¹ Baada ja kuamulibhwa kubha tuli kuhensa kusafiri ku mansi kuja ku Italia, bhakamukabhisi Paulo nobhafungwa bhandi ku afisa ghumwi ghwa jeshi la Siloma ghoghaketwanga Julio, ghwa sikosi sya Agustani. ² Twatanda meli kufuma Adramitamu, jojikabhele jisafiri hankande ja pwani ja Asia. Tetyo lwakajingila kubhahali. Aristaka kufuma Thesolanike ja Makedonia ghakaja hamwi nofwe. ³ Ifuku lo lyakalondanga kula kubha nanga kumuji ghwa Sidoni, ho Julio ghakamwilila Paulo kubhuka limu no kumuluhusu kuja kwa lafiki ghwaje kupokela bhukalimu ghwaabho. ⁴ Kufuma haho twakaja kwi bahali twakasafili kusyunguluka sisibha sya Kipro so sikabhele sibhukingile musagha, kusabhabhu musagha ghukabhele bhukusumba. ⁵ Baada ja kubha twasafiri kumansi gho ghali hehi no Kilikia no Pamfilia, twakesa Mira, muji ghwa Lisia. ⁶ Halya ghulya afisa ghwa ijeshi lya Kiloma, ghakajisanga meli kufuma Alexandria jojikabhele jili kusafiri kuja ku Italia. Ghakatutasya ndani jaje. ⁷ Baada ja kubha twasafiri bhuke bhuke sumba twafika kumafuku mengi ku taabu hehi no Kinidas, musagha teghwaka tuluhusu kabhili kuja kunsila jejioe, tetyo twakasafili ha nkandoja sinsibhu sya Krete mukubhu kinga musagha, kumwi no Salmone. ⁸ Twakasafili ha nkande ja mpwaanyi kubhu kake, mpaka twafika mahali hajitwile Fari Haveni jojili hehi no muji ghwa Lasi. ⁹ Tukabhele tutwalile mudaghwiingi nkana, no muda ghwa tobha jabhayahudi ghukabhele ghwahita kumwi, na nonwe jikabhele jili hatali kusafili. Tetyo Paulo ghakatuhana, ¹⁰ no kubhala, "Bhaghosi, mbwene safali jotuli kuhensa kujitwala jila kubha no madhala no hasala naango, tetue sya miligho no meli, lakini kumwi no bhupanga ghwetu." ¹¹ Lakini afisa ghwa jeshi lya Kiloma ghakamuhulikisya nkana bhwana ghwaje mumiliki ghwa meli, kuleka maghambo ghalya ghogha ka bhalisyangwa no Paulo. ¹² Kusabhabhu bhandali tejikabhele sehemu nhafu kwikala sipindi sya mpeho, mabhahalia bhengi bhaka syahuli tusafili kufuma halya, ili kunamuna jojonse tukobhole kughufikila muji ghwa Foinike, twikale halya bhwakati ghwa mmpeho. Fonike ni bandari kulya Krete, no jikungile ku kaskazini masyaliki no kusini masyaliki. ¹³ Musagha ghwa kusini mukusapa puusya bhuke bhuke, mabhahalia bhakalanganya kubhabhapata silya syobhakabhele bhali kusihensa. Bhakamola naanga no kusafili ha nkande ja Krete hehi no mpwaanyi. ¹⁴ Baada ja muda mutofu musagha mukali, ghoghukajitwile ghwa kasikasini masyaliki, ghwasapa kutuhula kufuma ng'aambo ja sisiwa. ¹⁵ Bhwakati meli ja elemebhwa no kupotwa kubhu kabhili musagha, twakeswanga hali iijo, twakasafilisibhwa naghoo. ¹⁶ Twakakilima kuhitila ghulya luhande ghoghukabhele ghuli kubhukinga musagha ghwa sisiwa sijitwile Kauda; no kutaabhu nkana twakafanikibhwa kubhu sabhula mumbwi. ¹⁷ Baada ja kubha bhabhutaamba, bhakatumilanga nkusa kujihamba meli. Bhakaghubha hanga kubha tuna kobhole kuja kwi eneo lya musenga mwiingi lasyiti, bhakasosya nanga no bhaka twatwa kandokando. ¹⁸ Twakahulwanga kwa managha no sulubha, tetyo nfuku lyo lyakalondanga mabhahalia bhakasapile kutagha miligho kufuma kumeli. ¹⁹ Ifuku lya bhutatu, mabhahalia bhakasapile kufumya mansi kumabhoko ghaabho bheene. ²⁰ Bhwakati bho isubha no nyota tesyaka tulanga sisya kumfuku nyingi, hasyali solubha nkulu jikatuhusile, no matumaini kubhatula kusabhulibhwa ghakafumikanga. ²¹ Baada ja kubha bhakajanga muda mulehe bhusila syakulya, haho Paulo ghakaju ghalalanga katikati ja mabhahalia no kubhala, "Bhaghosi, mukahensibhwe kunhuli kisya no tetuna kamoole naanga kufuma Krete, ili kupata aaghe madhala no hasala. ²² Na nonwe ndili kubha faliji mulihe mwegho, kusabhabhu