¹ Nao from samting, ya, ol gudfala brata yufala i mas tingbaot we Jisas i masta blong yumi. ² Hemi mekem everi samting we Hae God i talem long hem. Olsem Moses i stap obei mo hona long hem insaed long haos blong God. ³ Nao Jisas i hona long hae God bitim Moses. I Olsem man we i bildim haos mo i laekem i bitim haos ia hemwan. ⁴ From everi haos i gat man i buildim be hae God i mekem everi samting. ⁵ Moses hemi wan fetful man blong God we hemi stap talemaot wanem we bae i kamaot long taem we bae i kam. ⁶ Jisas hemi pikinini blong God hemi stap lukaot mo i stap mekem i gud long ol man blong hem long haos blong hem. Yumi haos blong hem yumi mas putum tingting blong yumi long hem oltaem. ⁷ From samting ia i olsem Holi Spirit i talem tedei, sapos yu harem voes blong hem. ⁸ Yufala i no mas mekem hat blong yufala i strong olsem lo taem blong ribelien, mo long taem blong harem nogud long drae ples . ⁹ Hemia hemi long taem blong ol pupu blong yufala long taem we oli go agens long mi blong traem mi, afta long hem oli luk ol woks blong mi blong foti yea. ¹⁰ Nao from samting ya mi kros tumas long jeneresen ia. Mi talem, "oltaem oli stap ronwea long mi long hat blong olgeta, oli no save ol fasin blong mi." ¹¹ Olsem we mi mekem promes se bae oli no save go insaed long ples blong spel blong mi. ¹² Ol brata blong mi yufala i mas lukaot gud long yufala blong nokat wan long yufala i gat rabis hat we i no bilif, o hat we i stap long we long God we i laef. ¹³ Be yufala i mas leftemap tingting blong wan wan long yufala, blong mekem se ino gat wan long yufala we hat blong hem i kam strong strong tru long giaman blong sin. ¹⁴ From we yumi kam ol famili blong Kraes. Nao yumi mas holem taet tingting blong yumi i strong long hem tedei mo long en blong taem. ¹⁵ Tok ia oli bin talem finis, "sapos yufala i harem vois blong hem yufala i no mekem hat blong yufala i strong olsem long taem blong ribelien. ¹⁶ Be hu olgeta ia oli harem tok blong God nao oli mekem i nogud long hem? Ino olgeta we oli kamaot long ijip wetem Mosis? ¹⁷ Mo huia we God i kros tumas long olgeta blong foti yia? hemi olgeta nomo we oli mekem fasin nogud oli ded mo bodi blong olgeta i foldoan long drae ples? ¹⁸ Mo hu olgeta we God i talem long olgeta blong bambae oli no save go spel long hem? Hemia i olgeta nomo we oli disobei long hem? ¹⁹ Yumi luk se olgeta we oli nomo save go blong spel wetem hem hemi from wea oli no bin bilif.