinza na mabhingu; kila lyinso lilimwenya, poka na bhonti bhebhamupemvile. Ni nkolo zyonti izya nsi bhalizinda kukwakwe. Nalyoli, Amina. ⁸ "Ine ne Bhwandilo nu Bhumalilo," ahati Mwene Mulungu, "Uwene wealipo, pe weamalipo,pe nawealiyinza, Umwene maha." ⁹ Ine, Neyohani - umujenzi winu woka wealipoka nimwe mumayimba pa bhumwene nu bhujimvu ubhwanalyoli bhwebhuli mwa Yesu; namile mukasi munsungo she izina Patimo panongwa ya izwi lya Mulungu nu lusimishizyo kusubhila Uyesu. ¹⁰ Namile mwa Mupepo isiku lya Mwene. Nkivwa kwisinda lyane izwi lya pamwanya ngati ilya lisaji, ¹¹ yikuyanga, "usimbaje mu kalata geukugenya, nu kugalajizya ku vibhanza saba, kubhala Efeso, kubhala Smirna, kubhala Pergamo, kubhala Thiatira, kubhala Sardi, kubhala Philadelphia, nu kubhala Laodikia." ¹² Nkagalunkana kwenya ni izwi lya nanu weamali ahayangaga nine pe lwe nagalunkana na inkenya ubhuzelu bhwa zahabu zya nyale zisano. ¹³ Pakasi pa bhuzelu bhwa nyale amali woka ngati Mwana wa Muntu, azwaye inkanzu intali yeyefisile pansi ya vinama vwakwe, nu lamba wa zahabu zungula pashifubha shakwe. ¹⁴ Itwe lyakwe ni nsisi zyakwe zyamile nzeru inza inganda inzeru inza majela,na minso gakwe gamile inza mwilo wa mwoto. ¹⁵ Nivinama vwakwe vwamile inza viponda vwe vigulumilwe nkani, ngati viponda vijenzizwe pa mwoto, ni zwi lyakwe yamile ngati mazwi ga minzi gegakuchongoloha ku maha. ¹⁶ Amali amalemeleye inzota saba munyobhe zyakwe izya kundilo, nu kufumila mwilomo mu mumwakwe mwamile nu panga ahali lyelyahozile kubhili. Isheni shakwe sha lamile inza bhuzelu ubhunali ubhwa lizubha. ¹⁷ Lwenamwenya, nkagwa pavinama vwakwe ngati muntu weafuye. Ahabhiha inyobhe yakwe kunyobhe indilo papane pe kuyanga, "Utogopaje! Ine ne wa bhwandilo na wa bhumalilo, ¹⁸ pe nemulanzi. Namile nafuye, loli yenya, nemulanzi shima na shima! Indi ni wigulilo vwa bhufwe ni vwa kubhuzimu. ¹⁹ Penga lumo, simbaga geugabhonyi, gegaliko isalizi nagala gegaliyinzaga lwe gashila iga. ²⁰ Pekuti sheshavwamile izya nzota saba zye wazibhwenyi munyobhe zyane iya kundilo na shila ishizelu sha zahabu sha nyale saba : inzota saba ni bhahabhizya bha vila ivibhanza saba, nu bhuzelu bhwa nyale vwe vila ivibhanza saba."