¹ Nkarora entyenyi erareka munyanja. Yaringa na amatira ekumi na emitwe muhungati kumatira gaye kwaringa na taji ekumi kumutwe gwaaye kwaringa na amang'ana ga okujera Waryubha. ² Entyenyi hinu narora nkyengo. Amaguru gaaye garinga nkya dubu omunwa gwaye nkogwendwi. Enjoka hirya eka muhana amagana kukiti kyaaye kya kare na obhukuru bhwa amanaga ga ubhutemi. ³ Omutwe gwa entiyenyi eimwi kyeyorokya okubha ekironda ekinene kinu kikakoreri oruku rwaye. Ekironda kyaye kikaweena na ekyaro kyoonse kikatung'ara kikaseeta entyenyi. ⁴ Kweki bhakasyengera enjoka ensonga ekamuhana obhutemi bhwa entyenyi bhakasyengera enjoka kweki bhakagendererya okugamba, "Niwi nkya entyenyi? na "Niwi arirwana nawe?" ⁵ Entyeenyi ekaanwa omunwa ehahire amang'ana ga okwikumya na amatuki na yekiriribhwa okutemya emyeri mirongo ena na ebhiri. ⁶ Ego entyeenyi yahatira omunwa gwaaye okuhaira amatuki kukira Waryubha akari tuka erina ryaye ahasi hanu yaringa amenyeri na bharya bhamenyeri murwire. ⁷ Entyenyi yekiriribhwa okukora erirwana na abhekirirya na okubhakira kweeki yahanwa okutemya eguru wa amakabhira ga mubhyaro. ⁸ Bhoonse bhanu bhamenya mukyaro bhari musyengera weki kira oumu hunu erina ryaye ritarang'orwa kurwa kubhubhumbi bhwa ekyaro kukitabho kya obhuhoru nkinu nkya omwana wa eng'ondi unu yagoogwa. ⁹ Erabhe hunu wonse yana amatwi na yetegerere. ¹⁰ Nyoore oumwi wabho agegerwe mateka na kumateka arakora. Erabhe ohumwi wabho ariita kwa empanga aritwa kwa empanga. Gunu numubhirikiro gwa obhukiri na obhwinagirirya na obhuhene kubhanu bharingi abharabhu. ¹¹ Kweki nkarora enytenyi ehindi araja okurwa mukyaro yaringa yana amatira gabhiri nkye eng'oondi akahaira kya enjoka. ¹² Yorokya obhutemi bhonse kuntyenyi hirya yokwamba kubhuang'i bhwaye na okukora kukyaro kubhanu bhamenya bharasyengera entyenyi ya okwamba hurya ekiroonda kyaye kyaweena. ¹³ Akakora ebhirengyo bhya amanaga akakora na omururo gwitume mukyaro okurwa murwire kubhukangati bhwa abhantu. ¹⁴ Kukyorokibhwa kya okukora akabhang'ena bhayo bharekara mukyaro abhakerye okukora ebhisusano kwa entungwa ya entyenyi hinu yaringa enyarirwe kwa empanga bado yamenya. ¹⁵ Yekiriribhwa okurusya omwika kubhisusano bhya egintyenyi ebhisusano bhiture okugamba kwa okusabhabhisha bharya bhonse bhanga okusyengera entyenyi bhakwe. ¹⁶ Kweki akabanwa kira ohumwi unu atokuhanja owamanaga, omwami na omutaka na omugaya wa okuramira ebhyorokyere ryo bhya okubhoko kwa okusaja au kukisyusu. ¹⁷ Etaringa eraturika kukira omuntu okugurya au okugura omwene earama ya entyenyi na enamba ya kuhikirya erina ryaye. ¹⁸ Hinu erenda entungwa, erabhe wowonse yana obhumanyi mutige ature okukora erisabhu rya enamba ya entyenyi ensonga ni enamba ya omuntu enamba yaye 666.