¹ Wonti weakusubhila ukuti Uyesu ni Ukirisitu apafilwe nu Mulungu. Pe wonti akumugana uwene we afumiliye kwa Tata wope akubhagana abhana bhakwe. ² Kwi li tumanyile ukui tubhaganile abhana bha Mulungu --petukumugana Umulungu nu kuzibhomba inkomelezyo zyakwe. ³ Ivi vwe tumuganile Umulungu ukuti tukuzilema inkomelezyo zyakwe. Pe inkomelezyo zyakwe pe mpepusu. ⁴ Kwekuti tumuganile wonti weapafilwe nu Mulungu ukuyishila insii. Ubhu bhwe bhupotwe bhwa kutopa insii, ulwitiho lwitu. ⁵ Pe unanu we apositwe insii? We wula we asubhiye ukuti Uyesu we mwwana wa Mulungu. ⁶ Uno we ahinza ku minzi na kwibhanda- Uyesu Kiristu.Atahinza bhulo ku minzi loli kuminzi ni bhanda. ⁷ Kwekuti bhalipo bhatatu bhakusimishizya: Umupepo, aminzi na ibhanda. Abha bhatatu ⁸ bhakwivwana.(Yenyelezya: Amazwi aga"Tata, Izwi, nu Umupepo umufinjile" gatakuloleha ku mumakalata abhinza abha hali). ⁹ Inzavwe tukuposhela ulusimisho lwa bhana munu ulusimishizyo lwa Mulungu lwe lupiti kushila ulwo.Kwekuti ulusimishizyo lwa Mulungu lwe luno-ukuti alinawope ulusimishizyo kujendela mumwana wakwe. ¹⁰ Uwene weakumusubhalila umwana wa Mulungu alinulusimishizyo munsi yakwe wuyo weka. Na wula we atakumusubhila Umulungu amubhisile kubha wilenga, kwekuti atasubhiye ulusimishizyo lwe Umulungu alesite izya mwana wakwe. ¹¹ Pe ulusimishizyo lwe luno -- kuti Umulungu amatupiye ubhulanzi ubhwa shima, nu bhulanzi ubhu bhuli mukasi ya mwanawakwe. ¹² Weali nu mwana alinu bhulanzi. We ate nu mwana wa Mulungu ate nu bhulanzi. ¹³ Nabhasimviye aga mhondeye kumanya kuti mulinabhwope ubhulanzi bhwa shima -- imwe mwe mukusubhila mwizina lya mwana wa Mulungu. ¹⁴ Pe ubhu bhwe bhujinvu bhwe tulinawope pilongolela lyakwe, ukuti inzavwe tukulabha ishintu shoshonti shikubha nza vwe kugana kwakwe, akututejelezya. ¹⁵ Penga tumanyile ukuti akutwivwa--shoshonti tukumulabha tumanyile ukuti tulinashope isho she twamulabha. ¹⁶ Inzavwe umuntu ukumwenya ujenzi wakwe akubhomba imbibhi yeteyakumubhila kubhufwe, yikwanziwa kulabha kwa Mulungu alimuppa ubhulanzi. Nkuyanga kubhala lwe imbibhi yabho yeyila yitakumubhiha kufwa -- kuli imbibhi yikumubhiha kubhufwe -- Intakuyanga ukuti ahandeye kulabha panongwa ya mbibhi iyo. ¹⁷ Ubhunanzi bhwonti zye mbibhi -- loli zilipo kuli ni mbhibhi yeyitakutwala kubhufwe. ¹⁸ Tumanyile ukuti we amapafilwe nu Mulungu atakubhomba imbibhi. Loli we apafilwe nu Mulungu ukusengulwa na wope ahinza shima, na wula umunanzi atahondeye kumuvwalazya. ¹⁹ Tumanyile ukuti iswe swe bhana bha Mulungu tumanyile ukuti insii yonti yili pansi ya bhulongozi bhwa wula umunanzi. ²⁰ Loli tumanyile ukuti umwa na wa Mulungu ayinzile atupiye nu kuzimanya, ukuti tumanyile uwene we bhwnalyoli nu kuti tuli mukasi yakwe weali wanalyoli, pe mukasi ya mwana wakwe Yesu Kiristu. We Mulungu wa nalyoli nu bhulanzi bhwa shima. ²¹ Bhana bhakwe, muyefwaje kumalungu.