1 Usikusiki kung`ali wakulu wa makuhani wakitang`anyila hamwedu na wasee, na watulumi nedibalaza dyose dye wasee kamei wamoha Yesu wamwigala kwa Pilato, Pilato kamusa agweye no Mundewa we wayahudi. 2 Kamgamba agweye kulona nafo. 3 Wakulu we makuhani walonga mbuli nyingi machanyha mwa Yesu. 4 Pilato kawosa kahi hukulonga chochose hukona fowekukuguma mbuli sinyingi. 5 Makei iYesu halongile Pilato nanafohai mtosa. 6 Fenefowasoele ugele we sikukuu yekukumuliligwa mohigwa yumwedu, mwohigwa yowemtasile. 7 Hakowaga mwihi kugeleza mgati mukomi mgati mwa wakigawile wekutumigwa gehile gao, hakowaga munhu yumwedu yekwinangigwa malinaba. 8 Ditewa hadija kwa Pilato nokumtasa yagolose kufana foyagolose ako kunyuma. 9 Pilato kawagamba nokulonga mkwenda niwakumulile mndewa we wayahudi. 10 Kosoko hakamanya ni kosoko yo wifu wakulu wa makuhani nawamkola yesu nokwamwigala ukwake. 11 Ninga awakulu we makuhani hawakwisila, ditewa ditowe chowe we umwano kugamba akumuliligwe Balaba, sio ayo. 12 Pilato kawagamba kahi kugamba nimgolose choni imndewa wa wayahudi. 13 Watoa chowe msulumise. 14 Pilato kagamba kagolosa choni mbuli yaki ihile ninga hawongesa kutowa ichowe kongesa no kongesa msulumise. 15 Pilato hakawananga yawabwendese ditewa nokuwakumulila Balaba hakamtowa Yesu simando kamei yekumulafa ili atesigwe. 16 Asikali hawamulongosa mpaka kugati uwaaiya uile kugati kunghambi na wakilunda hamwedu ichitewa che asikali. 17 Wamfasa Yesu inghasu ye ilangi yo mzambalau, kamei waluka mkingilo we miwa nokumfasa. 18 Nokukonga kumbesa nokugamba, shikamoo mndewa wa wayahudi. 19 Nokumtowa mwiywi ne madete no kumtwila mate nokufika mafindi hamwedu yakwe kwakumtunya. 20 Kamei fowamalile kumbesa wamuhambula aiya isuke inelangi ye zambalau, nokumfasa sisuke sake no kumulafa kunje kuluta kumdungisa. 21 Howo mng`ang`anisa mlokanjila kumtasa endage yekwingila mkaya kulawa kumguda yekwinangigwa Simon Mkilene, tatiye Isikanda na Rofu howang`ang`anisa kwinula umsalaba wa Yesu. 22 Asikali hawamwigala Yesu hantu hakwinangigwa Goligotha maana yakwe kutamanula akuku hanhu he maguha ge ditwi. 23 Howomwing`a mvinyo ihasigwe na manemane, kamei honywile. 24 Kamei wekumjung`unja nokigawila sisuke sake nokusitoe kula, kulamula nonani yekwenda yapate chisodo, chiyekwendi yapate kila asikali. 25 Hayuwa saa 3 usikusiku fowakongile kunjung`unja. 26 Weka mchanyha yakwe chibao chianikigwe imbuli Mundewa we wayahudi. 27 Hawamjung`unja hamwedu na mwmunhu meli yumonga ulwandi wakwe we kulume na yumonga kumoso kwakwe. 28 Na amawandko gafikila yalongigwa amo mgati siandikigwe amo katali. 29 Awamonga walokage hawamwiga nokusingisa, amatwi gao nokugamba aa agweye akubena inyumba ye Mulungu nokudijenga majuwa madatu. 30 Kitase gomwenye na uhumuluke hasi kulawa kumting`ong o. 31 Na kosoko, iiya awakulu wa makuhani hawambesa wakilongelesa hamwedu na waandishi no kugamba, haka watasa awamonga ila hakudaha yakitasa imwenye. 32 Kilisito Mndewa wa Isilaeli humuluka hasi hambia kulawa kumting`ongo, ili chone nokukutanga naawaya wasulumisigwe hamwedu na imwene nao hawa mbesa. 33 Foifikila msaa sita chisa chija muisi yose ifika saa tisa. 34 Ugele msaa tisa Yesu hakatowa chowe kudiji ikulu "Eloi, Eloi, lama sabaktani?" nong`amba Mulungu wangu Mulungu wangu yanhani unileke. 35 Awamonga wao awemile fowehulika wagamba langa yekumwinanga Eliya. 36 Munhu yumwedu hoyebidula kaimemesa siki msiponji, noika mchanya ye chibiki che didete kamwingha yonywe. 37 Kamei Yesu yekulila kudiji ikulu no kufa. 38 Dipazia dye inyumba ye Mulungu dikigawa fisuke fili kulawa kuchanyha mpaka hasi. 39 Ofisa yumwe yemile habei na Yesu foyonile kafa mnamna aiya kagamba chawelu umunhu ayu hakowa mwana we Mulungu. 40 Hahowaga baho na wafele haowaga wekulanga kwa hatali mgati umwao hakoumo Maliamu Magidalena (ing`ina we Yakobo mdodo wa yose) na Salome. 41 Ugele yowaga Galilaya hawamwandamila, nokumtasa na awafele wamonga itewa hawakiandamila hamwedu kufika Yelusalemu. 42 Foyowile hegulo na kosoko hayuwa dijuwa dyo kiandaa dijuwa ng`ali ye Sabato. 43 iYusufu wa Alimataya hakeja baho hakowa mjumbe wedibalaza andage aheshimiigwa munhu yekuugojela undewa we Mulungu bila kogoha hoyoluta kwa Pilato no kutasa mtufi we Yesu. 44 Pilato kogoha kugamba Yesu hakowa yafile. 45 Foyapatile uhakika kuasa kugamba kabanika hakamuluhusu Yusufu yalonde ichimba. 46 iYusugu hakowa yegulile isanda kamhulumusa kulawa kumting`ongo, kamoha neisanda nokumwika kusi yenikabuli dikatigwe mwikangalawe kamei kaditongolosa idiwe homulango we kabuli. 47 Maliamu Magidalena ne Maliamu ing`inakwe Yose hawona hanhu hoyezikigwa Yesu.