¹ Tukubha misambwa bhalano bhakahula matalumbeta ghabho. Ghalola lusonda kufuma kubhwelelo lukabhele lwaghwa kudunia. Lsonda luhebhilwe bhufundulo bhwa lina lijelekele kulina lisila mwisho. ² Ghafungula lina lisila bhuhela no lyonsi lya tanda kulughulu kusafu kufuma mukati jya lina kati lyonsi kufuma katika itanuli ikulu. Ishubha no mwanga ghakahindukanga fyabha giza kusabhabhu jya lyonsi ghwakafumanga mlina. ³ Mukati mwa lyonsi nsigha bhakafumanga kuwisa kulughulu mwahabhwelele, nagho bhakehebhwanga managhe kati ghakamina halughulu jya habhelelo. ⁴ Bhakabhalilwanga bhasihaghi bhwasi katika nsi no mazao ghoghonsa gha kijani au fiti, ila bhantu ambao bhasikabhele no muhuli ghava kabhumba katika paji sya bhusyu bhwabho. ⁵ Tebhakahebhwanga luhusa sya kubhehongha bhabho bhantu, ila kubhasamfya tu kumuda ghwa miensi itano. Bhusungu bhwabho bhukabhele kati bhulya bhwakutetwa no kamina kati hoghamuteta muntu. ⁶ Katika fukusesyo bhantu bhalohensa luku, tukubhe tebhana silola. Bhalotama lufu lakini lufu lulobhakilima. ⁷ Nsighe bhakesusanga no falasi bhakaandaliwanga kuvita, kumitwe jyabho kukabhele no sintu kati itajyi lya sabhabu no bhusyu bhwabho bhukabhele kati bhwa binadamu. ⁸ Bhakabhele na nyele kobhe sya bhakema no meno ghabho bhakabhele gha nsimba. ⁹ BHakabhele na tundu kati lya syuma no sauti mapapa ghabho ghakabhele kobho sauti jya mutuka mingi sya vita no falasi hobhakukilima kuja kuvita. ¹⁰ Bhakabhele na misila jikuteta kobhe kamina, katika misila syabho bhabhele no managha gha kuzuru bhantu kumrensi itano. ¹¹ Bhakabhele naje kati mufalume kulughulu jya bho misambwa bha lina lisikobha na bhuhela. Isina lyajye katika Kiebrania ni Abadoni no katika Kinyunani alinesina lya Apolioni. ¹² Ole jya kusumbula jyahita. KUnga! Badala jya leli kuli mafu abhili ghesile. ¹³ Misambwa ghwa mukagha ghakahulanga talumbeta jyaje, no kuhulika silongo sikufuma katika luhande lwa madhabahu gha sahabhu siliho hambele jya kabhumba. ¹⁴ Silongo syakamubhalilanga musambwa ghwa mukagha akabhele no talumbeta, ''Bhahekele misambwa bhane bhalya bhafungilwe katika monga mukulu Efrata.'' ¹⁵ Misambwa bhane bhakabhele bhaandaliwa ku muda ghogho maalumu, lufuka lolo, mwensi ghogho, no mwaka ghogho bhakalekelwanga bhabhehaghe thelusi jya bhantu. ¹⁶ Idadi jya askali bhakabhele bhalughu jya falasi jyikabhele 200,000 000. nakahulike idadi jyabho. ¹⁷ Tetyo bho na kalonga falasi katika malole ghane no bhalya bhakatandanga halughulu jyebho matundu ghabho ghakabhele ghabhe kati msilo, bhuu jihite no njano jisihile. Mitwe jya falasi jya kesusanga na mitwe jya simba, no mumilomo jyabho mwakafumanga mlilo, linsi no salfa. ¹⁸ Thelusi jya bhentu bhakafwanga no ghagha mapigho atatu: mlilo, lyonsi, na solfa jakafumanga kumilomo jyabho. ¹⁹ Bhukobha managha gha falasi jikabhele katika milomo jyabho no katika misiila jyabho bhukobha misila jyabho jikabhele kobhe nsoka, no bhabhele na mitwe jilya jyobhakalumilanga kubhaha majeraha bhantu. ²⁰ Bhantu bhakasibhanga, bhalyo bhakabhele bhusila kutelwa no mapigo ghagha, tebha katubhalilanga matendo ghobhakabhele bhajila, wala tebhakalekanga kuabudu misagha no miungu jye dhahabu, fedha, shaba, mabhwe, no fiti ambavyo yefinakobhola, kulola, kuhulika au kulyata. ²¹ Wala tebhakatubhalila bhwihaghanyi bhwabho, bhulosi bhwabho, bhusyelati bhwabho au nsila syabho sya bhwifi.