¹ Paulo omugaya wa Kristu kwa amega ga Waryubha, kubhanu bhahurwa kwa orusumo rwa Waryubha bhanu bharingi Efeso mbahene ku Kristu Yesu. ² Ennonkwe ebhe kubheenyu na obhuhene bhunu bhurareka ku Waryubha taata na omukuru Yesu Kristu. ³ Waryubha na tata wa omukuru weetu Yesu Kristu aanwe omukama. N'igweki hunu yatunonka kwa eginnonkwe gya omutima kwirwire muunsi wa Kristu. ⁴ Kabla ya okubhumba ekyaro, Waryubha yatusora bheetu bhanu turakumya okubha Kristu. Yatusora bheetu okubha tuture okubha abharabhu na bhanu bhatakwing'eerya kubhukangati bhwaaye. ⁵ Kwa obhuhanje Waryubha yatusora kubhwambiro kya abhana bhaye kwa enjira ya Yesu Kristo. Yakora ega kwa okubha yahanjirwa okukora kirya yahanja. ⁶ Obhwera bhwaye niga Waryubha akumibhwe kwa ennonkwe ya obhukuru bhwaye. Kinu mkyo yatuhana bhusa kwa enjira ya omuhanje waye. ⁷ Kwaokubha omuhanje waaye, tuna obhuturibhwa kuhitira amanyinga gaaye, obhwabhirwa bha obhusarya tunaryo kwa okubha kwa obhwami bhwa ennonkwe yaaye. ⁸ Yakora ennonkwe hinu okubha enjaru kubheetu okubha entungwa na obhumanyi. ⁹ Waryubha yakora omanyikane kubheetu obhuhene bhurya bwebhisa okrekana na ennamba hinu yorokibhwa muunsi wa Kristo. ¹⁰ Kwibhaga ryahikiri kwaobhukiryo bhwa mpango gwaaye Waryubha aribhituura amwi kira ekintu kwakurwire na kya eguru ya ekyaro na muunsi wa Kristu. ¹¹ Okurwa ku Kristu twaringa tusorerwe okubha kwibhaga. Hinu yaringa nkurwa kuhunu arakora ebhintu bhyonse kwa amega gaye. ¹² Waryubha yakora ego okubha ega tuture okubhaho kwa omukuru gwa obhukuru bhwaaye. Twaringa abhokwamba okubha na obhuhari munsi wa Kristu. ¹³ Yaringa kunjira ya Kristo ega murigwe ering'ana rya obhuhene, eng'ana ya obhuturibhwa bhweenyu kwa enjira ya Kristu yaaringa kuweeki kweeki ega mwekirirya okuturirwa muhuri gwa omutima omurabhu unu ya bharaga. ¹⁴ Omutima mngo obhwera bhwa obhugabhi bhweetu hanu bhurituuka. Hinu yaringa omukuru gwa obhukuru bhwaaye. ¹⁵ Kwa okubha kyego negwa okubha obhuhene bhweenyu muunsi wa omukuru na okubha obhuhanje bheenyu kubharya bhoonse bhanu bhahurwa kwa orusumo rwaye. ¹⁶ Ntakatigiri okumukumya Waryubha kwa orusumo rweenyu okubhagamba kumasabho gani. ¹⁷ Ndasabha ega Waryubha wa omukuru weetu Yesu taata wa obhukuru, aribhahana omutima gwa entungwa amasi kurwa ga obhung'eeni bhwaye. ¹⁸ Ndasabha ega ameso geenyu gamumutima gaturirwe obhurabhu kubheenyu okumanya mbhuha obhuhari bhwa okubhirikirwa kweenyu. ¹⁹ Ndasabha ega omanye obhukuru bhwiyange rye bhwa amanaga gaaye muunsi weetu bhunu turekirirya. ²⁰ Ganu namanaga ganu gakora emirimu muunsi wa Kristo kwibhaga rinu Waryubha, yamuyukya okurwa kubhaku na okumkarya kukubhoko kwaye kwa ekisaja kurwire. ²¹ Yamirikarya Kristu eguru, aharere na obhukuru, obhuturo, amanaga, kare na erina rinu riragambwa. Yamwikarya Yesu etari kwa eribhaga rinu okubha kwa eribhaga rinu riraja kweeki. ²² Waryubha yabhiturira ebhintu bhyonse insi wa amaguru ga Kristu. Yamukora weeki omutwe eguru wa ebhiintu bhyonse kumasengereryo. ²³ Niga erisyengerero ndyo omubhiri gwaaye obhuhikyo bhwaye hunu arejurya ebhintu bhyonse kunjira gyoonse.