¹ Vituhu, Zumbe Yesu ekuwaho kamema Loho Mtakatifu nee enya kulawa mto Yolodani kaongozaoni Loho jangwani ² kwa siku alunaini na uko kageezwa ni bilisi ukati uo nkeekuda chochose na mwisho wa ukati akaumwa ri saa. ³ Bilisi akamwamba, "kanawewe umwana ywa Muungu hituo iwe ditende mkate." ⁴ Zumbe Yesu akatombaisa, "Igondwa muntu nkaishi kwa mkate uodu." ⁵ Vituhu bilisi akamuongoza uwanga kwa mwiima ekamuonyesha Zumbe zose za dunia kwa mdo mjihi. ⁶ Bilisi ekamwamba, ''Nenda nikwenkwe mamlaka ya kutawala Zumbe zase hamwe na fahali zakwe nadaha kugosoa ivyo kwakuwa vyose vikabiziwa kwangu nivitawale na nadaha kumwenka yoyose nikundae kumwenka. ⁷ Kwaiyo kana wenda unenamie na kuniabudu vintu ivyo vyose vyenda vitende vyako.'' ⁸ Akini Yesu akamtambwaisa na kumwamba, ''Igondwa lazima umwabudu Bwana Muungu ywako, na lazima umtumikie yeye ikedu.'' ⁹ Vituhu bilisi akamuongoza Yesu kiamuo Yelusalemu na kumwiika hantu uwanga kabisa ya zengo da hekalu na kumwamba kana wewe umwana ywa Muungu, etambuke si kulawa aha. ¹⁰ Kwasibabu igondwa, ''Enda aagiye malaika zakwe wakutundaiye na kukuinda, ¹¹ na wenda wakwenue uwanga ya mikono yao ili usekweumiza miundi yako mwe maiwe.'' ¹² Yesu akatambaisa akamwamba, ''Igondwa, ''Wesekumgeeza Bwana Muungu ywako.'' ¹³ Bilisi ekubidaho kumgeeza kumgeeza Yesu, akaita na kumbada kiamuo ukati mtuhu. ¹⁴ Vituhu Yesu akauya Galilaya kwa nguvu za Loho na mbui kumhusu Yesu zikagenea nakutangaa mwe mikao yose ya hehi. ¹⁵ Akahinya mwe masunagogi yao muntu akamtogoa. ¹⁶ Siku mwenga akaika Nazaleti mzi ambao akaeewo, na kukuia uko, kana yekuwavyo destui yakwe akengia mwe sunagagi siku ya sabato akagooka kusoma magonda. ¹⁷ Akakabiziwa gombo da nabii Isaya, ivyo akachopoa gombo akaondeza sehemu yekugondwayo, ¹⁸ ''Loho ywa Bwana yuu uwanga yangu kwa ajii yangu kwa ajii kanigea mavuta kubiikia mbui zedi kwa wakiwa. Kanituma kubukia uhulu kwa wafungwa na kuwagosoa wesaokuona wadahe kuena vituhu, kuwaika hulu wakandamizwao, ¹⁹ kubukia mwaka ambao Bwana enda aonyese utana wakwe.'' ²⁰ Nee edichapoa gombo ekamvuzia kiongozi ywa sunagogi ne ekaa asi. Meso ya wantu wose wekuwao mwe sunagogi wamkauwa yeye. ²¹ Akavoka kutamwiia nao akamba, ''Ivyeeo gonde idi ditimie mwe magutwi yenu.'' ²² Kia muntu hado kashuhudia kia chekugombekwacho ni Yesu na wangi gati yao wakehewa ni mbui za vivyo zekuwaza zikalawa mwe kanwa chakwe nee wamba, ''Uyu ni mbwanga ywa Yusufu, nkio ivyo?'' ²³ Yesu akawambia, ''Kwei mwenda mgombeke mesali inu kwangu, ''Mganga, ehonye mwenye chochote