¹ Kwibhagha riyo yaringaho enyangi ya bhayahudi, na Yesu yatira kugiya Yerusalemu. ² Neriya Yerusalemu kurikuwa naeri bhikira kukiseku kye eng'ondi rinu riya ringa rirabhirikirwa kwe kabhira ye kiebrania Bethzatha, rihonse rina masagi gatanu. ³ Omuganda omunene gwabharwerihi, abhahoku, ebhirema au bhanubhamitita bhanagha bhareri kumasagi gayo. Chitegerera, mang'ana go mchatiya gwa kasatu gatakurobhoka nakara njomu giya kare, bharaganya amanji kunyamurwa) malaika yeka munsi omukuru nokunyamura amanji. ⁴ Kwego, uriya yanga wambere kusoha munsi ya manji kunyamurwa yakorwa muhoru kureka kukiyonse kiyonse kunukiyaringa kimugwatirii kubhuyo. ⁵ Nomuntu umwi yaringa arwaririi komweya gwa emiaka mirongo esati na munane yanga munsi wa masagi. ⁶ Yesu hanuyarora yehiribhwe munsi wa masagi na baada kumanya ega yehiribhwe hariya ko mwanya omutambhi Yesu akamukeriya, orenda kubha muhoru?" ⁷ Omurweri uriya akamukyukya, omukuru ntana muntu, okuntura kwi ebhirika nawe amanji hanugaranyamurwa, eribhaga inu ndasemiya okusoha omutu arankangata. ⁸ Yesu akamukerya, "Imuka ogege ekirago kyao ogye." ⁹ Rumwigo omuntu urya akawenibhwa, akagega obhuriri bhwaye akagya. Norusiku ruyo rwanga orusiku rwe sabhato. ¹⁰ Kwego Abhayahudi bhakamukerya omuntu urya yanga awenibhwe, "Rero ndusiku rwe sabhato na otakwenderwa okugega ekirago kyao." ¹¹ Akakyukya, unu yagwenerya ng'o yankererye "gega ekirago kyao ogende" ¹² Bhakabhurya, "Nimi akukererye 'Gega ekirago kyao ogende?" ¹³ Nawe urya yamenibhwa atamumanya, ko kubha Yesu yaringa agiri kwekinyerera kokubha yaringa na abhantu abharu ahasi ayo. ¹⁴ Kwekigo Yesu yanyora omuntu urya mwisye gerero nokumukerya, maha, oweneri! "otakakora obhusarya kweki atarija okunyorwa na ering'ana eribhibhi, bhukong'u. ¹⁵ Omuntu urya akagya nokubhakerya abhayahudi ega Yesu ng'o amuwenerye. ¹⁶ Kwekisigo kija amang'ana gayo abhayahudi bhakamunyakya Yesu kokubha yakora amang'ana gayo kurusiku rwe sabhato. ¹⁷ Yesu akabhakerya, "Tata wani arakora emirimu mpaka bhonwego nose ndakora emirimu. ¹⁸ Kwekisigo kiyo Abhayahudi bhagendererya oku mutuna bhamwite nawe etari kwekisigo kyokunyamura esabhato, Nawe kokumubhiri kita Waryubha tata waye, arekorya okubha kya Waryubha. ¹⁹ Yesu akabhakyukya, mwikiriryo omwana atakutura ekintu kyo kyonse nawe kirya amuruji taata waye arakikora kokubho kyokyonse, kinu taata arakora nkyo nomwa na arikikora. ²⁰ Kokubha taata ahanjiri omwana, na ara morokya kyokyonse kinu arakikora na arimorokya amang'ana amanene okukira ganu okubha mugendererye okurugura.'' ²¹ Kokubha kyego taata arabhayukya abhaku nokubha ana obhohoru, na kweki omwana wonse kweki aramuhana wowose unu amuhanjiri. ²² Kokubha taata aramujibhya wowose, nawe amuweri omwana obhujibhya