¹ Ilelo, umuntu woka amali Anania, nu Safira umushi wakwe, bhahakazya ubhuzilo bhwa vwuma, ² nukuzyiha ubhuzilo bhwa feza yebhakazya ( umushi wakwe wope amalimanyile ili), pe bhahinza nubhuzilo bhwebhwasyaye nukubhiha muvinama vwa bhabhomvi. ³ Pe uwene Upeteri ahati, "Anania, shoni she umunkwalanzi awizuye umwoyo waho kuyanga ilenga kwa Mupepo Umufinjile nu kuzyiha ubhuzilo bhwa shuma sha mugunda? ⁴ Pe lyashili kukazwa, litamileshuma shaho? Pe lwe wakazya, litamile pansi ya lyamulo lyaho? Zyali bhulibhuli kusibhilila zyonti izi mumwoyo waho? Utabhalumiye ilenga abhana muntu, loli umulumiye ilenga Umulungu." ⁵ Peayivwa amazwi aga, Anania ahagwa pansi ubhulanzi bhuhazima. Ni lyoga ipiti lihabhinzila bhonti bhebhahivwa ili. ⁶ Abhalumendo bhahinza pilongolela nukumunzinga numwenda umuzelu, nu kumufumwa kunzi nu kumufushila. ⁷ Lwe twashila utubhalilizyo tutatu bhulo, umushi wakwe ahinjila mukasi, ataamanye nashimo sheshibhombesile. ⁸ Upeteri ahati, "Mbuzye, inzavwe mwakazizye umugunda bhwebhulo." Ahati, "Nalyoli, bhwebhulo." ⁹ Pe Upeteri ahamubhuzya, "Zikubha bhulibhuli ukuti mwivwine poka ukumuyezya Umupepo wa Mwene? Yenya, ivinama vwa bhala bhebhamuswila umulume waho shili mumulyango, pe kuti bhakunyatule niwe kukufumwa kunzi." ¹⁰ Lubhilolubhilo ahakwa pa vinama vwa Peteri, ahazima ubhulanzi, na bhala abhalumendo bhahinza mukasi bhahamwaga afuye hali. Bhahamwega nukumufumwa kunzi, nukumufushila papipi nu mulume wakwe. ¹¹ Ilyoga ipiti lihinza pashibhanza shonti, na pabhantu bhonti bhebahivwa zyonti izi. ¹² Vimanyilo iwinji ni visukumizyo vihinza vihafumila mumwabho mubhantu kujendela munyobhe zya bhabhomvi. Bhali poka munyumba zya Solomoni. ¹³ Pe, atalipo umuntu uwunji we amali na maha kubhapoka nabho; pe bhwe bhulo bhabhashindishile ya pamwanya ya bhantu. ¹⁴ Pe wope, abhasubhile abhinji bhamile bhahonjelaga kwa Mwene, ¹⁵ ubhwinji ubhupiti bhwa bhanavuli na bhantanda, ishipimo ukuti shali bhabhejile abhabhinu munkaya, nukubhakasya muvitala na mumakochi, ingape ukuti Upeteri pe inga kujenda, ishizunguli, shakwe shihondeye kwiha papabho. ¹⁶ Napo wope, ubhwinji ubhupiti bhwabhantu bhahinza kufuma munkaya yeyazyunguliye Yerusalemu, bhahinzaga abhabhinu na bhonti bhebhizuye ni mpepo imbibhi, na bhonti bhahapona. ¹⁷ Pe umupiti wa shiputo ahimilila, na bhonti bheamamile nawope (bhebhali bhavibhanza vwa masadukayo); pe bhahinza bhizula nu bhuzubha ¹⁸ bhahagolosya inyobhe zyabho kubhalema abhabhomvi nu kubhabhiha mukasi mwijela lyabhonti. ¹⁹ Pe ahabhalilizyo habhusiku uhabhizya wa Mwene ahigula amalyango ga jela nu kubhalongolela kunzi nu kuyanga, ²⁰ "Sogolaga, mwimilile mushibhanza nukubhabhazya abhantu amzwi gonti aga bhulanzi ubhu." ²¹ Lwe bhivwa ili, bhahinjila mushibhanza pe kwasejelela kusha nu kusambilizya. Loli, uwashiputo umupiti ahinza na bhonti bhe amamile nabhope, nukwitizwa abhalonzi bhonti poka, na bhasongo