tekusikiacho wekugodoacho Kapelnaumu, kigosoe aha he kijiji chenu.'' ²⁴ Pia akamba, ''Ukwei namyamba nywinywi nkakuna nabii mkundwa mwe si yao.'' ²⁵ Akini namyamba nywnywi kwamba na watakufiiw wangi Islaeli mwe kipindi cha Eliya ukati mbingu yekuvugulwaho kwesekuwa na fua kwa miaka mitatu na nusu ukati kwekuwaho na saa nkuu mwe si yose. ²⁶ Akini Eliya nkee kwagiiwa kwa yoyose yumwe ywao akini kwa mtakufiwa yumwe du mwekuwa akekoa Salepta hehi na mzi wa Sidoni. ²⁷ Naho, kwakuwa wataukoma wange mwe Islaeli kipindi nabii Elisha akini nkakuna hata muntu yumwe gati yao mwe kuhonywa iya Naamani muntu ywa Silia. ²⁸ Wantu wose mwe sunagogi wakamemwa ni maya wekusi kiaho aya yose. ²⁹ Wakagooka na kumsindika changoi ya mzi ili wadahe kumungoza kiamuo kwe ukingo wa mwiima wa mzi ambako mzi wao uwe uzengwe uwanga yakwe ili wadahe kumwasa si. ³⁰ Akini ekemboka saama gatigati yao akaita. ³¹ Akabinda akaseea Kapelnaumu, mwe mzi wa Galilaya. Ya sabato mwenga na akahinya wantu mwe sunagogi. ³² Wakehewa ni mahinyo yakwe kwokuwa nee akahinya kwa mamlaka. ³³ Sasa siku iyo mwe sunagogi nee kuna muntu mwekuwa na loho ya npepo mchama na nee aiya kwa sauti ya uwanga, ³⁴ ''Tina mbwai nawe Yesu ywa Nazaleti? Kweza kutiumiza? Namanya wewe undai wewe umtakatifu ywa Muungu!'' ³⁵ Yesu akamfokea npepo ekamba, ''Nyamaa myee na umlawe muntu uyu!'' Npepo yuda akamwaawa muntu yuda bila ya kumbadia maimevu. ³⁶ Wantu wose wakehewa na wakosangwa nkuta mwia mbuu iyo kia yumwe na mweziwe, wakamba, ''Ni mbui ya viivihi inu? ³⁷ Ivyo mbui ya Yesu ikatangaa kia sehemu mwe maeneo yazungukayo mwe mkoa uwo. ³⁸ Naho Yesu ekahauka mwemzi uo akengia mwe nyumba ya Simoni. Sasa mkwewe ywa kivywe ya Simoni nee akaumwa homa nkai akamhembeeza badii yakwe. ³⁹ Ivyo, Yesu akambasa hehi ekamkemea ida homa ikamweeka. Gafla akagooka na kuvoka kuwaahiazikia. ⁴⁰ Zua dekuwaho dikaswa wantu wakamweetea Yesu kia yumwe mwekuwo mtamu wa ntamu mbaimbai. Akaika mikono yakwe uwanga ya kia ntamu akawahonya wose. ⁴¹ Mapepo pia yakawalawa wangi wao wakaia kwa sauti na kwamba, ''Wewe umwanya ywa Muungu!'' Yesu ekafokea mapepo na kuwenka uhusa watamwiiye kwa ajii wamanya kwamba nee ni Kwistu. ⁴² Ukati kwekuchoho akaita eneo desada kuwa na wantu, madukano ya wantu, nee wakamuondeza wakeza kwe eneo ekuwaho, wakgeeza kumkindia asekuita hao nao. ⁴³ Akini akawambia, ''Lazima pia nibiikie mbui ntana za uzumbe wa Muungu mwe mizi mituhu mingi kwakuwa inu nee sibabu nkitumwa aho nao.'' ⁴⁴ Naho akasongwa kubukia mwe masunagogi mwe Uyahudi yose.