¹ Pa bhwandilo lyalipo Izwi, pe Izwi lyamile poka nu Mulungu, ni Izwi lyamile Umulungu. ² Ili, Lizwi, Pabhwandilo lyali poka nu Mulungu. ³ Ivintu vwonti vihagombwa kujendela uwene, penga atalipo uwene penashimo ishintu shoka shihagombwa. ⁴ Mukasi yakwe mwamile ubhulanzi, nubhwo ubhulanzi bhwamile bhuzelu bhwa bhanamuntu bhonti. ⁵ Ubhuzeru bhuhalamaga mushisi, pamo ishisi shitahazimwa ⁶ Amalipo nu muntu we ahatumwa kufuma kwa Mulungu, we izina lyakwe amali Uyohani. ⁷ Ahinza inzavwe musimishizi kwenyelezya izya bhuzelu, ingape ukuti bhonti bhahondeye kusubhila kujendela uwene. ⁸ Uyohani atamile bhula ubhuzelu, loli ahinza ingape kuti ayenyelezye izya bhuzelu bhula ⁹ Ubhwo bhwamile bhuzelu bhwe bhwamile bhuhinza munsi bhope bhuhalolesya bhuzelu wonti wula ¹⁰ Amali munsi , ni nsi yihapelwa kujendela wuyo, ni nsi yitahamumanya. ¹¹ Ahinza kuvintu vwakwe, na bhantu bhatahamuposhela . ¹² Loli kubhala abhinji bhebhaposheleye, bhebhasubhiye izina lyakwe, kwibho ahabhapa ubhugolosu ubhwa kubha bhana bha Mulungu, ¹³ bhe bhapafilwe, te mwi bhanda, pamo mukwanza kwa mubhili, pamo mukwanza kwa muntu, loli kwa Mulungu wuyo weka. ¹⁴ Lyope Izwi lihagombwa mubhili peahatendama mukasi mumwitu, twenyizye ubhumwamu bhwakwe, ubhumwamu inzavwe wa bhantu bheka weka weahinza kufuma kwa Tata, ayizuye ubhwila nu bhwanalyoli. ¹⁵ Uyohani ahasimishizya izya wuyo, pe ahahola izwi ahati, "Uno wuyo we nkayanga izwi lyakwe inkati, "Wula weakwinza papane mupiti kushila ine, panongwa amalipo lwe ine nashili." ¹⁶ Kwekuti kufuma mubhulunjishu bhwakwe, iswe swenti tuposheleye bhwelele isha bhwila pisinda ya shabhwila. ¹⁷ Kwekuti inkomelezyo yihinza kujendela Musa. Ubhwila nu bhwanalyoli vihinza kujendela mwa Yesu Kirisitu. ¹⁸ Atalipo mwanamuntu we amubhonyi Umulungu ahabhalilizyo hohonti. Umuntu weka we Mulungu, weamile pashifubha sha Tata, amubhisile wuyo amanyinkane. ¹⁹ Ubhu bhwe luhomeshezyo bhwa Yohani kuhabhalilizyo habhashiputo na bhalawi bhebhatumilwe kukwakwena Bhayahudi kumubhuzilizya, "Wenewe we nanu?" ²⁰ Pe ahabhumbula atahazyiha nahamo, loli ahamula, "Ine te Kirisitu." ²¹ Bhwebhulo bhahamubhuzilizya, "penga lumo iwe we nanu isalizi?" Iwe we Eliya? Ahati, "Ine te wuyo." Bhahayanga, Iwe we mukubhwi? Ahamula," Temumo." ²² Pe bhahamubhuzya, "Iwe wenanu, ingape ukuti tubhape ilyamulo bhebhatutumile"? Bhayenyezye bhabho bheka ?" ²³ Ahati, "Ine ne lizwi lyakwe weali mulugwa: 'Golosyaji amagala ga Mwene,' inzavwe mukubhwi Isaya amayanjile." ²⁴ Pe kwamile na bhantu bhatumilwe pala kufuma kwa Mafarisayi. Bhahamubhuzilizya nu kuyanga, ²⁵ "Shoni she ulwozyo bhuli inzavwe iwe te Kirisitu pamo Eliya pamo mukwubhwi?" ²⁶ Uyohani abhatamula ahati, "Nkubhozya ku minzi. Inza bhwebhulo, mukasi yinyu ahimilila umuntu we mutamumanyile. ²⁷ Uno we akwinza kwisinda yane. Ine ntahondeye kuzegevwa inkusa zya vilyato vwakwe." ²⁸ Zyonti izi zihabhombeha kula