¹ Kubwambhiro ryaringaho Ering'ana, na Ering'ana yaringa hamwi na Waryubha, na Ering'ana yaringa Waryubha. ² Ering'ana, unu, kubhwambhiro yaringa hamwi na Waryubha. ³ Ebhintu bhyonsengo bhyakorwa kuhitira ku wehi, onyoro atari weki kitariho hata ekintu kimwi kinu kyaringa kyakoreka. ⁴ Munsi yaye bhwaringamo obhuhoru, na obhuhoru bhuyo bhwaringa obhurabhu bhwa abhantu bhonsego. ⁵ Obhurabhu bhwarabha mukisunte, kora ekisunte kitabhusinya. ⁶ Yaringaho omuntu unu yaringa atumirwi kurwa kuwaryubha, unu erina ryaye yaringa Yohana. ⁷ Yaaja nkya omwimiririri okwimiririra obhurabhu bhurya, bhonsego bhature okwikirirya kuhitira kuweki. ⁸ Yohana ataringa obhurabhu bhurya stari weki yaaja okwiririra eguru ya obhurabhu bhurya. ⁹ Bhurya bhwaringa obhurabhu obhuhene bhunu bhwaringa bhuraja kukyaro nabho bhwa mutera obhurabhu kira omuntu. ¹⁰ Yaringi kukyaro, na ekyaro kyabhu mbhwa kuhitira kuweki, na ekyaro kiramumanya. ¹¹ Yaaja kubhintu bhyaye, na abhantu bhaye bhatamuturung'ana. ¹² Kubharya abhaaru bhanu bhamuturung'ana, bhanu bhekirirya erina ryaye, kubhayo yabhahana okubha abhana bha Waryubha. ¹³ Bhanu bhebhurwa, etari kwa amanyinga, kora kwa obhuhanje bhwa omubhiri, kora kwa obhuhanje bhwa omuntu, nawe nkwa Waryubha omwene. ¹⁴ Ering'ana eryene ryokoreka omubhiri na akekara haghatu yetu, twabhurora obhukuru bhaye, obhukuru nkya obhwa omuntu omumwemwe wa obhumwemwe unu yaaja okurwa ku taata, yejurwa eriruguto na obhuhene. ¹⁵ Yohana yemiririra eguru yaye, na akurusya eriisi na akagambha, "Unu rigo urya magambha, amang'ana gaye ega, "Urya araja enyuma yani mumukuru kukira oni, kwa okubha yabhaho hanu oni nyangaho.'' ¹⁶ Kwa okubha kurwa kubhuhikya bhwaye, bhetu bhonse twa turung'ana bhusa obhunagya eguru ya obhunagya. ¹⁷ Kwa okubha eriragiriryo ryaretwa okuhitira Musa. Erimguto na obhuhene bhyaaja okuhitira Yesu Kristu. ¹⁸ Atariho omuntu unu yamurora Waryubha eribhagha ryo ryonse. Omuntu omumwemwe unu aringi Waryubha, unu aringi mukikubha kya Taata, amukoreri weki amanyikane. ¹⁹ Na bhunu mbho obhwimiririri bhwa Yohana eribhagha abhasyengeri na abhalawi hanu bharinga bhatumi rwi kuweki na abhayahudi okumubhurya, "Uuwe niwi? ²⁰ Na weki atakubhakubha kora atangiri akakyukya ega "Oni ntari Kristu" Kwa ego bhakamubhurya, ²¹ "Kwa ego uuwe niwi bhoono?, Uuwe ng'o Eliya? Akagambha, "Oni ntari" Bhakagambha Uuwe, nu omuroti? Akakyukya, Tiego" ²² Kweki bhakamukerya, uuwe niwi, kwa ego tubhone erikyukyo bhanu bhaatutumiri?" ore miririra egaki uuwe omwene. ²³ Akagambha, "Oni ni eriisi ryane unu arakwa mwibhara: 'Gorora enjira ya omukuru : kya ego omuroti Isaya yagambha." ²⁴ Mbhe kwaringaho na abhantu na abhantu bhatumirwi harya kurwa ku mafarisayo. Bhakamubhurya na okugambha, ²⁵ "Kwakini orabhatija kama uuwe otari Kristu kora Eliya? Kora omuroti?" ²⁶ Yohana akabhakyukya akagambha, "Ndabhatija kwa amanji. Kwa ego hagati mwetu yemiriri omuntu unu mutamumanyiri. ²⁷ Unu ng'o