¹ Nine, muyemba na mukulu bhane,ntahayanga nimwe ngati bhantu mumupepo,loli ngati na bhantu bha kubmubhili. Ngati na bhana abhasi ku Kirisiti. ² Nkabhamwesya izibha tenyama, kwekuti mutayisenginwe pakulya inyama. Na pope isalizi mutayisenginwe. ³ Pakuti bado imwe mwe bhamubhili pakuti kunyonywa na kuyila vikuloleha pakasi papinyu mwe. Pe, mutakktendama kuholana numubhili, na pe, mutakujenda ngati kawayida ya bhantu? ⁴ Pakuti woka akuti, "Nkumulandata Upauli"Uwamwabho akuti "Nkumulandata Uapolo," mutakutendama ngati bhantu? ⁵ Apolo wu nanu? nu Pauli wu nanu? Bhabhomvi bha wula wemumwitisile, kwa wula Tata amupiye imbombo. ⁶ Ine nkabhala, Uapolo ahitilila aminzi, loli Umulungu ahamezya. ⁷ Pelelo, te wewula wa bhanawayitiliye aminzi ali na shoshonti. Loli wu Mulungu wakukuzya. ⁸ Pelelo wa kubhwala na wakwitilila aminzi bhalingine, na kila muntu aliposhela umushahala wakwe kuholana ni mbombo yakwe. ⁹ Pakuti itwe twabhabhomba mbombo bha Mulungu, imwe mwe lishamba lya Mulungu, inyumba ya Mulungu. ¹⁰ Kufumila kubhwila bhwa Mulungu bhamupiye ndeti wakuzenga umupiti, nkabhiha ulwalo, na uwamwabho ahazenga pamwanya yakwe. Loli umuntu abhe wakushebha vye yikuzengwa pamwanya papakwe. ¹¹ Pakuti nawumo inga wumo weangazenga ulwalo ulunji nkani kushila wewuhazengwa, wewu Yesu Kirisiti. ¹² Isalizi, ngati woka winyu azenga pamwanya yakwe kusahabu, ihela, amabhwe agamushinzi, amakwi, isole, au amatundu, ¹³ imbombo yakwe yililoleha, kulusanyalwa musanya yililolesya, pakuti yililolesya numwoto. Umwoto wuliloleha ubhwinza bhwa mbombo ya kila muntu shahabhomba. ¹⁴ Inga shoshonti umuntu shazenzile shilisyala, uwene aliposhela amalipilo. ¹⁵ Loli inga imbombo ya muntu yalungulila kumwoto, kutaposhele alipotwa amalipilo, loli wuyo umwenesho alipona, ngati bhwebhwila kupinduha kumwoto. ¹⁶ Mutamanyile kuti imwe mwenyumba ya Mulungu nakuti Umupepo wa Mulungu akutendama mukasi mumwinyu? ¹⁷ Inga umunntu ayinanganwa inyumba ya Mulungu, Umulungu alimunanganwa umuntu uyo. Pakuti inyumba ya Mulungu nzelu, na bhwebhulo nimwe. ¹⁸ Umuntu atayihopehaje weka, anga wumo pakasi papinyu akuti ali numushinzi kuhabhalilo iha, ayime ngati "muyubhwi" pekuta ayime numushinzi. ¹⁹ Pakuti umushinzi wa wansi ino bhuyubhwi pilongolela pa Mulungu, pakuti yisimvilwe, "Bhakulemwa abha mushinzi kubhubhibhi bhwabho" ²⁰ Na habhili "Utata amanyile insibho zya wula uwamushinzi bhunanjisu." ²¹ Habhili umuntu atahayile abhantu! Pakuti ivintu vyonti vyinyu. ²² Inga nu Pauli,pope Uapolo, pope Ukefa, pope insi, pope ubhulanzi, pope ifwa, pope ivintu vyevyilipo, pope vyevyiliyima. Vyonti vyinyu, ²³ na imwe mwe bha Kirisiti nu Kirisiti wa Mulungu.