Bethania, kwisyila ya Yordani, pabhuzilo pe Uyohani amali ahozyaga. ²⁹ Isiku lye lihalandata Uyohani ahamwenya Uyesu ahinza kukwakwe ahayanga, "Yenya umwana wa ngole uwa Mulungu ayeje imbibhi zya munsi! ³⁰ uno we nkayangaga amazwi gakwe inkati, "Uwene we akwinza mwisinda lyane we mupiti kushila ine, kwekuti amalipo lweine nashili.' ³¹ Ntamumanyile uwene, loli lyagomvile bhwebholu ingape ukuti ayigullwe Muiziraeli, ukuti nkinza nkozyaga ku minzi." ³² Uyohani ahasimishizya, "Inkenya Umupepo akwiha kufuma kumwanya shiholanyo sha nkunda, pe yihasyala papakwe. ³³ Ine ntahamanya loli uwene weamantumile ingape imwozye kumunzi ahambuzya, 'wula we ulimwenya Mupepo akwiha kutendama papakwe, Uwene weakozya kwa Mupepo Umufinjile.' ³⁴ Nenyizya pe insimishizizye ukuti uno we Mwana wa Mulungu." ³⁵ Pe isiku lye liha landata Uyohani amali amimiliye poka na bhasundikwa bhakwe bhabhili, ³⁶ bhahamwenya Uyesu akujenda nu Yohani ahayanga, ''Yenya, Umwana wa ngole waMulungu!" ³⁷ Abhasundikwa bhabhili bhahamwivwa Uyohani akuyanga izi bhahamulandata Uyesu. ³⁸ Sona Uyesu ahagalunkana nu kubhenya abhasundikwa bhala bhakumulandata, pe ahabhabhuzya, "Mukwanza ishoni?" Bhahamula, "Mwene, (kwekuti musambilizi,' utendama kwiyi?" ³⁹ Ahabhabhuzya, "Nzaga pemwenye."Pe bhahasogola nukwenya pabhuzilo peamile ahatendamaga; bhahatendama poka wope isiku ilyo, kwekuti yamile habhalilizyo inzavwe hasaa 10 izi. ⁴⁰ Woka wa bhala bhabhili bhebhahamwivwa Uyohani akuyanga peaopo bhahamulandata Uyesu amali nu Andrea, mujenzi wakwe Simon Peteri. ⁴¹ Ahamwenya umujenzi wakwe Simoni na ahamubhuzya, "Tumwazile Umwene" (yeyikusambilizya Kirisitu). ⁴² Ahinza nawope kwa Yesu. Uyesu ahamwenyelezya peahayanga, "Iwe we Simoni umwana wa Yohani" ulitakwa Kefa," (shekuti 'Peteri'). ⁴³ Isiku lyelihalandata ahabhalilizyo Uyesu peahanzaga kwepa kubhala Galilayi, ahamwaga Ufilipo pe ahamubhuzya, "Undandate ine." ⁴⁴ Filipo amamile mwenesho wa Bethsaida, munkaya ya Andrea nu Peteri. ⁴⁵ Filipo ahamwaga Nathanaeli pe kumubhuzya, Tumwajile wula we Umusa asimvile amazwi gakwe munkomelezyo na Bhakubhwi.Uyesu umwana wa Yusefu, kufuma Kunazareti. ⁴⁶ Nathanaeli ahamubhuzya, "Pe shintu shinza shihondeye kufumila Munazareti?" Filipo ahamubhuzya, Nzaga pe wenye." ⁴⁷ Uyesu peahamwenya Nathanaeli ahinza kukwakwe ahayanga, "Yenya, Muiziraeli nalyolilyoli weate nu bhuluma ilenga mukasi yakwe!" ⁴⁸ Nathanaeli ahamubhuzya, "Wamanya bhulibhuli?" Uyesu ahamula pe ahamubhuzya, "Lwe washili Filipo atakwisite lwewamile pansi yi bhul, nakubhonyi." ⁴⁹ Nathanaeli ahamula, "Mwene iwe we Mwana wa Mulungu! Iwe we Mwene wa Iziraeli"! ⁵⁰ Uyesu ahamula ahamubhuzya, panongwa nakubhuzizye 'inkakwenya pansi yi bhula' pe kusubhila? utuyenye imbombo impiti kushila izi." ⁵¹ Uyesu ahayanga, "Subhila subhila nkubhabhuzya mulizyenya imwanya zikwigulwa, nukubhenya abhahabhizya bhakuzubha nukwiha Pamwana wa Muntu."