araja enyuma yani. Oni ntakutura okunyogya egingoye gya eginketo gyaye." ²⁸ Amang'ana ganu gakoreka eyo Bethania, kurugongo rwa Yordani, hasi hanu Yohana yaringa arabhatija. ²⁹ Ejo wendeko Yohana yamurora Yesu araja kuweki akagambha, "Maha omwana wa ering'ondi wa Waryubha unu aragega obhusanja bhwa ekyaro! ³⁰ Unu ng'o nagarubha amang'ana, "Weki unu araja enyuma yaani nu omukuru kukira oni, kwa okubha yaringaho hanu nanga nkyari kubhaho.' ³¹ Ntamumanya weki nawe yakoreka, ego kwa ego arobhoke ku Israeli, kwa ega naaja ndabhatija kwa amanji" ³² Yohana yamiririra, "Narora omutima gureka kurwa murwire kwa kirengyo kya enguutio, na gukara eguru yaye. ³³ Oni ntaamumanya nawe weki unu yandagirirya mbhatije kwa amanji yankera, urya unu orirora omutima gureka na okwikara eguru yaye, urya rigo arabhatya kwa omutima omurabhu. ³⁴ Narora na nemirirega unu ng'o omwana wa Waryubha.'' ³⁵ Kweki ejo yendeko Yohana yaringa yemiriri hamwi na abhehigira bhaye bhabhiri, ³⁶ Bhamurora Yesu aragenda na Yohana akagambha, "Maha omwana wa ering'ondi wa Waryubha!" ³⁷ Abhahigira bhabhiri bhaamurigwa Yohana arahahira ganu bhakamuseta Yesu. ³⁸ Kweki Yesu akakyukya na okubhamaha abhehigiro bharya bharamuseta na akabhakerya, "Murendeki?" Bhakakyukya, "Rabhi ensonga yaye 'omwihigirya,' orekaraha? ³⁹ Akabakerya, "Muje Murore." Kweki bhakagya na okurora hasi hanu yanga arekara; bhakekara hamwi nawe orusiku ryo; kwa okubha yaringa kamansa ekumi ego. ⁴⁰ Oumwi wa bharya abhabhiri bhanu bhamwigwa Yohana aragambha na kweki okumuseta Yesu yaringa Andrea, omuhiri wa Simoni Petro. ⁴¹ Yamurora omuhiri waye Simoni na akamukerya, "Tumunyoreri masihi" (inu erakyukibhwanga ega Kristu) ⁴² Yamureta ku Yesu. Yesu akamumaha na akagambha, "Uuwe ngo Simoni omwana wa Yohana" "Oribiri kirwa Kefa"(ensonga yaye 'Petro') ⁴³ Ejo yendeko eribhagha Yesu yendanga okwimuka okugya Galilaya, yamunyora Filipo na okumukerya "Nseta oni" ⁴⁴ Filipo yaringa omwibhurwa wa Bethisaida, omugi gwa Andrea na Petro. ⁴⁵ Filipo yamunyora Nathanieli na okumukerya, Tumunyoreri urya unu Musa yaang'ora amang'ana gaye mumaragiriryo na abharoti. Yesu omwana wa Yusufu, kurwa Nazareti. ⁴⁶ Nathanaeli akamukerya, "Ekintu ekijomu kinu kiratura eyaki okurwira Nazareti? Filipo akamukerya, "Nuuje na orore." ⁴⁷ Yesu yarora Nathanaeli araja kuweki na akagambha, Maha, Omwisraeli hene hene unu ataana obhung'eni musiyaye. ⁴⁸ Nathanaeli akamukerya, "Uuwe ummanyirigaki oni?" Yesu akakyukya akamukerya, "Hanu Filipo yanga akyari okukubhirikira hanu waringa insi ya omutini, nakwora.'' ⁴⁹ Nathanaeli akakyukya "Rabhi "uuwe ori mwana wa Waryubha! uuwe ng'o omukama wa Israeli! ⁵⁰ Yesu akakyukya akamukerya, kwa okubha nakukerya "nakurora insi ya omutini bhono orekirirya? Orirora amakorwa amanene kukira ganu." ⁵¹ Yesu akagambha, "Ikirirya, ikirirya ndabhabhurya murirora orwire rurisikuka, na okubharora bhamalaika bharatira na okwika eguru ya omwana wa Adamu.''