¹ Nanka bhali syanga mumwegho, ''Jisa, no ndakukujalibhu kufulaha. Kutetyo fulaha.'' Lakini tasama, bhobhu nabho bhubhele ni musagha ghwa muda. ² Nanka bhalanga hatunde ja nseko, ''Ni bhwasimu,'' No kuhusu fulaha, ''Jitaile sii?'' ³ Nanka lipelelesya mumwegho ghwane kujinsi ja kutimisya hamu jakwane kumalwa. Nanka jiluhusu masala ghane jilombo sibhwe no bhutekame ningi bho bho syalinsili kunighilila bhujinga. Nkahenjile kuhensela, ighambo lyolili isogha kubhanadamu kwila hansi ja ighulu bhwaka fighwa nfuku sya maisha ghabho. ⁴ Nanka timisyanga maghambo makulu. Nkajengile nyumba kujili ja kwane no kubhyala fili syamisabibu. ⁵ Nankelanga bustani no fiwanja; nankabhyula naamba syonse sya majabho mukati mwaje. ⁶ Nankalanga matanki gha mansi ili kugholelela misitu mahali no filikabhele jibhyalibhwe. ⁷ Nanka ghulanga bhasya bhaghosi no bhakema; nkabhele no bhasya bhobha fyalibhwanga kuikulu ja kwane. Kabhili nkabhale no makundi makulu no manywele gha kutunga, suumba ja mufulume ghoghonse gho ghaka tawalanga kabula jaane ku Yerusalemu. ⁸ Kabhili nanka likonkelanga mpija no sahabu, hesina ja bhafalume no majimbo. Nkapatile bhalimbaji bhaghosi no fulahia kufuma kubhana ghwabinadamu, masulia no bhakema. ⁹ Teetyo nkabhele mukulu no mutunsi kuleka bhoonse bho bhakabhele ku Yerusalemu kabula ja kwaane, no bhutekame ghwane ghukabhele mukati mwaane. ¹⁰ Lyolyonse lyo menso ghaana ghaka sitamani syaka ghalesyanga. Syuka bhule syanga mwegho ghwane ku fulaha jojonse, kusabhabhu mwegho ghwane ghwaka nyomwanga ku mulimo ghwane ghonse no fulaha jikabhele mitunu ku milimo syane syonse. ¹¹ Kabhili nankalolanga matendo ghonse gho mabhoko ghane jo jakahwanga kugha kwisha no halughulu ja mulimo gho nkabhele ndili kwila, lakini kabhili, kila sintu sikabhele ni mufuke no kughema kubhusunga musagha. Tekukabhele kutuhu no faida hefo no isyubha. ¹² Kabhili nanka hinduka kujipambanula hekima, no bhupumbafu no bhujinga. Kusabhabhu ni sintu sii mufalume gho ajisile baada ja kwane ajilite, syo sisali kwilikwa? ¹³ Kabhili nanka sapanga kumanya kubhe bhutekame bhuli no faida kuleka bhupumbafu, kobhe nulu jojili bola kuleka sikolo. ¹⁴ Mukanya hekima akotumila meenso ghaaje kumutwe ghwaje kulola ko ajili, lakini, mupumbafu akolyata kusikolo, ningi bhonjisi kubha kubhuhela ghwa nambe jimwi ghutunsi bhwe ku kila ghumwi. ¹⁵ Kabhili nankabhalanga mumwegho ghwane, ''Syosili kufumilila ku mupumbafu, syosila kufumilila no kumwaane. Tetyo kuli no bhutofauti ghwabhuti kobhe uune ndili mukanya bhutekame nkana?'' Nanka hitimisya mumweegho mwaane, ''Ghoghu kumwi ni mufuke tuwe.'' ¹⁶ Kukubha mukanya bhutekame, kobhe mupumbafu, te ekukumbulwa ku muda mulehe. Ku nfuku syo siisile, kila sintu sila kubha syalabhililwa. Mukanya bhutekame akofwa kobhe bho akofwa mupumbafu. ¹⁷ Tetyo nanka ghughajanga bhupanga kusabhabhu milimo syoonse syo syajilwangwa hefo no isyubha sikabhele mbii kumwaane. Jeji ni kusabhabhu kila sintu ni mufuke no kughemo kubhu sunga musagha. ¹⁸ Nankaghajanga ghoonse gho nankaghawa, gho nkabhele nankahwa kughela hefono isyubha ku sabhabhu ni lasima ingaleke ku mntu gho ajisile baada ja kwaane. ¹⁹ No ni ghanyi gho ajinsi kobhe alokubho mukanya bhutekame ama mupumbafu? Ila alokubha musimamizi halughulu ja kila sintu hefo no isyubha ghomulimo ghwaane no bhutekame ghwaane ja ghabhuumba. (jenga) Ghooghu kumwi ni mufuke. ²⁰ Kutetyo mweegho ghwaane ghuke sapile kuputa tamaa halughulu ja milimo syoonse syo nakelanga hansi ja isyubha. ²¹ Kukubha kukobhwele kubha no muntu gho alikwila mulimo ku bhutekame, bhufahamu, no bhumahili, lakini alokuleka kila siintu syo alinasyo ku mntu gho siajilite syosyonse. Ghooghu naagho ni mufuke no hatali nkulu. ²² Kusabhabhu ni faida ja bhuti muntu akopata gho akojila mulimo ku katampa no kughema mumwegho ghwaaje kujitimisya milimo syaaje hefo no isyubha? ²³ Kila lwiisye mulimo ghwaaje nimaumifu no masikitiko, tetyo bhwakati ghwa bhufuku myegho ghwaaje te ghuli kutamuka. Ghoghu naagho ni mutuke. ²⁴ Kutuhu ighambo isogha ku mntu ghoghonse sumba ja kulya no kunywa no kulisika no silya syo silikuchema kubhe bhukweli bhobhu bhufumile kufuma mumabhoko gha kabhuumba. ²⁵ Kukubha ni ghanyi gho akobhwele kulya ama gho akobhwela kupata fulaha jojonse tofauti no Kabhumba? ²⁶ Kukubha kila gho kumufulahisya nyene, Kabhumba akomoha bhutekame bhufahamu no fulaha. Ningi, kumukanya saambi akomuha mulimo ghwa kukonka no kutunsya ili kubha amuhe muntu gho alikumupendesya Kabhumba. Ghooghu kumwi nisawa no mufuke no kughema Kubhusunga musagha.