bhonsego. ²³ Kweki bhonse bhanutunge omwana kyego omwana aramutunga taata wowonse unu atakumutunga omwana atakumutunga taata unu yamuragirirya. ²⁴ Ikirirya unu aregwa ering'ana ryani nokumwikirirya unu yandeta yana obhuhoru koko na atakujibhibhwa kwekigo, ayatiri okureka mubhaku nokusoha mubhuhoru. ²⁵ Mwikirirye ndabhabhurya oribhaga riraja na bhono ririyo rinu abhaku bharigwa erisi ryo mwana wa Waryubha, na bhonsego bhanu bhariigwa bharimenya. ²⁶ Kokubha nkyego taata yana obhuhoru munsi waye omwene, ²⁷ wonse amuheri omwana okubha nobhuhoru munsi waye na taata aheri omwana obhutungi okubha ajibhye kokubha mwana wa Adamu. ²⁸ Mtakaruguribhwa na rinu, kokubha eribhaga riraya rinu abhaku bhonsego bhanu bharingi mumabhira bharigwa erisi ryaye. ²⁹ Bonse bharihuruka kibhara kubhanu bhakore obhuhoru kubhuyuri bhabhuhoru na bhanu bhakora amabhibhi kobhuyuri bhobhujibhya. ³⁰ Nyakutura okukora ekintu kyokyonse okureka kuoni omwene, kyego ndegwa nigo ndajibhya nobhujibhya bhwani mbobhuhene kokubha ntakutuna obhuhanje bhwani nawe obhuhanje bhwaye unu yandeta. ³¹ Kweki anu andasyengerere omwene, obhwimiriri bhwani bhutakabhari bhobhuhe. ³² Ariho oundi unu aremiririra kuoni kwego manyiri kobhuhene obhwimiriri bhunu aranyimirira mbwahene. ³³ Mragirirye kui Yohana weki aremiririra kobhuhene. ³⁴ Kwekigo obhwimiriri, bhunu ndaramira bhutakureka kumuntu. Ndagamba ganu muture okuturibhwa. ³⁵ Yohana yaringa ekorobhoyi ini eroka na mwaringa mwikirirye okujomererwa kwe ribhagha ekego obhurabhu bhaye. ³⁶ Obhwimiriri bhunu ninabho mbukuru okukira obhwa Yohana, kwemirimu ginu taata yang'eri okugikora, emirimu giyo ndakora girorokya okubha taata yandagirirya. ³⁷ Taata unu yandagirirya omwene yemiriri kuwoni mtakegwiri okwigwa erisi ryaye kora okurora kyego aringi eribhago ryoryonse. ³⁸ Hetarigo ering'ina ryaye anu rirekare mumitima gyenyu kokubha mutakumwikirirya unu yandeta. ³⁹ Mragekomya amang'ina muramanya munsi obhuhoru koko bhurimo na amang'ana gayo garemirira obhurariki bhwani. ⁴⁰ Mutakwenda okuja kuoni nawe munyore obhuhoru koko. ⁴¹ Ntakuramira eginkuma kureka kubhantu. ⁴² Nawe manyiriga mutana obhuhanje bhwa Waryubha munsi wenyu abhene. ⁴³ Nijiri kwerina rija taata wani mutatura okundamira nawe oundi akajiri kwerina ryaye mukamuramiri. ⁴⁴ Kwego muratura okwikirirya bhenyu bhanu muraranira eginkuma okureka kukira oumwi menyu Nawe mutakutu na enkuma inu erarwa ku Waryubha omumwemwe? ⁴⁵ Mtakamanya oni ndibhagamba mubhukangati bhwa taata. Unu arabhagamba bhenyu Musa unu bhenyu mwatuura obhwikirirya bhwenyu kuweki. ⁴⁶ Nawe Singa muramwikirirya Musa mukanyikirirye oni kokubha yang'ora amang'ana gani. ⁴⁷ Onyora mutakwikirirya amang'ana gaye murature egaki okwikirirya amang'ana gani?