¹ Kumweya gwa eginsiku esatu, kwaringaho na obhwenga erya kaana ya Galilaya na ng'ina waye Yesu yaringa eyo. ² Yesu na abhehigira bhaye bharinga bhararikirwe mubhwenga. ³ Eribhagha rinu bhahwerwa na edivai, ng'ina waye Yesu akamukerya, "Bhataana edivai." ⁴ Yesu akakyukya, "Omukari irya intuniryeki oni? Omweya gwani oni gukyari uhika. ⁵ Ng'ina waye akabhakerya abhakori, "Kyokyonse kinu aribhabhurya mukore" ⁶ Gyaringaho ensengo ensansabha egya amagina harya ginu gyaturwaho kurusumo rwa okwisabha omwijagwa enyungi gya Abhayahudi, kila eimwi yaringa erejuribhwa enjiho ebhiri esatu. ⁷ Yesu akabhakerya, "Mwijurye amanji eginsengo gya amagino," Bhakejurya mpaka eguru. ⁸ Kweki akabhakerya abhakori, "Mugege endengo bhono na muhire kumukori omukuru owa emeja," Bhakora kya ego bharagirirwa. ⁹ Omukori omukuru yagarabha amanji garya ganu garinga gakyukibhwe na okubha edivai, nawe atamanya enu garwira(Nawe abhakori bhanu bhataha amanji bhamanya enu garwira). Kweki akamubhirikira omukuru wa obhwenga na ¹⁰ okumukerya, "Kira oumwi arambhonga okubhakorera abhantu edivai enjomu na hanu bharagwatwa obhurebhi arabhahana edivai inu etari enjomu. Nanu uuwe obhikiri edivai enjomu hadi bhoono." ¹¹ Ekika kinu ekya kaana ya Galilaya, mbho bhwaringo obhwambhiro bhwa ekimanyiriryo bhwa ebhika bhinu yakora Yesu, okorokya obhukuru bhwaye, kwa ego abhahigira bhaye bhakamukumya. ¹² Hanu yamara riryo, Yesu ng'ina waye abhahiri bhaye na abhehigira bhaye bhaagya mumugi gwa Kapernaumu na bhakekara eyo kwa eginsiku nke ego. ¹³ Na epasaka ya Abhayahudi yaringa hang'i, kwa ego Yesu akagya Yerusalemu. ¹⁴ Akabhanyora abhagurya bha eging'ombhe, eging'ondi, na eginguuti munsi ya erisyengerero. Kweki abhasweriya bha egimbhirya bharinga bhekeeri munsi ya erisyengerero. ¹⁵ Yesu yakora omujeriti ogwa erikuju, akabharusyamo bhonsego bhanu bharinga amisyengerero, hamwi na eging'ombhe na eging'ondi. Aketira egimbhirya gya abhasweriya bha egimbhirya na okugaranjura egimeja gyabho. ¹⁶ Kubhagurya bha eginguti akabhakerya, "Murusye ebhintu bhinu bhibhe hare na hanu, mutige okukora enyumbha ya Taata wani okubha hasi wa omudira.'' ¹⁷ Abhehigira bhaye bhakahiruka ega yanga eng'orerwe, "Orung'era rya enyumbha yaho rwakandye. ¹⁸ Abhakuru bha Ekiyahudi bhaka kyukya, bhakamukerya, "Nkimanyiriryoki kinu ooratorokya kwa okubha oragakora amang'ana ganu? ¹⁹ Yesu akabhakyukya, muribhondore erisyengerero rinu naoni ndarihagaja kwa eginsiku esatu.'' ²⁰ Kweki abhakuru bha Abhayahudi bhakagambha, "Yagega emiaka mirongo ena na ensansabha okuhagaja erisyengerero rinu uuwe uragambha orarihagaja kwa eginsiku esatu?" ²¹ Weki yahahiranga erisyengerero kwa ensonga ya omubhiri gwaye. ²² Kwa ego kumweya gwa okuhyuka kwaye okurwa mubhaku, abhahigira bhaye bhakahituka ega yagambha ego, bhakekirirya amang'ore na obhuhahiri bhunu Yesu yaringa amariri okugambha. ²³ Mbhe hanu yaringa Yerusalemu eribhagha rya epasaka, kumweya gwa enyangi abantu bharu bhakekirirya erina ryaye, hanu bharora ekimanyiriryo kya ebhika bhinu yakora. ²⁴ Nawe Yesu atanga na eimani nabho kwa okubha yanga abhamanyiri abhantu bhonsego. ²⁵ Atendanga omuntu wowonse amukerye eguru ya abhantu kya ego bharingi kwa okubha yamanya kinu kyangamo musiyabho.