¹ Oumwi owa bhamaraika muungati unu yariinga na ebhisikuriiro muungati, akaakerya ega, "Nuuje, ndakoorokye obhujibhibhwa obhwa omusiimbe omuunene unu areekara mumaanji amaaru, ² "Hanu abhakuru abheebhyaaro bhaakora amang'ana aga obhusiimbe naweeki na eguru aha ewaaini aha obhusimbe bhwabho bhanu bhareekara mukyaaro bhaareebhibhwa." ³ Maraika akangeega kwa obhuturo obhwa omutima akanginkya kukibhara, naarora omukari yeekeri eguru kutyeenyi enkangaru inu injwiiri amatuki. Entyeenyi yaanga na emitwe muungati naamatira erikumi. ⁴ Omukari unu yeebhohibwa emyeenda gya jambarau na emikangaru na yaangaribhwa kwe ejahabhu, amagina gana gana obhweera na ruru. Yariinga agwatiriri mumabhoko gaaye ekikoombe kinu kiijwiri ebhintu ebhibhibhi ebhya obhumwaumu na obhusumbe mwaaye. ⁵ Eguru ku kisyusyu kyaaye ryaang'oribhwako eriina erya obhwiibhise: "BHABHEERI OMUKURU, MAAYI OWA ABHASIIMBE NA EBHINTU EBHYA OKUHIIHA KUKYAARO." ⁶ Nkaroora ega omukari huyo yariinga areherwe kwa amanyinga ga abheekirirya na amanyiinga gabhana bhaakwa ku Yesu. Eribhaga rinu namurora, nariinga ndaruguura bhukong'u. ⁷ Nawe maraika akaankeerya ega, "Kwaaki oraruguura? Ndakukeerye ndakukeerye agamukari huyo na entyeenyi inu yaamugeega (entyeenyi hiyo eyaa emitwe muungati na amatira ekumi). ⁸ Entyeenyi inu waarora eriiho, etariho kuweeki nawe hangi okutiira ukureeka mwituko rinu ritari erya obhuteero. Kweeki arigendererya na obhunyamuuri. Bhana bhareekara eguru awa ekyaaro, bhanu amariina gabho gatang'oorwa kukitabho ekyaa obhuhoru kyeego kubhusimuka obhwa ekyaaro bhariruguura okobhoha entyeenyi inu yaaringaho, ega etariiho kweeki, nawe erihang'i okuhuunjuka. ⁹ Okubhirikirwa kunu nkwaabhanu bhanana obhung'eeni, na entuungwa. Emitwe muungati niiga enkuku muungati hanu omukari yeekara eguru haaye. ¹⁰ Bhoonse mbenaangwa. Abheenaangwa abhataanu bhaagwa, oumwi ariiho, oundi akayaari okurara; Eriibhaha rinu ariija, ariikara kwa eribhaga ekeego. ¹¹ Entyenyi inu yaangaho, kweeki atariiho, yoonse eriingi enyinaangwa eyakane; Nawe ariingi kubharya muungati, aragendererya kwa obhunyamuri. ¹² Amatira erikumi ganu waarora nabhaanangwa ekumi bhanu bhataraanyoora obhunaangwa, nawe bhatanyoore obhukuru kya abhanaangwa kwiibhaga rimwi na entyeenyi. ¹³ Bhanu bhaana obhwaamuri bhumwi, bharahaana eginguru gyaabho na obhuturo obhwa entyeenyi. ¹⁴ Bharaakore eriihe kubheki na omwana wa ering'ondi. Nawe omwana owa eriing'oondi aribhakirya kwa okubha weeki omukuru owa abhakuru na mmunangwa owabhanaangwa kuhitira kuweeki twabhirikirwa, twaasorwa, abhaheene." ¹⁵ Maraika akankeerya, "Amanji ganu waarora, anu yeekeri omusiimbe mbaantu, obhusikani ebhyaaro na ekiikabhira. ¹⁶ Amatira ekumi ganu waarora kuntyenyi bharibhihirwa urya omusumbe. Bharimukora okubha omusuru mbaru na ekinaabhi, bharirya omubhiri gwaaye, na bharigu ruungu ngurya na omuruuro. ¹⁷ Kwa okubha Waryubha yaatuura mumtima gyaabho okugeega obhuheene bhwaaye kwa obhikiriran'ya obhwa okuhaana entyeenyi eginguru gyaabho kwa okuhibharara naho amang'ana ga Waryubha hanu garihika. ¹⁸ Omukari unu waarora na omugi omunene gurya omukuru eguru kubhaanaangwa abheekyaaro."