¹ Ko olungamva lo, inywe vasa nyi vaka mwinyarye ikufuna ko vomi vanu vavenyi, matika ata chakundu vengi vavo valaode nganyi ko kidedo idya vyorori sa vaka vavo vapedima iburywa kuloda kidedo, ² Ko kitevi ivo vavenyi vapeva vameona nyorori yanu njicha andwamu na nganyi. ³ Iki kuitika nyi ko shilangaa sha nja po -- isuka mbili, shito sha sahabu, sevi sa mtindo. ⁴ Kake iutike ko uganyi ya mumbenyi ya ngoo, na ifue ko uchao na chimbililya na uoloru o ngoo usa nyi uorokye ko Makilunga. ⁵ Mekoje vaka vaale valeilangya vavenyi ko olungamwa lu. Vekeri vamedikija ko Makilunga na vakavikya nganyi ko vanu vavo vavenyi. ⁶ Ko dungamva lu sara nyele vikya nganyi ko Ibrahimu nemlagha icho ''Mndumi'' Wake. Inywe lwaha nyi vana vake chakundu mpeuta vakeri mecha na chakundu mlanogwa mavichwa. ⁷ Ko olunganwa icho, icho inywe voni mwinyarye mdame na vaka vanu mwichi ke ivo vatarama va vaka vafafahye, mkeri va manya ivo chakundu vaadija vanu va sawadi ya moo. Utenyi kudi matika ke keterevo kyanu kilashingywa. ⁸ Ade, inywe vose, muve na ngoo imu, vaode makene, ukundo chakundu vandwavo, vachimbililya, na vaoloru. ⁹ Mlalihe jivichwa ko jivichwa, ana shidengo ko shidengo. Kivari kyake, mdambukye mbora, ko kitevi ki mlelaghwa, matika ke mdime ilaja mbora. ¹⁰ ''Icho auri kunda maisha neona furu njicha lasima naushingye olumi lwake ko mavichwa na monu wake ideda shivichwa. ¹¹ Naghaluka nade mavichwa naute vaja vaorokye. Nashighe amani neivadya. ¹² Meso va Mndumi vechemwo na aode loi na madu vake vecheichwa kiterevo kigake. Kake kyanu kya Mndumi kikeri kivari kya vaja vecheuta unyamari.'' ¹³ Nyi ungacho apevaumisa inywe, mekoje mfugye kikeri kicha? ¹⁴ Kake chakundu mlevini suta ko loi, mode mbora. Mlaogwe shija shisa ivo vaneshiogwa. Mlave na mkangajo. ¹⁵ Kivari kyake, mundere Kristo Mndumi ngonyi sanu chakundu Mwele. Mve tayari italwa kila mundu apevaveserenyi inywe ngiki mode tumaini ko Makilunga. Utenyi kudi ko uoloryu na nganyi. ¹⁶ Muve na dhamira nyicha matika ke vandu vechedenga maisha vanu vecha ko Krosto vadima irasika ko kitevi vamededa kipuri kimbi kyanu chakundu ke mokeri vauta maviichwa. ¹⁷ Nyi kicha chee, ikava Makilunga nyamefuda, ke mnevinika ko iuta shicha kuliko ko iuta mavichwa. ¹⁸ Kristo kavi nyelevinika mara jimu ko kitevi kya sambi. Icho usa nyaode loi nyelevinika ko kitevi kyedu, vasa jilekeri jiode loi, matika ke najiendye ise ko Makilunga. Nyelepa ko osese, kake nyeleutwa nyarukye ko ngoo. ¹⁹ Ko ngoo, nyeledambuka ne ihubiri ngoo sisa lwaha sikeri kipungonyi. ²⁰ Sekeri na nganyi kigheri irumija ja Makilunga uvekeri unevedeja kilangaro furu se shumba safina, na Makilunga nyalekira vandu vanina -- moo -- nane ifuma ko mringa. ²¹ Iki nyi kitone kya ubatiso upevakira inywe lwaha, chakundu isanya uchafu ifuma osese nyipo, kake chakundu kiterevo kya samiri njicha ko Makilunga, idya iruswa ja Yesu Kristo. ²² Icho nyakeri kokonyi ko kuja ko Makilunga. Nyeledambuka ruveu. Malaika, uitorya na oru lasima shimningye nganyi icho.