1 Haweja mpaka ulwandi umonga we bahali mmukowa wa Gelasi. 2 Na kwasinhukisa ugele iyesu foyalawaga kunje yengaliwa, imunhu iwamagini gehile ya mwijila ukwakwe kulawa kufilalo. 3 Imunhu ayu yekalaga kufilalo, hechaka iyeja yadaja kumwimila kabisa, hechaka hata kwa minyolo. 4 Yowa yohigwe chigele chingi na simhingu ne minyolo, shoyodumula iminyolo nesimhingu sakwe hosibenwa, hechaka hata yumwedu yowa noludole lo kumsuma. 5 Ichilo nesimisi yowa kufilalo na mmatunda yagonaga na kitema imwene imwecho na mawe amakali. 6 Foyamona iyesu kwakutali, yabilimila ukwakwe na kufugama hamwande yakwe. 7 Yalila kwakwinula ditwi, “ukwenda nikugolosele choni Yesu mwana we Mulungu yekuchanya lugano, dedede kwi Mulugu imwenye, ungha nhese.” 8 Kwasoko ya mugamba “mulawe imunhu yuno agwe godigini dihile.” 9 Naye hoyomusa “disinadyako nonani?” naye homubidula disina dyangu no Legiyoni kwasoko chaweingi. 10 Kamtasa dedede kahekahe yanghasigale kunje ya mukowa. 11 Hambiya iditewa dikulu dyesinguluwe dya dimigwa kwitunda kuchanya. 12 Naso samutasa dedede kugama, uchitume kusinguluwe ching`ile kusiyawo. 13 Nhafo yasifumila simhepo sihili salawa na kwingila kusi yesinguluwe nasosabilimila hasi ye chitunda mpaka kubahali, nasusumila nguluwe elufumbili isatabugila mubahali. 14 Nawo aweja wadimaa singuluwe wejawatija na kulafa sinhaginhagi sachiya choneke mukaya na muisi, noho wanhu wengi weja walakwija langa chikilafanise. 15 Kamei weja weja kwa Yesu na kimono na kumona imunhu yengiligwe ne simhepo, iyawa neditewa hekala hasi kafasigwa na kena imisungu yakwe yenele, nawo howokogoha. 16 Awaya awajawona chikilafanise kwimunhu yangiligwe nesi mhepo hawowa tamila chikilafanise ukwakwe na kahi asiya singuluwe. 17 Nawo hawakonga kumulonga yaleguke mmukowa wawo. 18 Naye foyengilaga mungalawa, imunhu yowayengilwe ne simhepo yamulonga fina yalute hamwedu naye. 19 Ninga nghamufumila, ninga yamugamba, luta kukaya yako na kuwaanhu wako, na watamila kakugolosela iMundewa, no ubasi woya kwingile. 20 Nhafo yaluta hoyokonga kulonga simbuli singhulu soyagoloselwa na Yesu ukwakwe nedekapoli na chila yumwedu hoyo jumwa. 21 Na ugele iYesu foyaloka keli uwandi umonga yengalawa, ditewa dikulu hodimusegelela kumusunguluta, foyowa kunghingi ye bahali. 22 Na yumwedu wawalongosi wedisinagogi, yenangagwa Yailo, yeja nafoyamona yagwa mumigulu bahaya. 23 Yamutasa lugano na lugano, yekugamba “imwanangu imudodogi yakususumila kufa, nikutasa wije na uike imokono yako muchanya yakwe nhagela kodaha kuwa mougima hoyoishi”. 24 Nhafoo yaluta hamwedu naye, naitewa ikulu dya mwandamila nawo howomufinha habehi wakumusunguluta. 25 Kowa na mufele yalawagwa nesakame yakwe mumiyaka ikumi na mili. 26 Yatabika lugano hasi ya waganga wengi naye yatumiya chila chinhu choyowa nacho hata nhafo nghapataluneka kwa dyodyose ninga nohoyonge sekakwiha. 27 Ya hulika penyeye ikumuhusu Yesu, kame hoyokwija kunyuma yakwe ugele foyande yagenda mugati yaditewa, naye hoyokwafa sisuke sakwe. 28 Kwasoko hakagamba halika ninghakwafa isisuke sakwedu nokuwa mumi. 29 Foyamukwafa kulawa isakame kuleka, na hakakihulika mumutufi wakwe fanaga kahonywa kulawa kunhabika yakwe. 30 Na kwa sinhukisa iYesu hoyomanya kusiyakwe imwenye fanaga uludole lumulawa nayeyabiduka akuna naku mwitewa dya wanhu na kusa nonani yanikwafile sisuke sangu?. 31 Awafusa wakwe howomgamba “ukudyona ditewa dikufufinha no kusunguluta, nagwe ukugamba nonani yanikwafile?”. 32 Ninga Yesu hakalanga aku na kun a kona iyagolose dino. 33 Imufele foyamanya chigoloseke ukwakwe yejayogoha na kukakama, yeja na kugwa hasi hamwande yakwe na kumutamila ichawelu yose. 34 Yalonga ukwakwe, go mwana idihuwi dyako dikugolosa uwe mumi, luta na dihuwi na uhonywe kulawa munhamu ako. 35 Foyowa mukulonga awanhu wamnga weyoweja kulawa kwimulongosi we disinagogi, wekugamba, imwanago kafa,nhani ukugendelela kumu shumbuwa imutufi. 36 Ninga iyesu foyahulike chowende walonga hakamugamba imulongosi wedi sinagogi, unghogohe, huwiladu. 37 Nghamwinghile luneka wowose kilongosa naye, ninga iPetulo, Yakobo ne Yohana, imundugusakwe wa Yakobo. 38 Howoluta mukaya ye mulongosi wedisinagogi naye hoyokona muyuguyugu, ne chililo chingi nokususuhala. 39 Foyengila hakaya, yawagamba nhani mukusinanghala na nhani mukulila? Imwana nghafile ninga kagona. 40 Howomuseka, ninga imwene yawafa wosekunje, yamulonda ibabakwe weimwana neng`ina na waya awowo hamwedu nawo na yengila kugati koyowa imwana. 41 Yalonda ukukono we mwana na hoyomugamba “Taltha koum” nokugamba mwana mudodogi nikugamba inuka. 42 Imwana yenuka chimwande mwande na kugenda (kwasoko yowa na dilika dye miyaka ikumi ne mili) na chimwande howokolwa ne majumo makulu. 43 Yalonga kwalunghwakilo kugamba hechaka wowowse yekwendaigwa kumanya imbuli ino, nahaka wagamba wamwinghe yuta imwana chokudiya.