¹ She bhonti abha shiputo abhapiti, waahabhasebha kufuma mubhamwabho mubhantu, asevilwe kwimilila kulibhabho kuvintu vwevikuyanjila nu Mulungu, inga afumwe poka ivwakupa ni vifinjile panongwa ya mbibhi. ² Angabhwezya kubhomba kubhutosu nabhayubhwi na bhamadali pakuti uwene wope habhili azyunguliye nubhuyeyebhazu. ³ Panongwa ya yili, alinahakubhomba kufumwa ishifinjile panongwa ya mbibhi zyakwe ngati zyakubhombaga kumbibhi zya bhantu. ⁴ Na ataliko nawuo umuntu weakunyatula umushinzi uno panongwa yakwe wuyo, loli she shelipo, yikwanzibhwa Umulungu amwite, ngati vwa mali Uharuni. ⁵ Pope Ukirisitu atahayipa umushinzi wuyo weka pakuyilolesya weka kubha mupiti wa shiputo ishipiti loli sheshilipo, Umulungu ahayanga kukwakwe," Iwe we mwana wane, ilelo ilelo nabha ne Yise waho." ⁶ Pe ngati akuyanga habhili ukwamwabho,"Iwe wemupiti wa shiputo uwa shima wupwaniye na pamadala ga Melikizedeki." ⁷ Kuhabhalilo ahakwe kumubhili, ahaputa na kulabhila, ahalabha Umulungu ku masonzi, ku uwene wa angabhwezya kumupoha kufuma mufwa. Panongwa ya kuyisya kwakwe kwa Mulungu, ahamwivwa. ⁸ Loli lelo amali mwana, ahamanyila kushindiha kumazwi gegahamuyinvwa. ⁹ Ahamalilizwa na kwidala ili ahabhomba kwa kila muntu wamwitisile kubha shiyanjilo sha bhulokole ubhwa shima, ¹⁰ pakusebhwa nu Mulungu ngati mupiti washiputo pahabhalilo ha Melikizedeki. ¹¹ Tulinaminji aga kuyanga kwa Yesu pelelo vigomo kubhalinganwa pakuti imwe mwebhahata bha kwivwa. ¹² Pope shekuhabhalilo iha yikwanzibhwa kubha bhana nyisi, kushili yikwanzibhwa umuntu abhamanyizye imanyinyizyo izya hali mubhutalatibu ubhwizwi lya Mulungu. Mukwanzibhwa izibha nateshakulya ishigomo. ¹³ Kwekuti uwene wakumwela izibha bhwelele atalinukubhelela kwizwi ilya nalyoli, kwekuti ashili mwana. ¹⁴ Ku lubhazu lumo, ishakulya ishigomo sheshabhantu abhasongo, bhala bhebhabheleleye ku leganwa ubhwanalyoli nu bhubhibhi bhamanyiye kumanyailyizya ni bhibhi.