bhonti abha bhantu bha Iziraeli, nukubhasontelezya kwijela ingape kubhatwala abhabhomvi. ²² Loli abhabhomvi bhebhahabhala, bhatahabhaga mwijela, bhahagaluha nukuyanga zyonti, ²³ "Twaga ijela ligalile ahinza inkani, na bhasirikali bhimiliye pamulyango, loli lwetwamile tukwigula, tutahenya umuntu mukasi." ²⁴ Isalizi ahabhalilizyo musunga shibhanza nu washiputo umupiti lweayivwa amazwi aga, bhahabha lusukumilo ulupiti panongwa yabho bhahasibhilila zingabha bhulibhuli izi. ²⁵ Pe woka ahinza nukubhabhuzya, "Abhantu bhemwabhabhisile mwijela bhimiliye mushibhanza nu kusambilizya abhantu." ²⁶ Lwe umulongozi ahabhala nabhope na bhabhomvi, pe bhabhinza, loli bhatahabhahandamizya, panongwa bhahabhanyila abhantu bhahondeye kubhahoma namabhwe. ²⁷ Lwe bhinza nabho, bhahabhabhiha pilongolela ya bhalonzi. Umwashiput umupiti ahabha bhuzilizya ²⁸ ahati, "Tuha bhalagizya mutasambilizyaje kizina ili, pe mushili mwizuzizye Yerusalemu kuvisambilizyo vwinyu, nu kunyonywa ukwinza ibhanda lya muntu umo papitu." ²⁹ Loli Upeteri na bhabhomvi bhahamula, "Hnza kumwivwila Umulungu kushila abhantu. ³⁰ Umulungu wa bha tata bhitu ahamuzusya Uyesu, wemuha mugoga, nukumubhiha pamwanya pikwi. ³¹ Umulungu ahamuzuvwa munyobhe yakwe iya ndilo, nukumubhiha abhe mupiti nu muposhi, kufumwa ulupinduho ku iziraeli luhobhoshelo lwa mbibhi. ³² Iswe swe bhasimishizi bhazyonti izi, nu Mupepo Umufinjile we Umungu amufumizye kubhala bhebha kumwivwila." ³³ Abhantu bha bhabhalonzi lwebhivwa izi, bhahalemwa ishilaha bhahanzaga kubhagoga abhabhomvi. ³⁴ Loli ubhalisayi weamali Gamalieli, musambilizi wa nkomelezyo, amali wa mushinzi na bhantu bhonti, ahimilila nu kubhalajizya abhabhomo bhanyatulwa kunzi kuhabhalilizyo ahansi. ³⁵ Pe ahati, "Bhanavuli bha Iziraeli, mubhanje bhashevu inkani kusubhila she mukwanza ku bhabhombela abhantu ibha. ³⁶ Panongwa, zya kwisinda zye zihashila, Theuda ahimilila nu kuyizuvwa ukuti muntu umupiti nu bhwinji bhwa bhantu, bhahabhanga 400 bhahamulandata. Ahabhagoga, bhonti bhebhahamwivilaga bhahepa nu kutegana. ³⁷ Lwe umuntu uno, Yuda mgalilayi, ahimilila isinku zila izya kubhazya isensa, ahita abhantu abhinji mwisinda lyakwe. Nawope ahatega na bhonti bhebhamile bhahamwivwilaga bhahanyampana. ³⁸ Isalizi nkubhabhuzya, muyefwaje na bhantu abha mubhaleshe bhene, panongwa, inzavwe penga bhasivile pamo imbombo ino ya bhantu yilisumbilwa. ³⁹ Loli inzavwe ya Mulungu, mutahondeye kubhadindila; muhondeye kuyaga muli mukudalinkana nu Mulungu."Pe, bhahitiinkana na mazwi gakwe. ⁴⁰ Pe, bhahabhaholela abhabhomvi mukasi nu kubhasyempa nu kubhalajizya bhatayangaje kwizina lya Yesu, nu kubhaleha bhasogolaje kukwabho. ⁴¹ Bhahepa pilongolela lya bhalonzi bhasesheye nukuyimba nu kusitakushindikwa panongwa yizina ilyo. ⁴² Pengalumo, isiku lyonti, mukasi ya shibhanza nukufuma munyumba paka munyumba bhahajendela kusambilizya nu kulumbilila Uyesu ukubha we Mwene.