¹ Timanye kwamba machikane gha n'dema hambaho tihichimweno ghihalibighwa, tukwete lijhenga kuhuma kwa Chapanga. Ali nyumba jhangatengenechwa kwa mabhoko gha bhanadamo, bale ni nyumba jha milele, katika mbengo. ² Kwa kubhegha katika lihema lende tibhina titamane kuhwalikwa kwa machikane ghito kumbengone. ³ Titamane kwa hajile jha jhenje kwa unhalo ghwa kuhihwala chatibhonekanajhe kubhegha tu utopo. ⁴ Kwa hakika wakate tubhile nkate jha hema jhenje, tibhinatilemighwe. Tipahijhe kuhulighwa. Badala jhake , tipala kuhwalichwa, ile kwamba chela cha kihwile kihweche kumilwa na uchima. ⁵ Jhola jhwatihandihajhe twenge kwa kilebhe chenje ni Chapanga, ambajhe akatupekihe twenga mwojho nkema ahade jha chela chakipala kuhika. ⁶ Kwa hijho m'byajhe na hujachile machiko ghote. M'byaghe miho kwa wakate tibhile ukajha katika m'bhele, tibhile kutale na Bhambo. ⁷ Kwa kubhegha tityanga kwa himane, chi kwa kubhona. Kwa hijho tikwete ujhachile. ⁸ Ni bola tibheghe kutale kuhuma ku m'bhele na ukajha pamo na Bhambo. ⁹ Kwa hijho tiitenda kubhegha lengolito, nkema tubhile ukajha au kutale, timpendeche jhwene. ¹⁰ Kwa kubhegha uchima ghwote tubhonekane palonge jha kite cha hukumo cha Kilichito, ile kwamba kila jhumo ahweche kupokela chela chakistahile kwa mambo ghighahengike katika m'bhele, andaibhile ni kwa umbone au kwa ubajha. ¹¹ Kwa hijho kwa kuimanya hopu jha Bhambo tachawiche bhando. Jinchi chatubhile, ibhonekana wache na Chapanga. Ngwete tumahine kubhegha iheleghweka piha kujhamili jhino. ¹² Tijhighajhe kunchawiche mangota kabhena kutubhona twenga nkema bhakwele. Badala jhake, timpekeha mangota chababo jha kuloka kwa hajile jhito, ile kwamba unhweche kubhegha na lijibo kwa bhala bhibhalokela kuhucho m'bhonekano lakine chi chela chakibhile nkate jha mwojho. ¹³ Kwa kubhegha andaibhile nkema tihombite na malango, ni kwa hajile jha Chapanga. Na nkema tubhile mu malango ghito timamo, ni kwa hajle jhito. ¹⁴ Kwa kubhegha upalo ghwa Kilichito ghutuchulutichaa, kwa unhalo ntikwete uhakika na lende: kubhegha mundo jhumo akahwile kwa hajile jha bhote, na kwa hijho bhote bhahwile. ¹⁵ Na Kilichito akahwile kwa hajile jha bhote, ile kwamba bhala bhibhahichi bhakotokajhekuhiche kabhena kwa hajile jhabhe bhene. Badala jhake, lachima bhahiche kwa hajile jhake jhwene hambajhe akahwile na kupupulighwa. ¹⁶ Kwa unhalo ghongo, kutumbulila ngoche na kujhendeleha tinhukumojhe mundo kulengana na ihwango hya bhanadamo tugabha pala kwanja takan'dolakihe Kilichito katika namuna jhenje. Lakine ngoheno tinhukumojhe jhwajhote kwa namuna jhenje kabhena. ¹⁷ Kwa hijho, andaibhile mundo jhwajhote abhile nkate jha Kilichito, jhweno ni kihumbe chaunyata. Mambo gha njobh ghapetite, n'dola, ghabile ghaunyata. ^{18 19} Ilebhe hyote hyene ihuma kwa Chapanga. Akatipataniche twenga kwake jhwene kupetela Kilichito na tupekihe huduma jha upatanicho. Jhene ni kulongela katika Kilichito, Chapanga upatanicha ulimwengo kwake jhwene, chi kubhalanga makocha ghabhe jhide jhabhe abhekelekeha kwito ujhumbe ghwa upatanicho. ²⁰ Kwa hijho titeghulighwe nkema bhawakiliche kwa Kilichito, kana kwamba Chapanga akibha ahenga lupwaha jhake kupetela twenga. Tinchihe mangota kwa hajile jha Kilichito: "mpatanichwe kwa Chapanga." ²¹ Akantehile Kilichito kubhegha chadaka hajile jha jhambe jhito. Jhwene ndile ambajhe akatutehijhe jhambe. Akatehile hyene ile tihweche kutendeka hake jha Chapanga katika jhwene.