¹ Kubhatwaleka syotwakalifundisyanga kusumbula kuhusu sikula sya Kilisto, tuhensilwe kubha no juhudi kujelekela kubhukome, tusibhiki kabhili misingi jya tobha kufuma katika milimo sisili no bhupanga no imani katika Kabhumba, ² wala misingi jya mafundisyo gha bhubatizo, no kubhabhikila mabhoko, kufufulibhwa kwa bhafu no hukumu jya milele. ³ No tulakwila teti kubha Kabhumba aloluhusu. ⁴ Bhukobha tejikobholekeke kubhalya bhakapatanga nuru kale, bhalya bhakabhonjanga kipawa sya habhwelelo, no kwilwa kubha bhashilika bha Mwegho Mlafu, ⁵ no bhalya bhakabhonjanga bhusogha bhwa ghambo lya Kabhumba no kumanagha gha bhwakati bhwisile, ⁶ no kubha bhakagwa - tefina kobholeka kubhahelesya kabhili katika tobha. Jejyi ni ku sabhabhu ghabhasulubisha Mwana wa Kabhumba mala jya bhubhili ku nafisi syabho, bhamwila kubha ni syombo sya dhihaki hazalani. ⁷ Bhukobha ardhi jyakapokelanga mfula jyakaghwanga mala kwa mala halughulu jyaje, nokufumya mazao muhimu kubhalya bhakelanga milimo katika ardhi, bhapokesile balaka kufuma kwa Kabhumba. ⁸ Lakini kubhajafyala menfwa no maghughu teji kabhili no thamani no jiliho katika hatali jya kulaniwa. Mwisyo ghwajye ni kuteketesibhwa. ⁹ Nansi bhotukusahula teti bhanywanyi bhasogha tushauliwe na maghambo masogha ghalya ghahusike nafwe no maghambo ghahusike no bhokobhu. ¹⁰ Kubhukobha Kabhumba te dhalimu teghakalabhile milimo syenyu no kubhu nyomwe bhomwakalangisyanga kusabhabhu jya isina lyajye katika leli mwakabhakolelanga bhaamino hasyali muendelee kubhatumikia. ¹¹ Tulino hamu nkana kubha kila ghumwi ghwenyu akobhole kulangisya bidii jilyae mpaka bhuhela kubhuhakika bhwa bhusimu. ¹² Tutunile mubhe bhafila, lakini mubhe bhafuasi bhabhalya bhahyanile ahadi kusabhabhu jya imani no bhuhole. ¹³ Tukubha Kabhumba hoghakamuhanga Abraham ahadi, ghalahila kunafisi jyajye, bhukobha asina lape kughundi ghoghonsi alimukulu kuliko nyene. ¹⁴ Ghatenda, "Hakika ndokuha bhuwezo, nukubhughungilisha bhufyejye bhobhe kusumba." ¹⁵ Ku nsila jyejyi, Abrahamu ghapokela silya syoghakaahidiwanga baada jya kuhembela kubhu bhumulibhu. ¹⁶ Maana bhantu akobhaha kwa nyene ali mkulu kusamba bhene, na kumwabho bhukomo bhwa masindano ghonse ni kulahila kukughathibitisya. ¹⁷ Bhwakati Kabhumba hoghakaamuanga kulangisya kubhuwazi nkana kubhalithi bha ahadi sabhabhu jyajye nsogha jisinahinduka, jyakalizihilisyanga kukulahila. ¹⁸ Ghakelanga tetyo ili kufintu fibhili fisina kobhola kuhinduka, ambabyo katika fefyo Kabhumba tyanatenda malami, ufwe twa kajikili manga hifazi tupate kubhikitwa mwegho kunighilila kumanagha itumaini lyakabhikwanga hambele jyetu. ¹⁹ Tulinabho bhusimu bhobhu kobhe nanga imala no jya kutegemewa jya myegho jyetu, bhusimu bhulya bhwingile sehemu jya mkati hanyuma jya pazia. ²⁰ Jesu ghajingila sehemu jilya kobhe mlombosi ghwetu, kubhagha hwa kughela kuhani mkulu nansi milele baada jya bhutalatibhu bhwa Melkizedeki.