¹ Pe loli Umulungu abhazuzye poka nu Kristu, londolaji imbombo izya pamwanya pali akutendama inyobhe iyandilo kwa Mulungu. ² Sibhilila ukuhu imbombo ya pamwanya te mambo ga pansi. ³ Ipo pe muhafwa na nubhupuma bhwinyu abhuzyisile poka nu Kristu kwa Mulungu. ⁴ Ahabhalilo Kristu paliloleha bhwebhupuma bhwitu penimwe muliloleha nabho kubhushindikwa. ⁵ Pe ipo zyizyihaje imbombo zye zili pansi ya ubhuzelele, ubhunyazu, nubhubhibhi nidala ibhibhi ni vinyonywa vye viputo vya shifwani. ⁶ Pe kushifukwa sha mbombo izi ubhuhali bhwa Mulungu bhukwinza pamwa na abhana bhebhatakushindiha. ⁷ Na kumambo aga imwe pe mkujenda nakwemukutendamaga pakasi papaho. Pesheyikwanziwa mwefwe imbombo izi zyonti. ⁸ Pe ishilaha, nukuhalala, amadala amabhibhi, indigo, ninjangoo imbibhi zyezikufuma mumalomo ginyu. ⁹ Mutasyobhanaje imwenimwe kushifukwa mubhuzuye ubhuntu bhwinyu ubhwa hali nimbombo zyakwe. ¹⁰ Muzyaye umuntu ubhupwa bhebhugombilwe ubhupwa mulininjele ukulingana nishifwanishizwo nula wahamugomba. ¹¹ Pekunjele izi, kutali Myunani na Myahudi, kujizelufwa, wamanyiye, nawatamanyiye, umuzya, nawetemuzya, pe ini yakwe Kristu ni mbombo yakwe yonti kubhonti. ¹² Ku wasebhilwe nu Mulungu, abhazelu nabhagan'wa, yizwalizye ubhuntu ubhwinza, ubhutesi, ukuyisya ubhupole nubhujimbilizu. ¹³ Kuyatulilana imwe kwimwe. Mpelelanaje uwila numuntu nuwamwinu. Nza muntu kuyangana nuwamwabho, muhobhoshele bhwebhulo inza vu Mwene abhahobhosheye imwe. ¹⁴ Pe namambo iga gonti mwime nulugano lwe luli ni shigezo sha ubhwanalyoli. ¹⁵ Umutende wa Kristu yibhalongozye mumwoyo mumwinyu. Pe yili iya mtende ino ukuti abhita kumubhili woka. Mubhe nulusalifwo. ¹⁶ Ni izwi lya Kristu litendame mkasi mumwinyu kubhudumbwe. Kumshinzi wonti tumanyizanye nukuyangana itwe tweka kusaburi, kunyimbo nizya kumupepo. Mwimbaje kusalifya mumoyo gitu kwa Mulungu. ¹⁷ Nisheshonti she mkubhomba amazwi au kumbombo bhombaji gonti kwizina lya Mwene Yesu. Mpanje kumsalifya u Mulungu utata kujendela ghuyo. ¹⁸ Abhantanda, bhayisye kubhalume bhinyu abhashibhinyu inzavye yikuhondezya kwa Mwene, ¹⁹ Nimwe mwebhanavuli, mbhagane abhashi bhinyu mutabhanje mwebhali kukwabho. ²⁰ Abhana ,bhabhashindihaje abhatata kumambo gonti ipo pekumuhobhosya Umwene. ²¹ Abhatata mutahayubhanyaje abhana bhinyu, bhatahinze bhahatape. ²² Abhazya, bhashindishe abhamwene bhabho kumubhili kumbombo zyonti, teukuhudumila kuminso kubhantu bhakuhobhosya, ila kumwoyo wa nalyoli. Umunyile u Mulungu. ²³ Shoshonti she mkubhomba mubhombaje kufuma inafasi mumwinyu kwe kwa Mwene na tebhabhabinadamu . ²⁴ Mumanyile ukuti mliposhela itunzo iya bhumilibhaji kufuma kwa Mwene. Nu Kristu Mwene we tukumubhombela. ²⁵ Kushifukwa sh kugomba gegatali nu bhwanalyoli yukuyibhomba kutali kumuhobhoshela.