¹ Hakakonga kulonga nao kwa mbasi, munhu yumonga yahanda mugunda wakwe wa misabibu hakasungulusila ikigo, kukata ikolongo dya kukamila, hakajenga ilingo hoyokwika wemilisi hoyoluta kuiisi ya kutali. ² Ugele wakwe ukafike hakatuma imutumwa wakwe kuwa yawakwimilisa umgunda wakwe yamwigalile si sabibu. ³ Hawamulonda hawamutowa na hawamutaga kunje mikono muhala. ⁴ Hakatuma kahi ukwawo mutumwa yungi ayu naye hawamubulaga na kumuguma malonda mwaitwi na kumugolosela wihi. ⁵ Hakatuma yungi ayo hawamukoma na wamonga wengi hawawatowa, na wamonga kumukoma. ⁶ Hakowa na yumwedu yasigale imwanagwe mwendigwa wakwe ayuno naye haka mutuma ukwawo kundumiliso yakugamba, wakwenda wamogohe imwanangu. ⁷ Ninga awaya wakiwimilisa umugunda hawakitamila wakugamba, ayuno no muhasi, handikoni chimukome na uhasi ukuwa wetu. ⁸ kumutaga kunje yo mugunda we misabibu. ⁹ Kamei yatende nhani ayuya imwendigwa imwenye nugunda we sisabibu?, yakwija na kuwakoma wemilisi waya na umugunda uya we misabibu yakwenda wemilisi wengi. ¹⁰ Diwandiko dino musinati mudisome? Isambi yalemigwa na wajengaji iyo igaluka no sumbi ighulu ya mgati. ¹¹ Imbuli ino ilawa kwe mundewa; nadyo ni ijumo mumeso getu. ¹² Nawo hawahananga kumukola ninga hawogoha amatewa kosoko hawamanya fina imbasi iya kawalonga awene, hawamuleka na kuleuka. ¹³ Howotuma ukwakwe wamonga mafalisayo mahelode uleke wamtegelese kwa simbuli sakwe. ¹⁴ Baho fowamufikile, hawamugamba mufusa chimanya fina agweye kwa munhu wa chawelu, kahi nghukogoha ukulu wa munhu kosoko nghukulanga sifutasa wanhu ninga muchawelu ukufusa injila ye Mulungu, togola no fiswamu kuliha kodi kwa Kaisali ana si nheifo?. ¹⁵ Chimwighe au chinghamwinghe?, imwene hakamanya ichimwefe chawo, hakawagamba, nhani mukuigesa?, nigalileni isendi niilange. ¹⁶ Hawegala, kamei hakawagamba lubonoto aluno lwani? Hawamugamba lwa Kaisali. ¹⁷ Yesu hakawabidula yakugamba mwingheni Kaisali aga Kaisali na ge Mulungu mwingheni Mulungu. ¹⁸ Kamei amasadukayo nwanhu wakugamba fina kwachaka kwinuka wafile hawamulutila na kumusa wakugamba. ¹⁹ Mufasa Musa hakachiwambikila, fina imunduguse we wanhu yaghafa yanhamulaka imuke kachaka mwana imunduguse yamulonde imwanamuke yuya uleke yamelekele wana. ²⁰ Heja yona na wanhu mufungate we ndugu imukulu hakatola ngheleke naye. ²¹ Iwakeli naye hakamulonda haoyokuda, naye ngheleke mwana, na wakadatu naye nheifia. ²² Wose wa mufungate wasalekile kile wana, kundumo ayuya imwanamuke naye hoyokufa. ²³ Mukwinika wafile kokuwa muke wa yehoki?, kosoko wase hakawatola. ²⁴ Yesu hakawabiduka, yekugamba, togoleni musikwagilila kosoko musimanyile amawandiko kahi udaha we Mulungu?. ²⁵ Kosoko awanhu hawakwinuka kulawa kuwafile, wasikutola kahi wasikutoligwa ninga wakuwa fina malaika woile kulanga. ²⁶ Na fina wafele wakwinuligwa, musisomile muchitabu cha Musa sula ye chibiki?. Fina iMulungu fayamutumile yakugamba aniye na Mulungu wa Ibulahimu na Mulungu wa Isaka na Mulungu ya Yakobo. ²⁷ Si Mulungu wa wafile, ninga wa womi, nheifo mukwagilila lugano. ²⁸ Yumonga wa watulumi hakeja na kuwahulika wakulonga naye hakona fina kuwabidula fiswamu hakamusa, mumalagiso gose dilagiso dihoki no dikumwande ye gose. ²⁹ Yesu hakamubidula yekumugamba “ye nghonga nodi yumwedu”. ³⁰ Nagwe umwende imundewa Mulungu wako no u moyo wako wose ne chidoga chako chose, ne misungu yako yose no ludole lwako lwose. ³¹ Na dyakeli, no dino: umwende imiyago fina foukiyenda gomwecho “hechaka ilagiso dingi dikulu kusuma gano.” ³² Ayuya imutulumi yemugamba “chawelu kulonga fiswamu fin iMulungu ni yumwedu, ninga kwachaka yungi ninga imwene du”. ³³ Na kumwenda imwene kwa moyo wose, na umanye wose na kwa ludole lwose, na kumwenda imiyago fina fyo ukiyenda gomwecho, imbuli nghulu kusuma kumulafila iMulungu nhambiko yo kusomigwa na kwingha kose. ³⁴ Naye Yesu yakone fina kawabidula kwa misungu yamugamba “agweye gkwihatali na undewa wa Mulungu,” kulawa baho hachaka munhu wowose yagesile kumusa mbuli kahi. ³⁵ Ugele Yesu foyafusaga mwihekalu hakawagamba “awatulumi wakugamba Kilisito ni mwana wa Daudi”. ³⁶ Daudi imwecho kwa udaha wa muhe wa musunhile kagamba; mundewa yamugamba imundewa wangu ikala umukono wangu wo kulume mpaka niweke awanghondo wako wose hasi ye migulu yako. ³⁷ Daudi imwecho hakagamba, Mundewa aholagaluka mwanagwe nhani?na ditewa dyose wende womutegelesa kwa chinyemi. ³⁸ Mumafuso gakwe hakawagamba “muwe meson a watulumi, awakwenda kugenda wafalile makasu matali na kulamusigwa mumagulilo. ³⁹ Na kwikala kumwande mumasinagogi na magoda ga kumwande mufyakudia fyesi sikukuu. ⁴⁰ Wakudiya kusinyumba sa wageni na kwa chimwefe wakuwomba mawimbi matali, awano wakwija wapata iligabiso dikulu dijuwa sye ndumo. ⁴¹ Naye yekale kulanga disanduku dyowakuguma fowakumulafila Mulungu kulanga amatewa fowaguma amapesa musanduku wagoli wengi hawaguma mengi. ⁴² Yeja mwanamuke yumwedu mwigane, mukiwa, yalafa sendi mbili, kifana nusa ya dipesa. ⁴³ Yawenanga awefusa wakwe, yakuwagamba, chawelu nikumutamilani, ayuno imwanamke, imwigane imukiwa kaguma nyingi kusuma wose wakuguma masanduku. ⁴⁴ Kosoko awowose waguma sigafu; ninga ayuno mu ukiwa wakwe kaguma fyose foyyenafyo ne chakudiya chakwe chose nacho.