¹ Shila sheshalilko kufuma pabhwandilo-shila she tuhivwa, shila she tuhenya na minso gitu, shila she tuhashilola, ninyobhe yitu yihazilema-izya Izwi lya bhupuma. ² Na wula ubhulanzi bhuhabhombeha pabhuzelu, pe tukulola, nu kuziyanga, nu kubhabhuzya bhulanzi bhwa shima, bhwe bhwamile kwa Tata nu bhuhagombeha kumanyiha kukwitu. ³ Shila she tuhashenya na kuvwa twaziyanga na kukwinyu bhulo, inga pe muhondeye kuyisazya poka niswe nu poka nu Tata nu Mwanawakwe Uyesu Kiristu. ⁴ Pe tukubhasimbila ivintu vinivi imwe kuti uluseshelo lwitu lulunjishe. ⁵ Aga ge mazwi getuhivwa kufumila kukwakwe nu kuyanga:Umulungu we bhuzelu na mukasi yakwe mute ishinsi inga hansi. ⁶ Pe inga tukuyanga ukuti tulipoka nawope pe tukujenda mushisi, tukuyanga ilenga na tutakubhomba ubhwanalyoli. ⁷ Loli inga tukujenda mukasi mu bhuzelu, tukuyilinkanya sweswe sweka, ni bhanda lya Yesu Ukirisitu, umwana wakwe yakutuzelufwa kufuma kumbhibhi zyonti. ⁸ Penga tukuyanga tuteli ni mbibhi, tukuyulumila ilenga sweswe sweka, na nalyoli yitalimo mukasi yitu. ⁹ Loli tungazileha imbibhi zyitu, uwene musubhalilwa na mugoloso kutuhobhoshela imbibhi zyitu nu kutwozya nu bhubhibhi bhwonti. ¹⁰ Ingatukuyanga ukuti tutabhomvile ubhunanzi, tukumubhiha uwene amile wilenga na mazwi gakwe litalimo mukasi yitu.