tekula kubha bhutaghanyi ghwa bhupanga kati jeetu ila tu meeli. ²³ Kusabhabhu bho bhwahitanga musambwa ghwa Kabhuumba, gho uujo Kabhuumba uune ni ghwa kwaje, naghondili kumuabhudu kabhili - musamba ghwaaje ghakajugha lalanga hankande jaane ²⁴ no kubhala, "Usighubhahi Paulo. Lasima ujughalale hambele ja Kaisari, no tasama, Kabhuumba kubhweema ghwaaje ghakuha aabhe bhonse bho bhali kusafili hamwi nooghwe. ²⁵ Tetyo, bhaghosi, muli he miegho, kusabhaabhu ndili kumwamini Kabhumba, kubha jilakubha kati kobhe bho nanka bhalilwa. ²⁶ Lakini lasima tu fulalike mukuhulwa ku bhaasi sya fisiiwa amatughongo.'' ²⁷ Hoo ghwakafikanga bhuku ghwakumi no inne, hotukabhele tuli kuendesibhwa uuko no uuko kubhahali ja Adratik, kobhe bhutukughwa manane iiti, mabhahalia bhakalanganya kubha bhakalibhiie ilongo lya ighulu gu. ²⁸ Bhakatumilanga mwanywi kupima kina sya mansi no kupata mita makumi atatu no mukagha, baada ja muda mutofu bhapima kabhili bhapata miita makumi abhili no mupungati. ²⁹ Bhakaghubhaha kwansa iti hamwi bhana hula miamba, kutetyo bhakasosya nanga ine kufuma ku sehemu ja kubhikila nanga no bhakasegha kubha mulabho bhunakese bhwaangu. ³⁰ Bhalya mabhahalia bhakabhele bhali kuhensela namuna ja kujilelekesya jilya meeli no bhakasisosya nga mumansi boti nsense sya kusabhulila bhupanga, no bhakelanga kubha bhali kusosya naanga kufuma sehemu ja hambe ja bhooti. ³¹ Lakini Paulo ghakamubhalila ghulya asikali ghwa jeshi lya Kiroma no bhalya asikali, "Temwa kobhole kusabhula tuabhe bhantu bhali kusibha ku meeli." ³² Kiisha bhalya asikali bhaputa jilya nkunsa sya bhooti no kujileka jitwalibhwe no maansi. ³³ Bhwakati ilangari lya mulabho lili kwifumisya, Paulo ghakabhahana bhonse suumba bhalye kise. Ghabhala, "Iije ni nfuku kumi na inee mulikuhembelela bhusila kulya, musyali kulya sintu. ³⁴ Tetyo ndili kubha hana mutwale sya kulasise, kusabhabhu iije ni kujili ja bhupanga ghweenyu; no kutuhu ni bhunyele ghwa mitwe syenyugho ghula kufaghika. ³⁵ Mukuhwa kughabhala aagho, ghakabhutwala mukate ghakamshukulu Kabhuumba mbele ja menso gha kila muntu. Kiisha ghaka bhuputa mukate no kusapa kubhulya. ³⁶ Kiisha bhonse bhakahebhwa mwegho no bheene bhakatwala sya kulya. ³⁷ Tukabhele bhantu 276 ndani ja meli. ³⁸ Mukuhwa kulya fya kukwila, bhaakajijilenga meli nhafu ku mukutagha ngano ndani ja bhahali. ³⁹ Ho jikabhele mwisyubha, tebhaka jimanyanga inchi nkange, lakini bhakalolanga sehemu ja ilongo ikake lyolyakengilanga mumansi lyo likabhele na musenga mwiingi. Bhakalibhalila kubha bhana kobhola kuendesya meli kuja haho. ⁴⁰ Tetyo bhakasileghesya nanga bhaka sileka kwi bahali. Ku muda ghoghoe bhakasileghesya nkusa sya itanga no bhakajibhusya sehemu ja hambele kuja kumusagha, tetyo bhakajanga ku sehemu ja musenga bhwiingi. ⁴¹ Lakini bhakesanga mahali ho mikondo mibhili sili kukutana, no meli jikajile ku musenga. No jilya sehemu ja hambele ja meli jika kwamile halya no tejaka kobholanga kufuma, lakini sehemu jaha mbele ja meli jikasapile kufuna ghika kusabhabhu ja bhukali ghwa mawimbi. ⁴² Mupanga ghwa bhalya asikali ghukabhele ni kubhehagha bhalyabhasya, ili kubha kutuhu ghwa kwipuma no kutoloka. ⁴³ Lakini ghulya asikali ghwa jeshi lya Kiroma ghakahensanga kumusabhula Paulo, tetyo ghakabhu jughalalisya mupango ghwabho; no ghakabhaamulu bhalya bho bhakobhwele kulipuma, bhaghuluke kufuma ku meli kwansa nobha kajile ku ilongo lya bhukange. ⁴⁴ Kisha bhaghosi bhandi bhale kulonda, bhandi halughulu jafipande sya mbao no bhandi halughulu ja fintu findi kufuma ku meeli. Ku nsila jeji jikafumisile kubha bhonse tula kufika salama kwilango lika.